IMAMAT 11:40 - Alkitab Singog In Mongondow Masa In Tanaa

⁴⁰ Intau inta nodia ande nokaan kon tapú in mahaḷuk inta minatoi tatua mustibí momatá kon pakeangnea, táe sia in umuranbí nonajis modapot kon mata in singgai tumoyop.

IMAMAT 11:40 ပူးပေါင်းရင်းမြစ်များ

IḶUAIAN 22:31

Moiko in umat-Ku, tuamai mahaḷuk onukadon in dinomok in mahaḷuk ibanea inta mokokaan kon tumpaḷa mahaḷuk, yo diábí motaau kaanon monimu in tapúnea; ogoidon intua kon ungkú mita.”

YESAYA 1:16

Daritaidon in awakmu kodariton totok. Gogaiai in bayongan inta moraat inta inaidan monimu tua. Dikadon bui mogaid kon inta moraat,

YEHEZKIEL 36:25

Mopaḷut mako kon tua moiko in pisikan-Ku in tubig inta mosilang, sinbá modaritdon nongkon bayongan in berhalamu bo nongkon bayongan yagi-yagi inta ain nokokotor kon i monimu.

YEHEZKIEL 4:14

Táe akuoi in notubag, “Kaasí Tuhan Inta Totok in moḷantud! Pinangkoipamai kon mointokan nodapot in tanaa, diápa kon dodai in onda in akuoi in noponajis in awakku pinongin nokaan kon mahaḷuk inta minatoi andeka ki agat in mahaḷuk inta mokokaan kon mahaḷuk ibanea. Diábí kon dodai in onda in akuoi in nokaan kon kaanon inta iharam.”

YEHEZKIEL 44:31

Ḷagapan bo mahaḷuk mita ibanea inta minatoi mako natua, andeka inta dinomok in mahaḷuk moraat, diábí motaau in kaanon in imang mita.”

IMAMAT 11:39

Ki ine in moḻiai kon awak in mahaḷuk halal inta ain minatoi yo sia in nonajisdon modapot kon mata in singgai tumoyop.

IMAMAT 14:46

Intau inta sinumuot kon baḷoi tatua kon dodai in iḻingkopan, yo intau tatua nonajisdon nodapot kon mata in singgai tumoyop.

IMAMAT 15:15

Ki imang musti moposumba in ḷagapan tobatú mobaḻí kuruban potobut kon dosa, bo inta tobatú in baḻíon kuruban tubáan. Natuata in pogogaid i imang kon upacara pondaritan kon intau tatua kon tayowon i Tuhan.

IMAMAT 15:27

Ki ine in moḻiai kon tampat tatua mobaḻí doman monajis. Sia musti momatá kon pakeangnea bo moinggú, bo sia in monajispabí modapot mata in singgai tumoyop.

IMAMAT 16:26

Intau inta momuḻi kon bembé kon i Azazel kon padang gurun musti momatá kon pakeangnea bo moinggú kon dodai in sia diápa mobui kon ḷoḷaigan.

IMAMAT 16:28

Intau inta motubá kon tua musti momatá kon pakeangnea bo moinggú kon dodai in sia diápa mobui kon ḷoḷaigan.

IMAMAT 22:6

Imang tobatú inta ain nobaḻí nonajis popisí in kinotugatan tatua, sia in umuran monajis modapot kon mata in singgai tumoyop. Bo naonda mata in singgai tumoyop sia in diápabí motaau mokaan kon kaanon inta pinosumba kon i Tuhan aka diápa muna moinggú in sia.

IMAMAT 22:8

Sia in diábí motaau mokaan kon tapú in mahaḷuk inta minatoi tontaní ande minatoi sin dinomok in mahaḷuk ibanea. Aka sia mokaan, dá sia in mobaḻí monajis. Akuoi in ki Tuhan.

ZAKHARIA 13:1

Ki Tuhan Inta Totok in mokawasa in noguman, “Kon singgai tatua momukábí bokaká tobatú sin mopotusi kon buí i Daud bo intau inta nogutun kon Yerusalem nongkon bayongan in dosa bo posumbaan kon berhala inta ain inaidan monia.

PINOGIAPAN 19:19

Musti in sia momisik kon singgai nogintoḷu bo kon singgai noginpitu. Kon singgai noginpitu tatua nopaḷutdon in upacara ponusian kon intau inta nonajis tatua. Intau tatua musti momatá kon pakeangnea bo moinggú. Pangkoion kon tumoyop mata in singgai sia in modaritdon.

KORINTUS 1 10:21

Moiko in diábí motaau in monginum kon palo in anggur pongonginuman i Tuhan, bo monginum doman kon palo pongonginuman in dimukud mita moraat. Natua doman, moiko in diábí motaau in mongaan moyotakin i Tuhan bo mongaan doman moyotakin in dimukud moraat.

KORINTUS 1 6:11

Koḻipod oyúon in kon sigad monimu in umuran mogaid kon natua mita. Táe tanaa in poniatadon kon nodaritdon in moiko nongkon bayongan oaid inta diá mopia. Moiko in nobaḻídon umat i Allah inta piniḻí-Nea. Moiko buidon noyobayat i Allah, sin nopirisayadon kon i Tuhan Yesus Kristus bo popisí kawasa doman in Roho inta nongkon i Allah naton.

ULANGAN 14:21

Mahaḷuk inta minatoi mako naníon diábí motaau in kaanon monimu, táe motaaubí in kaanon in intau mita ango-angoi inta nogutun kon yua-yuak monimu, ande potaḷui kon bangusa ibanea. Moiko nion in umat inta ain piniḻí kon i Tuhan Allahmu. Tapú in adí in domba ande adí in bembé diábí motaau in poyodungúon takin tubig in teté i indenea.”

YOHANES 1 1:7

Táe aka kita in mobiag kon bonu in bayag ná ki Allah inta kon bonu doman in bayag, dá kita in mustibí mobiag modagin, motompia bo mositabian tobatú bo tobatú. Bo dugú i Yesus, ki Adí-Nea tua, mondarit kon i naton nongkon bayongan dosa.