IMAMAT 20:26 - Alkitab Singog In Mongondow Masa In Tanaa

²⁶ Moiko pinotondí-Ku nongkon bangusa mita ibanea sinbá mobaḻí kapunyaan-Ku. Moiko in musti motusi sin Akuoi in ki Tuhan, bo Akuoi in motusi.

IMAMAT 20:26 ပူးပေါင်းရင်းမြစ်များ

NEHEMIA 10:29

Kami komintan in dinumugangdon takin itoi mita nami bo nongibot kon mobiag podudui in hukum i Allah inta ain inogoi-Nea pinongin i Musa mogogundoi-Nea. Igumon mako ki Allah mongutuk kon inami aka diá intompodan nami in dodandian nami tanaa. Kami in mongibot kon dumuduibí kon bayongan in parenta, hukum bo atorang i Tuhan, Allah nami.

MAZMUR 99:5

Poḷantudon in ki Tuhan Allah naton, dokódon kon tayowon in pomomarentaan-Nea. Mokudusbí in Sia!

MAZMUR 99:9

Poḷantudon in ki Tuhan Allah naton, bo sumbadon in Sia kon buḷud-Nea inta motusi, sin mokudusbí in ki Tuhan Allah naton.

IḶUAIAN 33:16

Naondabí in kotaauan intau kon kinoibog-Mu in akuoi bo bangusa tanaa aka Iko diá motuḷung kon inami? Aka ki Tuhan kotaki-takin nami yo tua in mopoyoposi kon inami takin bangusa mita ibanea kon dunia naa.”

YESAYA 30:11

Bayádon, bo pongin daḷandon ibanea. Dika ponuyayow kon inami in Allah mokudus in Israel.”

YESAYA 6:3

Mosia in nosigumanan tobatú bo tobatú: “Kudus, kudus, kudus. Mokudusdon in ki Tuhan Inta Totok in mokawasa. Butá nopuḻing in kinoangoian-Nea inta momulia.”

IMAMAT 11:44

Akuoi naa in ki Tuhan Allahmu, tuamai ḷukadaidon sinbá moiko umuran motusi, sin akuoi naa in motusi.

IMAMAT 19:2

mopotaau kon bangusa Israel in parenta tanaa, “Moiko in musti motusi, sin Akuoi ki Tuhan Allahmu in motusi.

IMAMAT 20:24

Butá inta nooyúon bo mopia tatua aindon pinodandi-Ku kon i monimu, dá ogoi-Kubí intua mobaḻí kapunyaanmu. Akuoi in ki Tuhan Allahmu inta nopotondí kon i monimu nongkon bangusa mita ibanea.

IMAMAT 20:7

Ḷukadai sinbá moiko umuran motusi, sin Akuoi in ki Tuhan Allahmu.

IMAMAT 20:8

Duduiaidon in hukum-Ku mita, sin Akuoi in ki Tuhan inta ain nopotondí kon i monimu sin mobaḻí mogogundoi-Ku.”

ULANGAN 14:2

Moiko nion in kapunyaan i Tuhan Allahmu; nongkon bayongan in bangusa kon dunia naa, moikobí nion inta piniḻí i Allah nobaḻí umat-Nea.”

ULANGAN 7:6

Aidaidon in tua komintan sin moiko nion in kapunyaan i Tuhan Allahmu. Nongkon bayongan bangusa kon dunia naa, moikobí nion inta piniḻí i Tuhan Allahmu mobaḻí umat inta sinondí kinotabi-Nea.

TITUS 2:14

Sia tuata inta ain noposarakan in awak-Nea sin mopoḷuat kon i naton nongkon bayongan inta moraat, bo kita in baḻíon-Nea tobatú umat inta noiḷuatdon nongkon kawasa in dosa bo tongádon mobaḻí umat-Nea inta morajing mogaid kon inta mopia.

YOSUA 24:19

Bo ki Yosua noguman, “Táe moiko in dikabo diá mokosanggup mogundoi kon i Tuhan, sin Sia tua in ki Allah inta mokudus, bo tongábí Sia in ki Tuhan. Sia in doíbí toḻinduaan. Aka moiko monaḷámai kon i-Nia bo mogundoi kon ilah mita ibanea, diá bidon ampungan-Nea in dosamu, sedang bo ḷawangon bo hukumon-Neabí in moiko. Yompaton-Neabí in moiko, umpakabí koḻipod in mopia in Sia kon inimu.”

WAHYU 3:7

“Paisdon kon malaekat in jamaat kon Piladelpia nanaa: Naadon in koyow nongkon i-Nia inta Mokudus, Inta Mobanar bo ki Inta nokadai kon kokunsi i Daud; Aka Sia in mobuká yo diábí tobatúmai in mokoḻingkop; bo aka ḻingkopan-Nea, yo diábí doman tobatúmai in mokobuká.

WAHYU 4:8

Mahaḷuk opat tatua komintan onom in koḻikipnea, kon ḻibunea bo kon dotá in bonunea nopuḻing in mata. Doḷom singgai mahaḷuk mita tatua diá mogoga-gogai in modondong nanaa: “Kudus, kudus, mokudusdon in ki Tuhan, Allah Inta Totok Mokawasa; inta oyúon, inta koyongandon oyúon, bo inta umuranbí oyúon.”