IMAMAT 17:15 - Alkitab Singog In Mongondow Masa In Tanaa

¹⁵ Pomuḷoi in intau Israel ande intau ango-angoi inta mokaan kon tapú in mahaḷuk inta minatoi tontaní ande minatoi sin dinomok in mahaḷuk ibanea, yo musti momatá kon pakeangnea poḷat moinggú bo oḷatonnea dapot in mata in singgai tumoyop, bain tua bo sia mobaḻí modarit.

IMAMAT 17:15 ပူးပေါင်းရင်းမြစ်များ

IḶUAIAN 22:30

ná doman tua in sapi bo domba koḷakian inta muna pinogadí. Pomayádon mako in mahaḷuk mita tatua takinpa ki inánea kon bonu in pitu nosinggai koonggotnea, bodongka posarakandon kon i-Nakó kon singgai noginwaḷu.

IḶUAIAN 22:31

Moiko in umat-Ku, tuamai mahaḷuk onukadon in dinomok in mahaḷuk ibanea inta mokokaan kon tumpaḷa mahaḷuk, yo diábí motaau kaanon monimu in tapúnea; ogoidon intua kon ungkú mita.”

YEHEZKIEL 4:14

Táe akuoi in notubag, “Kaasí Tuhan Inta Totok in moḷantud! Pinangkoipamai kon mointokan nodapot in tanaa, diápa kon dodai in onda in akuoi in noponajis in awakku pinongin nokaan kon mahaḷuk inta minatoi andeka ki agat in mahaḷuk inta mokokaan kon mahaḷuk ibanea. Diábí kon dodai in onda in akuoi in nokaan kon kaanon inta iharam.”

YEHEZKIEL 44:31

Ḷagapan bo mahaḷuk mita ibanea inta minatoi mako natua, andeka inta dinomok in mahaḷuk moraat, diábí motaau in kaanon in imang mita.”

IMAMAT 11:24

Intau tobatú mobaḻí monajis modapot in mata in singgai tumoyop aka sia moḻiai kon mahaḷuk tanaa aka matoidon: Mahaḷuk inta kokonukuan, koḻikudbí in konukunea nosilai bo umuran mongongguyom, bo mahaḷuk inta sioḷnea opat bo kokonukuan. Ki ine in modia kon mahaḷuk natua inta ain minatoi, yo intau tatua musti momatá kon pakeangnea, táe sia tua in umuranpabí nonajis modapot kon mata in singgai tumoyop.

IMAMAT 11:31

Ki ine in moḻiai kon mahaḷuk tatua kon wakutu in mahaḷuk tatua kobia-biagpa ande minatoidon yo intau tatua in nonajisdon modapot kon mata in singgai tumoyopdon.

IMAMAT 11:32

Aka mahaḷuk tatua minatoidon bo moḷabú kon barang tobatú, dá barang tatua mobaḻí monajis. Barangkabí onu in koḷabúannea, pinomayá nongkon kayu, kaeng, kuḻit ande kaeng sosapi, bo pinakékabí pinongonu in barang tatua. Barang tatua in mustibí tagomonpa muna kon bonu in tubig, táe umuranbí doman monajis modapot kon mata in singgai tumoyop.

IMAMAT 11:39

Ki ine in moḻiai kon awak in mahaḷuk halal inta ain minatoi yo sia in nonajisdon modapot kon mata in singgai tumoyop.

IMAMAT 11:40

Intau inta nodia ande nokaan kon tapú in mahaḷuk inta minatoi tatua mustibí momatá kon pakeangnea, táe sia in umuranbí nonajis modapot kon mata in singgai tumoyop.

IMAMAT 15:10

Ki ineka in moḻiai kon inta ain iḻitúan in intau tatua, mobaḻí doman monajis modapot kon mata in singgai tumoyop. Bayongan intau inta mobingkat kon barang tatua musti momatá kon pakeangnea bo moinggú, bo sia tontaní in monajispabí doman modapot kon mata in singgai tumoyop.

IMAMAT 15:21

Ki ine in moḻiai kon tampat inta ain pinosiugan ande iḻitúan in bobay inta inangoinea tatua, mustibí momatá kon pakeangnea bo moinggú, bo sia monajis modapot kon mata in singgai tumoyop.

IMAMAT 15:5

Ki ine in moḻiai kon intau oyúon in ḷumoḷayat tatua ande moḻiai kon pinosiugannea, ande ḻimitú kon tampat inta ain iḻitúannea ande dinuyáan in intau tatua, yo musti in sia momatá kon pakeangnea bo moinggú, táe sia monajispabí modapot kon mata in singgai tumoyopdon.

IMAMAT 22:8

Sia in diábí motaau mokaan kon tapú in mahaḷuk inta minatoi tontaní ande minatoi sin dinomok in mahaḷuk ibanea. Aka sia mokaan, dá sia in mobaḻí monajis. Akuoi in ki Tuhan.

IMAMAT 7:24

Ḷongó in mahaḷuk inta minatoi monag naníon ande dinomok in mahaḷuk moraat ibanea, diábí motaau in kaanon táe motaaubí in pakéon kon kaparaḷuan ibanea.

PINOGIAPAN 19:19

Musti in sia momisik kon singgai nogintoḷu bo kon singgai noginpitu. Kon singgai noginpitu tatua nopaḷutdon in upacara ponusian kon intau inta nonajis tatua. Intau tatua musti momatá kon pakeangnea bo moinggú. Pangkoion kon tumoyop mata in singgai sia in modaritdon.

PINOGIAPAN 19:21

Atorang tatua umuran pakéon modapot kon adí bo ompu. Intau inta mopopisik in tubig upacara tatua musti doman momatá kon pakeangnea, bo intau inta kinotugatan in tubig tatua mobaḻí monajis modapot in mata in singgai tumoyop.

PINOGIAPAN 19:8

Intau inta notubá kon sapi tatua in musti doman momatá kon pakeangnea bo poḷat doman moinggú; bo sia doman in umuranpabí doman monajis modapot kon mata in singgai tumoyop.

ULANGAN 14:21

Mahaḷuk inta minatoi mako naníon diábí motaau in kaanon monimu, táe motaaubí in kaanon in intau mita ango-angoi inta nogutun kon yua-yuak monimu, ande potaḷui kon bangusa ibanea. Moiko nion in umat inta ain piniḻí kon i Tuhan Allahmu. Tapú in adí in domba ande adí in bembé diábí motaau in poyodungúon takin tubig in teté i indenea.”

WAHYU 7:14

Dá tubagku kon inia: “Diábí kinotaauanku, ki Tuangbí in nonotaau kon tua.” Dá sia in noguman bui kon inakó: “Mosia naa in intau mita inta nosaḷamatdon nongkon roriga inta moḷoben, bo ain binatáan monia kinobudó in jubah monia kon bonu in dugú i Adí in Domba tatua.