IḶUAIAN 32:6 - Alkitab Singog In Mongondow Masa In Tanaa

⁶ Nopoikoḷomai kon singgai doḷo-doḷompa totok, intau mita Israel nodia kon tongonumai in biag sin baḻíon kuruban inta tubáan, bo tongonumai doman in biag inta mobaḻí kuruban dodamean. Mosia iḻimitú nongaan bo nonginum, bo sinimindog noposanang in gina.

IḶUAIAN 32:6 ပူးပေါင်းရင်းမြစ်များ

IḶUAIAN 32:5

Bo ki Harun noposindog in mezbah tobatú kon tayowon sapi buḷawan tatua bo poḷat nopotaau, “Ikoḷom oyúon in rame sin mohoromat kon i Tuhan.”

AMOS 2:8

Kon batúan in pooibadaan, intau mita in mosiug takin mopogiḷambung in ḷambung inta ginamá monia saḷaku tontagú in boboḻian in intau bogá. Kon Baḷoi i Allah monia, mosia in nonginum kon anggur inta ginamá monia nongkon intau inta koboḻi kon i monia.

AMOS 8:10

Porameanmu mita in baḷuian-Kubí mobaḻí kopatoian, bo dondongmu mita in mobaḻí amui. Baḻíon-Kubí in moiko mongarug kon buokmu bo mopomaké in kaeng karong saḷaku tomponuot kon morobonoḷ in gina. Moiko in mobaḻíbí naonda bo ki amá bo ki iná inta nongombaḷ kon kinopatoian i adínea inta tongá totobatú. Singgai tatua in mopaḷutbí táe totok in mokorobonoḷ kon gina.”

PINOGIAPAN 25:2

Bobay mita tatua nonongganut kon i monia mayá in bobutungan kuruban sin mohoromat kon i ilah monia. Intau mita in Israel sinumakin doman nokaan kon kaanon kuruban tatua bo nosumba doman kon ilah intau in Moab.

KORINTUS 1 10:7

Bo bá diá doman in kita mosumba kon berhala, naonda bo inaidan in tongonumai intau kon sigad monia. Kon bonu in Buk Motusi in pinais nanaa, “Bo nomangkoidon in bangusa tatua nongaan bo nonginum poḷat nomanari sin mosumba kon berhala.”

WAHYU 11:10

Moḷungangabí totok gina in bayongan intau kon dunia naa in mokoontong kon mayat in sakusi doyowa tatua. Porameanbí monia in kinopatoian nayadua tua. Bo mosia mosiogoianbí in tombuinag, lantaran nabi doyowa tatua ain nopoangoi in roriga moantó kon bayongan intau kon dunia naa.