IMAMAT 14:21 - Alkitab Singog In Mongondow Masa In Tanaa

²¹ Aka intau tatua nobiag nobogá bo diá mokopooyúon, dá mobaḻí kuruban toḻiu in karugian tatua motaaubí in sia modia kon ki adí in domba tobatú sin baḻíonnea kuruban tonoion kon i Tuhan. Koḻikud intua topong doman tokilo inta ain binauian in ḷana zaitun sin baḻíon kuruban oḷudon, bo ḷomboi monag in liter in ḷana zaitun.

IMAMAT 14:21 ပူးပေါင်းရင်းမြစ်များ

AYUB 34:19

Sia in doíbí dumotá kon datu mita, andeka mopouna in intau nooyúon nongkon intau nobogá. Sin mosia komintan in Siabí in nomaḻí.

AMSAL 17:5

Ki ine in moningkuḻe kon intau bogá yo mopoompábímai kon i Allah inta nomaḻí kon inia. Ki ine in mosanang in gina kon koboditoan in intau, yo notantúbí kon mokouḻí kon hukuman.

AMSAL 22:2

Intau nooyúon bo intau nobogá oyúon in notongkai kon monia: Ki Tuhanbí in nomaḻí kon i monia komintan.

YEHEZKIEL 46:7

Poyotakinon in batúan sapi koḷakian bo bembé koḷakian, musti doman in sia moposumba in gandum mopuḷú bo pitu bo tobotak noliter, bo poyotakinon in batúan in adí in domba, tongonukabí podudui in koibognea. Pomuḷoi in kuruban gandum musti takinan in sosumba ḷana zaitun toḷu noliter.

IMAMAT 1:14

Aka inta pinosumba tatua bo ḷagapan tobatú, dá musti ḷagapan tarangkuku ande ḷagapan paḷoma inta moḻineapa.

IMAMAT 12:8

Aka bobay tatua diá mokopooyúon kon ki adí in domba tobatú, dá sia in mustidon modia kon ḷagapan paḷoma doyowa inta noguodpa ande ḷagapan tarangkuku inta moḻineapa doman: tobatú in aidan kuruban tubáan bo inta tobatú in aidan kuruban potobut kon dosa. Imang musti mogaid kon upacara pondaritan kon inta monajis kon bobay tatua, dá bobay tatua in modaritdon.

IMAMAT 14:10

Kon singgai noginwaḷu intau tatua musti modia kon ki adí in domba koḷakian doyowa bo ki adí in domba kobaayan tobatú inta umurdon totaong inta totok in mopia. Koḻikud intua doman topong toḷu nokilo inta ain binauian in ḷana zaitun noyoḷomboi monag in liter.

IMAMAT 14:22

Sia musti doman modia kon ḷagapan paḷoma doyowa inta moḻinea ande moḻi in tarangkuku: tobatú in baḻíon kuruban potobut kon dosa bo inta tobatú doman in baḻíon kuruban tubáan.

IMAMAT 27:8

Aka intau inta ain nodandi tatua diá mokosanggup moguboḻi kon boḻi inta ain sinantú tua, dá sia musti modia kon intau inta ain pinosumba kon i Tuhan tua pobayá kon i imang. Ki imang musti monantú kon boḻi inta moona-onag podudui in komampuan intau tatua.

IMAMAT 5:11

Aka intau inta kotaḷá tatua diá mokopooyúon in ḷagapan tarangkuku togapang ande ḷagapan paḷoma mobaḻí kuruban potobut kon dosa, dá sia in musti modia kon topong tokilo. Topong tatua diábí motaau in bauian in ḷana zaitun ande takinan in kamania, sin kuruban tatua in kurubanbí potobut kon dosa deemanbí kuruban oḷudon.

IMAMAT 5:7

Táe aka intau inta kotaḷá tatua diá mokopooyúon kon domba ande bembé sin potobut kon dosanea, dá sia in mustidon modia kon ḷagapan tarangkuku togapang ande ḷagapan paḷoma moḻinea, tobatú in baḻíon kuruban potobut kon dosa, bo tobatú in baḻíon kuruban inta tubáan.

LUKAS 6:20

Ki Yesus inimindoi kon dumodudui-Nea mita bo nosingog nanaa, “Pia in kamang in moiko, intau mita inta nobogá, sin moiko nion in umat i Allah!

KORINTUS 2 8:12

Aka gina monimu bo motuḻidbí in mobogoi, dá tarimaanbí i Allah onu inta inogoi monimu tua, asaḷ bo onu inta inogoi monimu tua, pinodoyon kon onu inta oyúon kon i monimu, deemanbí pinodoyon kon onu inta diá in kon i monimu.

KORINTUS 2 8:9

Sin moiko in totokdon in nonotaau kon kita in totokbí in kinotabi i Yesus Kristus, Tuhan naton. Sia in nooyúonbí, táe sinumon intau bogá sin lantaranbí moiko, sinbá moiko in mobaḻí mooyúon.

SAMUEL 1 2:8

Nongkon roriga binuat-Nea in intau inta diá koonu bo onu, nongkon roriga pinoḷuat-Neadon in intau inta mokooyá. Mosia in binaḻí-Nea yobayat in intau mita moḷoben, bo inogoian in tangoi moḷantud. Aip in butá naa ki Tuhanbí in kitogi, kon ḻimonikannea pinosindog-Nea in dunia.