IMAMAT 5:16 - Alkitab Singog In Mongondow Masa In Tanaa

¹⁶ Intau tatua musti moguboḻi kon onu inta koḻipod kinoḻiongannea, bo dugangan in doyowa nopuḷú noporsen. Onda intua sia in musti mobogoi in mahaḷuk tatua kon i imang, bo ki imang in mopokuruban intua mobaḻí tobutan in dosa intau tatua, dá intau tatua ampungandon i Tuhan.

IMAMAT 5:16 ပူးပေါင်းရင်းမြစ်များ

MAZMUR 69:4

Akuoi in kopia mokuani nodapot in noḷopídon totok bo noingkagdon in sigogowku. Mataku in mopomporí in mogoḷat mako kon totuḷung i Allahku.

IḶUAIAN 22:1

“Ki ine in monakow kon sapi tobatú ande domba bo moratá ande mopotaḷui intua, yo mustibí in sia monoḻiu, aka sapi tobatú yo musti toḻiuannea in sapi ḻima bo aka domba tobatú yo musti toḻiuan in domba opat.

IMAMAT 22:14

Aka intau tobatú inta deeman tombonu in motoḷuadí i imang bo takin diá sinumuod noikaan kon kaanon inta pinosumba kon i Tuhan, yo sia in musti mobogoi in toḻiunea kon i imang bo dugangan in doyowa nopuḷú noporsen.

IMAMAT 27:13

Aka intau tatua moibog motobut kon biagnea, dá musti uboḻiannea bo dugangan doman in doyowa nopuḷú noporsen.

IMAMAT 27:15

Aka intau tatua moibog motobut kon baḷoinea, yo musti uboḻiannea in boḻinea tatua bo dugangan in doyowa nopuḷú noporsen.

IMAMAT 27:27

Táe mahaḷuk haram inta muna pinogadí motaaubí tobuton podudui in boḻi inta sinantú kon Ḷoḷaigan i Tuhan, bo dugangan in doyowa nopuḷú noporsen. Aka diá tobuton in mahaḷuk tatua yo motaaubí in potaḷui kon intau ibanea podudui in boḻi inta ain sinantú kon Ḷoḷaigan i Tuhan.

IMAMAT 27:31

Aka intau tobatú moibog motobut kon tobotak nongkon bungai in boyó tatua, yo sia in musti moguboḻi kon boḻinea inta ain sinantú bo dugangan in doyowa nopuḷú noporsen.

IMAMAT 4:20

Aidan naonda bo pogogaid kon sosumba sapi koḷakian inta nobaḻí kuruban pongampung kon dosa. Natuata in pogogaid in Imang Moḷoben moposumba in kuruban sin potobut kon dosa mita in umat, dá dosa mita tatua in ampungandon i Tuhan.

IMAMAT 4:26

Onda intua bayongan ḷongó in mahaḷuk tatua musti tubáan kon tudu in mezbah, ná kuruban dodamean. Natuata in pogogaid i imang kon moposumba in kuruban in tobatú bobato, dá intau tatua in ampungan i Tuhan.

IMAMAT 5:10

Mopaḷut mako kon tua ki imang moposumbadon in ḷagapan inta nogindua mobaḻí kuruban inta tubáan, podudui in atorang. Natuata in pogogaid i imang kon moposumba in kuruban mobaḻí tobutan in dosa intau tatua, dá intau tatua ampungandon i Tuhan.

IMAMAT 5:13

Natuata in pogogaid i imang kon moposumba in kuruban mobaḻí tobutan in dosa intau tatua, dá intau tatua in ampungandon i Tuhan. Kiagat in topong tatua in nobaḻídon silai i imang, ná doman kon kuruban gandum.

IMAMAT 5:6

Bo inta mobaḻí tontobut in dosanea tatua, dá sia in musti modia kon domba tobatú ande bembé kobaayan sin ogoi kon i Tuhan. Bo ki imang in musti moposumba in kuruban tatua sinbá ampungandon in dosa intau tatua.

IMAMAT 7:2

Mahaḷuk inta pakéon kon kuruban tatua musti ratáan kon tampat pororataan kon mahaḷuk inta baḻíon kuruban tubáan, bo dugúnea in popobutak kon sí opat in mezbah.

PINOGIAPAN 5:7

dá intau tatua musti mongaku kon dosanea bo mobogoi kon bayongan tontobutnea, poḷat dugangan in doyowa nopuḷú noporsen, kon intau inta pinoruginea.

PINOGIAPAN 5:8

Táe aka intau inta pinorugineamai tatua minatoidon bo diá koginaḷum modagin, dá tontobutnea tatua musti ogoi kon i Tuhan, bo mobaḻí silai in imang. Tobutan tatua in diápabí pinoyotakin in domba koḷakian inta pakéon kon upacara potobutan kon dosa in intau inta kotaḷá tatua.

LUKAS 19:8

Kon baḷoinea tatua, ki Zakheus sinimindog bo noguman kon i Tuhan, “Tuhan, kapunyaanku tobotak ogoikudon kon intau mita bogá bo aka oyúon doman in intau inta pernadon inuboḷanku, yo pobuionkudon bui kon inia koopat noguntuḷ in kobayongnea!”

OUMAN IN RASUL MITA 26:20

Taran-tarangan in akuoi in mopotaau kon bayongan intau kon musti mogogai in mogaid kon dosa mita in mosia bo moposarakandon in kobiagan monia kon i Allah. Tua komintan in musti poniata kon oaid monia pomuḷoi in singgai. Muna in kon Damsyik in pinopotaauanku kon onu inta nobaḻí tanaa, onda in tua kon Yerusalem bo kon bayongandon in Yudea bo kon sigad doman in intau mita inta deeman Yahudi.

SAMUEL 1 6:3

Bo mosia in notubag, “Poti Dodandian i Allah in Israel tatua in dikabí tongá pobuion mako monimu natua, táe mustibí takinan in tombuinag sin potobut kon dosamu. Aka aidan monimu in natua dá undamandon in moiko, bo kotaauandon monimu nongonu sin ki Allah in Israel tatua in tantúbí mohukum kon i monimu.”