IḶUAIAN 8:8 - Alkitab Singog In Mongondow Masa In Tanaa

⁸ Datu nogoiní kon i Musa bo kon i Harun, bo noguman, “Posambayangdon kon i Tuhan sinbá Sia in monginggamádon kon tumpaḷak mita tanaa, bá ogoikudon in bangusamu mayá sin moposumba in kuruban kon i Tuhan.”

IḶUAIAN 8:8 ပူးပေါင်းရင်းမြစ်များ

DATU MITA IMITÁNEA 13:6

Bo ki Datu Yerobeam nogumandon kon i nabi tatua, “Tuḷungaipa kaasí sambayangai in akuoi kon i Tuhan Allahmu. Poigumaipa kon totabi-Nea sinbá undaman-Neapa in kokaḷku!” Nosambayang in nabi tatua kon i Tuhan, bo nopiadon in kokaḷ i datu.

MAZMUR 66:3

Pogumandon kon i Allah, “Totuu mokoherang onu in inaidan-Mu! Musung tumungkud kon ini-Mu takin iḻibutan in ondok, sin totuubí moḷoben in kawasa-Mu.

IḶUAIAN 10:16

Ki Datu in ḷagidon nogoiní kon i Musa bo kon i Harun bo noguman, “Akuoi aindon dinosa kon i Tuhan Allahmu bo kon i monimu.

IḶUAIAN 10:17

Ampungaipa in dosaku in komintan tanaa, bo posambayangdon kon i Tuhan Allahmu, sinbá poḷuat-Neadon kon inakó in hukuman inta mokopatoi tanaa.”

IḶUAIAN 10:18

Ki Musa nonaḷámai kon i datu bo nosambayang kon i Tuhan.

IḶUAIAN 14:5

Naonda in ki datu in Mesir nokodongogdon kon bangusa Israel noḷaguidon, sia bo pogawainea mita inangoiandon in manasaḷ bo poḷat noguman, “Onu in pomiaan naton? Nongonu sin pomayábí mako naton intau mita Israel tatua mayá modapot in kita kobuḻiandon in ata mita?”

IḶUAIAN 32:11

Ki Musa nopoigum tabi kon i Tuhan Allahnea, kainia, “Tuhan, nongonu sin musti-Mubí aidan kon i monia in natua? Ikodon tontaní inta noposaḷamat kon i monia nongkon Mesir takin kawasa bo ropot-Mu inta moḷoben?

IḶUAIAN 5:2

“Ki ine in ki Tuhan tua?” iḻibó i datu. “Nongonu sin pandungonkubímai in Sia bo mobogoi kon bangusa Israel mayá? Diábí kinotaauanku in ki Tuhan tua, bo intau mita Israel in diábí ogoiku mayá.”

IḶUAIAN 8:15

Naonda inontongdon i datu kon tumpaḷak mita tatua minatoidon, sia nokopotontogat bui kon ginanea. Bo ná inta ain pinoguman muna i Tuhan, ki datu in doíbí mopandungmai kon tosingogon i Musa bo i Harun.

IḶUAIAN 8:29

Tubag i Musa, “Naonda in akuoi mayá, akuoi ḷagidon mosambayang kon i Tuhan sinbá ikoḷom ḷangow mita tatua monaḷámaidon kon i Tuangku, kon intau pogawai mita moḷantud i Tuang bo kon rayat mita. Táe donaaidon bui monguboḷ kon inami, bo donaaidon moḷamboi kon bangusa Israel mayá sin moposumba in kuruban kon i Tuhan.”

IḶUAIAN 8:32

Táe tanaa datu buipa doman nokopotontogat kon gina bo diádon inogoinea in bangusa tatua mayá.

IḶUAIAN 8:9

Ki Musa in notubag, “Takin sanang in gina akuoi in mosambayang sin podudui in oigum i Tuangku. Tantúdon in wakutunea, bá sambayangankudon in ki Tuang, pogawai mita moḷantud i Tuangku bo rayat. Dá tumpaḷak mita tatua in inggamáandon nongkon tayowonmu, nongkon baḷoimu, bo diádon in kiagatnea, koḻikudon inta kon Ongkag in Nil.”

IḶUAIAN 9:27

Bo datu in nogoiní kon i Musa bo kon i Harun, bo noguman, “Akuoi ain nogaid kon dosa. Ki Tuhanbí in nobanar, akuoi bo rayatku ain nogaid kon noitaḷá.

IḶUAIAN 9:28

Posambayangdon kon i Tuhan; totokdon in moyoyiga in kami popisí in gotup bo uyan eis tanaa. Pomayákudon mako in moiko mayá. Donaaidon mogutun kon naa in moiko.”

IḶUAIAN 9:33

Bo ki Musa in nonaḷámaidon kon i datu bo minayá in ḷuai in kotá; kon tua sia notonggó kon ḻimanea sin mosambayang kon i Tuhan. Kon dodaipa doman tatua nogogaidon in gotup, uyan eis bo diádon nonguyan.

PINOGIAPAN 21:7

Bo bangusa tatua namangoi kon tayowon i Musa bo noguman, “Binaradosadon in kami sin ain nongunsingog kon i Tuhan bo kon inimu. Posambayangpa kon i Tuhan sinbá uḷag mita tanaa poyayúdon kon inami.” Dá sinambayangandon i Musa in bangusa tatua.

OUMAN IN RASUL MITA 8:24

Dá ki Simon in noguman kon i Petrus bo kon i Yohanes, “Dá aka natua yo tuḷungaipa poigum kon i Tuhan sinbá diá tobatúmai in siningog monimu nion in mobaḻí kon i nakó.”

SAMUEL 1 12:19

Bo nogumandon in mosia kon i Samuel, “Tuḷungaipa, Amá, posambayangaipa in kami kon i Tuhan Allahmu, sinbá diá in kami matoi. Tanaa in kinotaauandon nami kon koḻikud in dosa nami koḻipod, kami in dinosadon bui sin kami ain noigum kon datu tobatú.”