IMAMAT 12:7 - Alkitab Singog In Mongondow Masa In Tanaa

⁷ Ki imang musti moposumba in sosumba in bobay tatua kon i Tuhan bo mogaid kon upacara sin pondaritan kon inta monajis kon bobay tatua, dá bobay tatua in modaritdon. Tuata inta musti aidan in bobay naonda in mopaḷut mako mononggadí in sia.

IMAMAT 12:7 ပူးပေါင်းရင်းမြစ်များ

AYUB 1:5

Mopaḷut mako in bobutungan, ki Ayub in tantú mobangon doḷo-doḷom bo moposumba in kuruban ponukid kon batúan in adínea sinbá ampungan i Tuhan. Sin kon raian i Ayub, dika-dikabo ki adínea mita ain noiaid kon dosa bo noiḷautdon nokopoompámai kon i Allah takin diá sinuod.

AYUB 14:4

Motaau degá in intau baradosa mokopoangoi kon inta motompod?

IMAMAT 1:4

Bo sia in musti mopoukat in ḻimanea kon uḷu in biag tatua, dá sosumbanea in tarimaan i Tuhan mobaḻí pongampung kon dosanea.

IMAMAT 12:6

Naonda in wakutu pondaritan mopaḷutdon, pinomayá in sia nopononggadí in adí ḷoḷaki ande adí bobay, bobay tatua musti modia kon sosumbanea kon i imang kon tayowon ngara in Ḷoḷaigan i Tuhan. Sosumba tatua in ná batangan ki adí in domba tobatú inta umurdon totaong sin pomiaan kuruban inta tubáan, bo togapang doman in ḷagapan paḷoma inta baḻíon kuruban potobut kon dosa.

IMAMAT 12:8

Aka bobay tatua diá mokopooyúon kon ki adí in domba tobatú, dá sia in mustidon modia kon ḷagapan paḷoma doyowa inta noguodpa ande ḷagapan tarangkuku inta moḻineapa doman: tobatú in aidan kuruban tubáan bo inta tobatú in aidan kuruban potobut kon dosa. Imang musti mogaid kon upacara pondaritan kon inta monajis kon bobay tatua, dá bobay tatua in modaritdon.

IMAMAT 15:15

Ki imang musti moposumba in ḷagapan tobatú mobaḻí kuruban potobut kon dosa, bo inta tobatú in baḻíon kuruban tubáan. Natuata in pogogaid i imang kon upacara pondaritan kon intau tatua kon tayowon i Tuhan.

IMAMAT 4:20

Aidan naonda bo pogogaid kon sosumba sapi koḷakian inta nobaḻí kuruban pongampung kon dosa. Natuata in pogogaid in Imang Moḷoben moposumba in kuruban sin potobut kon dosa mita in umat, dá dosa mita tatua in ampungandon i Tuhan.

IMAMAT 4:26

Onda intua bayongan ḷongó in mahaḷuk tatua musti tubáan kon tudu in mezbah, ná kuruban dodamean. Natuata in pogogaid i imang kon moposumba in kuruban in tobatú bobato, dá intau tatua in ampungan i Tuhan.

IMAMAT 4:31

Bayongan ḷongó in mahaḷuk tatua musti gamáan ná kon kuruban dodamean. Ḷongó tatua musti tubáan in imang kon tudu in mezbah, sinbá ronginginea mokosanang kon gina i Tuhan. Natuata in pogogaid i imang moposumba in kuruban potobut kon dosa in intau biasa tobatú, dá intau tatua in ampungan i Tuhan.

IMAMAT 4:35

Onda intua bayongan ḷongó in mahaḷuk tatua musti gamáan ná kon kuruban dodamean. Ḷongó tatua musti tubáan kon tudu in mezbah, poyotakinon in kuruban kaanon inta posumba kon i Tuhan. Natua in pogogaid i imang kon moposumba in kuruban potobut kon dosa in intau tatua, dá sia in ampungan i Tuhan.

SURAT I PAULUS KON JAMAAT RUM 3:23

Intau in komintan bidon binaradosa bo noyayúdon kon i Allah inta moposaḷamat kon i monia.

SURAT I PAULUS KON JAMAAT RUM 3:26

Táe tanaa in hukumon-Neabí ki ine in mogaid kon inta diá mopia sin moponiata kon moadilbí in Sia. Aid-Nea tatua in moponiatabí kon Sia tua in totu-totuubí mobanar; bo pomuḷoi intau inta mopirisaya kon i Yesus, pinoniata-Neadon saḷaku intau inta ain noyopia bui takin i Allah.

KORINTUS 1 7:14

Tantú ḷoḷaki tatua in motaaubí mobaḻí umat i Allah sin aindon notonibuḷoi takin intau inta ain nobaḻí umat i Allah. Natua doman in buḷoi bobay, tantú motaau bidon doman mobaḻí umat i Allah sin ain notonibuḷoi in intau inta ain nobaḻí umat i Allah. Sin aka diá natua, yo tantú ki adí mita monia in naonda bo ki adí mita in intau inta diá nonotaau kon i Allah, táe aka duduian monimu in tongginaku naa, yo ki adí mita monimu tua in mobaḻí bidon umat i Allah.

GALATIA 3:28

Tuamai intau in Yahudi andeka intau in Yunani, diá bidon in yoposinea bo diábí domandon in sinangoian ata andeka intau nobebas, ḷoḷaki andeka bobay. Moiko komintan ain bidon notobatú takin i Kristus Yesus.