IMAMAT 26:26 - Alkitab Singog In Mongondow Masa In Tanaa

²⁶ Moiko in kodaitan in kaanon, dá naa in mobaḻí: Bobay mopuḷú dongkadon tobatú in doḷuong sin potubáan kon roti inta kaanon monia. Kaanon tatua in pobuion doman, bo naonda in mokaan mako, umuranpa doman gogoyon in moiko.

IMAMAT 26:26 ပူးပေါင်းရင်းမြစ်များ

DATU MITA 2 6:25

bo nokopopisí kon nomukádon in gogoy motoyang kon kotá, nodapot in uḷu in keledai tobatú boḻinea in doyowa nopuḷú in doit saḷaka bo doyowa no ons in taai in paḷoma ḻima in doit saḷaka.

MAZMUR 105:16

Ki Tuhan in nopoangoi in gogoy kon butá tatua, bo nogamá kon bayongan in tongkaaḷ in kaanon.

YESAYA 3:1

Totuubí, ki Tuhan Inta Mokawasa Totok in mogamábí nongkon Yerusalem bo Yohuda in bayongan tongkaaḷ in kaanon bo inumon. Intau mita doman inta pongatamai monia:

YESAYA 5:10

Bungai in pinomuḷa diá mopia, gobá in anggur inta koḷobennea mopuḷú nohitare tongá kouḻían kon mopuḷú noliter in tubig in anggur. Mogatut noliter in bibitnea tongá kinouḻían kon mopuḷú noliter in gandum.”

YESAYA 9:19

Kon sinangkub in butá tatua mosia mogagow bo mokaan kon onukabí in motaau kaanon, táe diábí in mosia mokorasa kon mobotug. Nodapotbí in mosia mokaan kon topotakin mita monia tontaní!

YESAYA 9:20

Intau in Manasye bo intau in Epraim mositubuan, bo moyotakin monayow kon Yohuda. Táe ki Tuhan in sinumorúpabí bo umuran mohukum.

YEREMIA 14:12

Umpakabí in mosia mopuasa, doíbí in Akuoi moindoimai kon kuani monia mokituḷung; bo umpakabí in mosia moposumba kon i-Nakó in kuruban payongon bo kuruban gandum, yo diábí mosanang in gina-Ku kon i monia. Noyotoḻikudon kon tua, yopúon-Kubí in mosia in parang, in gogoy, bo in yampoi.”

YEHEZKIEL 14:13

aka ḻipú tobatú baradosaan bo diá motoindudui kon i-Nakó, yo hukumon-Kubí in ḻipú tatua. Rimumudon-Kubí in tongkaaḷ in kaanonnea, mopoangoi in malarat in kaanon bo moḻimod pinomayá intau andeka bobiagon.

YEHEZKIEL 4:10

Roti tatua in musti silaionmu námai tua modapot in pomuḷoi in singgai iko in tongábí mokaan kon 230 nogram. Moiḻiu kon tua in diábí motaau.

YEHEZKIEL 4:16

Onda intua Sia in noguman bui, “Ei intau inta ilo-ilow, Akuoi in monginggamábí kon tongkaaḷ in kaanon kon Yerusalem. Takin moondok bo mogagawang in intau mita in tongá uku-ukuron in mobogoi in kaanon bo inumon monia.

YEHEZKIEL 4:17

Mosia in koinggamáandon in kamang popisí in kodaitan in roti bo tubig, bo imbuitnea matoi in mosia popisí in dosa mita monia.”

YEHEZKIEL 5:16

Daiton-Ku poguyaaton in tongkaaḷ in kaanonmu bo mopomayá mako in intaumu mita gogoyon. Korasaanbí monia naonda in sian mopomporí popisí in gogoyon, naonda bo piot moḷanit noiturak bo nomatoi kon inimu.

HOSEA 4:10

Moiko in mokaanbí kon kuruban mita inta pinosumba, táe moiko in umuranbí gogoyon. Moiko in mosumbabí kon dewa mita inta kai monimu in mopoḷumbá, táe intaumu in diábí modugang, sin moiko in nonaḷámaidon kon i-Nakó sin mosumba kon ilah mita ibanea.”

IMAMAT 26:27

Bo aka motarima mako kon bayongan hukuman tatua bo umuranpa doman in moiko moḷawang kon i-Nakó bo doí doman dumudui kon i-Nakó,

MIKHA 6:14

Moiko in mongaanbí, táe diábí mobaḻí mobotug – sedang bo umuranbí gogoyon. Moiko in mogakutbí kon pakakat mita, táe diá mokopotagú. Onukabí in tagúon monimu in rimumudon-Kubí kon bonu in parang.

HAGAI 1:6

Moiko in noponimboidon in nobarong in bibit, táe bungai in boyómu tongá topiḻik. Oyúon in kaanon monimu, táe diá mokobotug kon sianmu. Oyúon in anggur kon i monimu, táe diá mokoorop kon ginamu. Oyúon in ḷambung monimu, táe diá mokoinggamá kon tumpingmu. Bo tondan in pinogaidan in mogogaid in diá tugat pakéon kon kobiagan monia moiduduimai.