IMAMAT 16:18 - Alkitab Singog In Mongondow Masa In Tanaa

¹⁸ ki Harun musti ḷumuai bo mayá kon mezbah in kuruban tubáan sin mondarit kon mezbah tatua. Sia in musti mogamá kon dugú in sapi topiḻik bo dugú in bembé bo poḻeponea kon tungoi mita inta kon siku in mezbah.

IMAMAT 16:18 ပူးပေါင်းရင်းမြစ်များ

IḶUAIAN 30:10

Komintan in totaong ki Harun musti mogaid kon upacara pondaritan kon mezbah takin mopopisik kon tungoi opat in dugú in biag inta pinokuruban sin pongampungan kon dosa. Tua in musti pomiaan pomuḷoi in taong dapot kon adí bo ompu. Mezbah tatua musti motusi komintan bo tongábí kon i-Nakó.”

YEHEZKIEL 43:20

Gamádon in dugúnea topiḻik bo popoḻepo kon tungoi mita inta kon siku mita in mezbah tatua, bo kon sikunea opat inta kon dotá in bonunea takin doman sí in mezbah inta noiḻibu. Natuata in pogogaidmu mopotusi in mezbah tatua bo tondíonmudon kon i-Nakó.

YEHEZKIEL 43:22

Mopoikoḷomai kon singgai iko in musti moposumba in bembé koḷakian tobatú inta diá in bogitnea mobaḻí kuruban potobut kon dosa. Potusidon in mezbah tatua takin dugú in bembé, ná pinogogaidmu kon dugú in sapi koḷakian batánea tatua.

YEHEZKIEL 45:19

Imang in mustibí mogamá kon dugú in kuruban potobut kon dosa tatua, bodongka popoḻepo kon oigi mita in ngara in Baḷoi-Ku, bo kon siku doman opat in mezbah, bo kon oigi mita in bonawang inta nopobayá ná dangkuḷon kon bonunea.

IMAMAT 16:16

Natuata in pogogaid aka mondarit kon Yuang Totok Motusi nongkon kinonajisan in bangusa Israel bo bayongan dosa monia. Ḷoḷaigan i Tuhan musti daritan sin noitoyuak kon ḷoḷaigan in bangusa Israel bo kinotugatan in kinonajisan monia.

IMAMAT 16:17

Pinangkoi kon dodai in ki Harun tumuot kon Yuang Totok Motusi sin momia kon upacara pondaritan modapot in sia ḷumuai, diá tobatúmai in motaau kon bonu in Ḷoḷaigan tatua. Naonda in mopaḷut mako in sia momia kon upacara potobutan kon dosanea bo kon tombonu in baḷoinea bo dosa in bayongan bangusa Israel,

IMAMAT 4:18

Tongosilai doman in dugú tatua musti poḻepo kon tungoi mita inta kon siku in mezbah pototubáan kon dupa kon bonu in Ḷoḷaigan, bo kiagatnea in musti popobutak kon datoḷan in mezbah tampat in kuruban tubáan inta kon tayowon ngara in Ḷoḷaigan.

IMAMAT 4:25

Imang musti mopoḷodok in gongguyamúnea kon bonu in dugú in mahaḷuk tatua bodongka poḻeponea kon tungoi mita kon siku in mezbah bo ki agatnea pobutak kon datoḷan in mezbah.

IMAMAT 4:7

Tongosilai nongkon dugú tatua musti poḻepo kon tungoi mita inta kon siku mita in mezbah in dupa mobondu kon bonu in Ḷoḷaigan, bo kiagatnea kon tua in musti popobutak kon taḷog in mezbah in kuruban tubáan inta kon tayowon in ḷoḻingkop in Ḷoḷaigan.

PINOGIAPAN 28:22

Posumba domandon in bembé koḷakian tobatú inta baḻíon kuruban potobut kon dosa. Natuata in pogogaid monimu kon upacara potobutan kon dosa in umat.

YOHANES 17:19

Popisí in kopontingan monia, Akuoi in noposarakandon in awak-Ku saḷaku kapunyaan i Amá sinbá mosia in tongá doman mobaḻí kapunyaan-Ku pongin inta nobanar nongkon i Amá.

IBRANI 2:11

Ki Yesus in nondarit kon bayongan in dosa intau; siabí tontaní in nondarit. Mosia inta dinaritandon tua in nogaḷumdon kon Amá inta totobatú. Tuamai in ki Yesus diá mooyá in mongaku kon i monia saḷaku ki utat-Nea mita.