IMAMAT 19:10 - Alkitab Singog In Mongondow Masa In Tanaa

¹⁰ Dika mobui mayá in gobá in anggurmu sin mosipú bui kon bungai in anggur inta kinotaḷáan naonda in moiko nopaḷutdon nosipú muna. Ná doman tua bungainea mita inta ain noḷabú dikadon puyuton monimu. Pomayádon mako intua gamáan in intau mita nongobogá bo intau ango-angoi. Akuoi naa in ki Tuhan Allahmu.

IMAMAT 19:10 ပူးပေါင်းရင်းမြစ်များ

YESAYA 17:6

Naonda bo pangkoi in zaitun inta bagu sinipú in bungainea, bo dongkadon tongonumai in kon ḷuntung mita in tanganea, natua doman in Israel tongábí topiḻik in intau in mosaḷamat. Akuoi, ki Tuhan, Allah in Israel, ain noguman.”

YESAYA 24:13

Tuata in mobaḻí kon sinangkub in dunia kon batúan in bangusa. Notongkai ná kon sempo in posipunan kon bungai in boyó, kon dodai in bungai in zaitun ginamá nodapot in nodait bo bungai in anggur inta imbuitnea sinipú nongkon pangkoinea.

YEREMIA 49:9

Aka intau mosipú kon bungai in anggur, tantúbí oyúon in tonggagatannea, bo aka mononakow mamangoi doḷom, tongábí onu in koibognea tua in gamáannea.

IMAMAT 11:44

Akuoi naa in ki Tuhan Allahmu, tuamai ḷukadaidon sinbá moiko umuran motusi, sin akuoi naa in motusi.

IMAMAT 19:11

Dika monakow, monombodok ande monguboḷ.

IMAMAT 19:25

Bain kon taong noginḻima bo motaaudon moiko mokaan kon bungainea. Aka duduian monimu in bayongan atorang tatua, yo bayongan pangkoi in ayopmu modugangdon modatog in bungainea. Akuoi in ki Tuhan Allahmu.

IMAMAT 19:9

Aka moiko mobatundon kon boyó, dikadon ratabon monimu in gandum inta nobiag kon bingkí mita in gobámu, bo dikadon mobui mayá mopuyut kon gandum inta kinotaḷáan kon dodai in pinorataban.

IMAMAT 23:22

Aka moiko monoḻisídon kon bungai in boyó, dikadon ratabon monimu in gandum inta nobiag kon bingkí mita in gobámu bo dikadon mobui mayá mopuyut kon inta kinotaḷáan kon pinokoyutan. Pomayádon mako intua kon intau mita inta nobiag nobogá bo kon intau ango-angoi. Ki Tuhan in ki Allahmu.

IMAMAT 25:6

Umpaka natua, yo butá tatua in mobogoibí doman in boyó inta baḻíon kaanon kon i monimu, kon atamu mita, kon intau mita inta sinondananmu, bo intau mita ango-angoi inta nogutun takin i monimu.

OBAJA 1:5

Mononakow andeka mogogagow inta mamangoi doḷom, tongábí mogamá kon onu in koibognea. Intau inta mosipú kon anggur kon gobá, umuranbí mononggagat kon tongonumai in bungainea. Táe iko in modaitbí yopúon in musungmu mita.

MIKHA 7:1

Mobodito in akuoi! Akuoi in nádon intau ginogoi inta minayá nosipú naonda in nopaḷut mako in sempo in pinosipúan. Diá bidon in bungai in ayop kon pangkoinea. Bungai in anggur bo bungai in ara inta mongopia nodaitdon komintan sinipú.

ULANGAN 24:19

Aka moiko mosipundon kon bungai in boyómu, dikabí in moiko mobui sin mopuyut kon gandum inta kinotaḷáan. Gandum tatua in mustibí pomayádon mako kon intau ango-angoi, adí uno-unon bo intau inta dongkadon boba-bobay, sinbá moiko barakatan i Tuhan Allahmu kon bayongan oaidanmu.

ULANGAN 24:20

Naonda in moiko komintandon mosipú kon bungai in zaitun bo bungai in anggurmu, dikabí mobui sin mosipun kon bungainea mita inta kinotaḷáan. Tua in mustibí pomayá mako monimu kon intau ango-angoi, kon adí uno-unon bo kon intau inta dongkadon boba-bobay.

HAKIM MITA 8:2

Táe ki Gideon in notubag, “Onu in pinomiaku diábí totok in moḷoben in mangaḻenea aka poyobandingonmai in onu inta ain pinomia monimu. Umpaka inta pinomia monimu tua tongá topiḻik, táe inta topiḻikbí tua in moḷobe-ḷoben in mangaḻenea nongkon bayongan inta ain inaidan in tontara nongkon inanakanku.

RUT 2:2

Kon singgai tobatú ki Rut noguman kon i Naomi, “Iná, ogoipa in akuoi mayá in gobá mopuyut kon gandum inta degá nopipik ande kinotaḷáan in mokokoyut mita. Rasaanku in oyúonbí in intau motabi bo mopomayá mako kon inakó mopuyut kon tua.” “Mopia, uḻe!” tubag i Naomi, “bayádon!”