IMAMAT 4:31 - Alkitab Singog In Mongondow Masa In Tanaa

³¹ Bayongan ḷongó in mahaḷuk tatua musti gamáan ná kon kuruban dodamean. Ḷongó tatua musti tubáan in imang kon tudu in mezbah, sinbá ronginginea mokosanang kon gina i Tuhan. Natuata in pogogaid i imang moposumba in kuruban potobut kon dosa in intau biasa tobatú, dá intau tatua in ampungan i Tuhan.

IMAMAT 4:31 ပူးပေါင်းရင်းမြစ်များ

KINOBAḺIAN 8:21

Bó mobondu in kuruban sosumba tatua nokosanang kon gina i Tuhan, bo Sia in nosingog kon bonu in gina, “Akuoi in diá bidon bui mongutuk kon dunia naa popisí in oaid intau; kinotaauan-Ku, kon nongkon sia noguodpamai, raian intau tua in moraatbí. Diá bidon mokoimontanmai in Akuoi moyopú kon bayongan mahaḷuk inta nobiag ná inta bagu-Ku inaidan tanaa.

EZRA 6:10

Aidai intua komintan sinbá mosia in motaau moposumba in kuruban inta mokosanang kon i Allah inta nongawasa kon soroga, bo bá mosia in mopoigum in barakat kon inakó bo kon i adíku mita ḷoḷaki.

AYUB 42:8

Dá, gamádon in tanaa sapi koḷakian pitu bo domba koḷakian pitu, bo bayádon kon i Ayub. Bo posumbadon intua komintan mobaḻí kuruban payongon kon inimu. Sambayangan i Ayub in moiko bo tarimaan-Ku in sambayangnea. Moiko in diábí pokopooyáan-Kumai, umpakabí patus in moiko motarima kon hukuman. Diá inouman monimu kino banar ki ine in Akuoi, ná inta inouman i Ayub.”

IḶUAIAN 29:18

Poposumbadon in bayongan domba koḷakian tatua kon tudu in mezbah mobaḻí kuruban inta sinubá. Rongingi in kuruban tatua mokosanang kon gina-Ku.

YESAYA 42:21

Ki Tuhan in moibog moposaḷamat; Ibogon-Nea hukum-Nea in horomaton bo untuon.

YESAYA 53:10

Ibogbí i Tuhan sia in kotugatan in roriga, bo moposarakan in kobiagan nobaḻí kuruban potobut kon dosa. Dá moumur in kobiagannea bo mokoontong kon buínea pongin inia ibog i Tuhan in koaidan.

IMAMAT 1:13

Bo intau tatua musti mondarit kon bonu in sian bo páa in biag tatua. Onda intua imang musti moposumba intua komintan kon i Tuhan, bo tubáannea kon tudu in mezbah. Rongingi in kuruban tatua mokosanang kon gina i Tuhan.

IMAMAT 1:17

Onda intua koḻikip in ḷagapan tatua musti yabion táe dika dapot in moyotontaní in awaknea. Bo ḷagapan tatua musti tubáan kon tudu in mezbah. Rongingi in kuruban sinubá tatua mokosanang kon gina i Tuhan.

IMAMAT 1:9

Bo intau tatua musti mondarit kon bonu in sian takin paa in sapi tatua, bo imang inta mogaid kon oaidan tatua musti motubá kon tua mita. Rongingi in kuruban sinubá tatua mokosanang kon gina i Tuhan.

IMAMAT 14:18

Ki agat in ḷana tatua musti pobutak kon uḷu in intau tatua. Natuata in pogogaid i imang kon upacara pondaritan kon intau tatua kon tayowon i Tuhan.

IMAMAT 15:15

Ki imang musti moposumba in ḷagapan tobatú mobaḻí kuruban potobut kon dosa, bo inta tobatú in baḻíon kuruban tubáan. Natuata in pogogaid i imang kon upacara pondaritan kon intau tatua kon tayowon i Tuhan.

IMAMAT 19:22

Ki imang musti mopokuruban in domba tatua kon bonu in upacara pondaritan, sinbá dosa intau tatua ampungan. Dá Akuoi, ki Allah in mongampungdon kon inia.

IMAMAT 2:2

Musti diaan in intau tatua kon imang mita inta buí i Harun. Imang moḷoben inta mogaid kon oaidan tatua musti mogamá kon toyoyangkom in topong tatua takin ḷana zaitunnea bo bayongan kamanianea, bodongka tubáannea intua kon tudu in mezbah mobaḻí tompoingat kon tua komintan aindon pinosumba kon i Tuhan. Rongingi in kuruban kaanon tatua mokosanang kon gina i Tuhan.

IMAMAT 2:9

Imang in mogamá kon tosilai nongkon roti tatua bodongka tubáannea kon tudu in mezbah mobaḻí tompoingat kon bayongan tua aindon pinosumba kon i Tuhan. Ronginginea mokosanang kon gina i Tuhan.

IMAMAT 4:19

Bayongan ḷongó in mahaḷuk tatua musti gamáan bo tubáan kon tudu in mezbah.

IMAMAT 4:26

Onda intua bayongan ḷongó in mahaḷuk tatua musti tubáan kon tudu in mezbah, ná kuruban dodamean. Natuata in pogogaid i imang kon moposumba in kuruban in tobatú bobato, dá intau tatua in ampungan i Tuhan.

IMAMAT 4:35

Onda intua bayongan ḷongó in mahaḷuk tatua musti gamáan ná kon kuruban dodamean. Ḷongó tatua musti tubáan kon tudu in mezbah, poyotakinon in kuruban kaanon inta posumba kon i Tuhan. Natua in pogogaid i imang kon moposumba in kuruban potobut kon dosa in intau tatua, dá sia in ampungan i Tuhan.

IMAMAT 5:10

Mopaḷut mako kon tua ki imang moposumbadon in ḷagapan inta nogindua mobaḻí kuruban inta tubáan, podudui in atorang. Natuata in pogogaid i imang kon moposumba in kuruban mobaḻí tobutan in dosa intau tatua, dá intau tatua ampungandon i Tuhan.

IMAMAT 5:6

Bo inta mobaḻí tontobut in dosanea tatua, dá sia in musti modia kon domba tobatú ande bembé kobaayan sin ogoi kon i Tuhan. Bo ki imang in musti moposumba in kuruban tatua sinbá ampungandon in dosa intau tatua.

PINOGIAPAN 15:25

Bo imang musti mogaid kon upacara potobutan kon dosa in umat. Dá ampungan in taḷá monia inta diá sinuod inaidan monia, bo popisí in mosia ain nodia kon kuruban potobut kon dosa bo kuruban payongon kon i Tuhan.

MATIUS 3:17

Bo kinodongogandon in singog nongkon soroga noguman: “Naadon ki Adí-Ku inta kinotabi-Ku, Sia naa inta kinoibog-Ku.”

EPESUS 5:2

Kobiagbí takin oyúon tabi, ná ki Kristus motabi kon i naton. Sia in nopokuruban in kobiagan-Nea kon i naton bo nobaḻí tobatú sosumba inta totok in mobondu bo inta mokosanang kon gina i Allah.

IBRANI 1:3

Sia doman naa in moponiata in kamuliaan i Allah inta diá in poḻiuan tua. Bo noniatadon totok kon i-Nia in rupa i Allah tontaní. Singog-Nea inta mokawasa totok tua in pinaké-Nea moḷukad kon dunia naa. Bo naonda in sinobut-Neadon in dosa mita in intau, iḻimitúdon in Sia kon ḷoḻitúan pomomarentaan kon soroga moyotakin i Allah Pongawasa inta totok in moḷantud.

IBRANI 10:12

Táe ki Kristus in tongábí komintan noposumba in kuruban potobut kon dosa, bo kuruban tatua in umuranbí pakéon modapotkabí in kopaḷutan dunia naa. Naonda in nopaḷut mako noposumba in kuruban tatua, ki Kristus in iḻimitú kon dotá in koḷanan i Allah bo nomarenta noyotakin-Nea.

IBRANI 10:14

Dá kuruban tobatú tatua inta inaidan i Kristus noposompurnadon kon intau mita inta ain dinaritan nongkon dosa.

IBRANI 9:12

Ki Kristus in sinumuot kon Yuang Totok in Motusi kon ḷoḷaigan tatua tongábí komintan, diá bidon mopobui-buimai. Dodai intua Sia in diábí nodia kon dugú in bembé koḷakian andeka dugú adí in sapi sin posumba, táe dugú-Neabí tontaní in dinia-Nea. Bo dugú-Neabí tatua in nopobebas kon i naton dapot in kopaḷutannea.

YOHANES 1 1:7

Táe aka kita in mobiag kon bonu in bayag ná ki Allah inta kon bonu doman in bayag, dá kita in mustibí mobiag modagin, motompia bo mositabian tobatú bo tobatú. Bo dugú i Yesus, ki Adí-Nea tua, mondarit kon i naton nongkon bayongan dosa.

WAHYU 5:9

Mosia nopodondong in tobatú dondong mobagu, nanaa: “Iko in patus mogamá kon buk tatua bo moḷosi kon meterainea mita. Sin Iko ain iḻimod, bo dugú-Mu tatua, in pinoguboḻi-Mu kon intau nongkon bayongan suku, bahasa, negara bo bangusa sin ogoi kon i Allah.