IḶUAIAN 32:14 - Alkitab Singog In Mongondow Masa In Tanaa

¹⁴ Dá ki Tuhan nomaḷuidon kon niat-Nea tatua bo diádon pinopoantugan-Nea in bangusa tatua in bodito ná inta tomayá-Nea.

IḶUAIAN 32:14 ပူးပေါင်းရင်းမြစ်များ

KINOBAḺIAN 6:6

Nomanasaḷdon in Sia nomia kon i monia bo nonampat kon i monia kon dunia naa. Totok nomanasaḷ in Sia,

SAMUEL 2 24:16

Malaekat i Tuhan inta nodia kon popatoi tatua ain noiyaput in tampat poḷoḻidokan kon gandum kapunyaan i Arauna, intau in Yebus. Naonda in inontong i Tuhan kon malaekat tatua nosadiadon moyompat kon Yerusalem, ki Tuhan in nomaḷui kon kaputusan-Nea, bo nogogaidon in Sia nohukum kon bangusa tatua. Guman-Nea kon malaekat tatua, “Tugatdon! Pogogaidon!”

TAWARIKH 1 21:15

Bo ki Tuhan in nopotabá kon malaekat tobatú sin moyopú kon Yerusalem. Táe kon dodai in malaekat tatua noidapotdon kon diug in pororipúan kon gandum i Arauna intau in Yebus, ki Tuhan nomaḷui kon kaputusan-Nea mohukum kon bangusa tatua. Noguman in Sia kon malaekat tatua, “Tugatdon! Pogogaidon!”

MAZMUR 106:23

Dá niaton i Allah yopúon in umat-Nea, táe inimaḷowan i Musa, intau inta piniḻí-Nea. Ki Musa in nobaḻí tonsigad kon i monia, dá noonow in torú i Allah.

MAZMUR 106:45

Popisí in mosia dá kinotoropan-Nea in dandi-Nea bo nonotabidon kon i monia popisí in tabi-Nea inta moḷoben.

IḶUAIAN 33:13

Aka natua, dá potaaudon kon inakó onu in tomayá-Mu, Tuhan, sinbá akuoi in motaau mogaid kon oaidan-Mu bo umuran moposanang kon gina-Mu. Torop domandon kon bangusa tanaa ain piniḻí-Mu nobaḻí kapunyaan-Mu.”

YEREMIA 18:8

bo bangusa tatua in mogogaidon nongkon dosanea, dá Akuoi in monginggamádon kon niat-Ku tatua.

YEREMIA 26:13

Tuamai in baḷuiaidon in kobobiagmu bo oaidmu mita; Duduiaidon in ki Tuhan Allahmu, sinbá pondamon-Neadon in niat-Nea mopobodito kon i monimu.

YEREMIA 26:19

Táe ki Datu Hizkia bo intau in Yohuda in diábí noḻimod kon i Mikha. Nodapotbí in noondok in ki Hizkia kon i Tuhan bo nopoigum sinbá totabion. Dá ki Tuhan in nonginggamádon kon indoyó-Nea kon mopobodito kon i monia. Bo tanaa, gogiódon in kita mopoangoi in bodito moḷoben kon inaton tontaní.”

YOËL 2:13

Bisi-bisídon in ginamu deemanbí ḷambungmu!” Pobuidon mangoi kon i Tuhan Allahmu. Sia in totuu kon mosabar bo motabi mopia in gina bo nopuḻing in tabi. Mopia in gina-Nea in mongampung bo doí mopobayá in hukuman.

AMOS 7:3

Ki Tuhan in nomaḷui kon tomayá-Nea bo noguman, “Inta inontongmu tua in diábí mobaḻí.”

AMOS 7:6

Ki Tuhan in nomaḷui kon tomayá-Nea bui bo noguman, “Naa doman in diábí mobaḻí.”

YUNUS 3:10

Inontong i Allah in aid monia; inontong-Nea kon mosia in nonaḷámaidon kon dodia monia inta moraat. Dá binaḷuian-Neadon in tomayá-Nea, bo diádon nobaḻí nohukum kon i monia.

YUNUS 4:2

Bo nosambayang in sia. “O Tuhan, aindon pinogumanku muna kon dodai in diápa nobuat nongkon baḷoiku koḻipod, kon notantúbí kon aidan-Mu in nanaa! Tuamai in akuoi bayá-bayádon noḷagui minayá in Spanyol! Kinotaauanku kon Iko in ki Allah inta totok in kototabi bo motanob, mosabar, moḷukó in dodia, bo umuranbí mosadia momaḷui kon tomayá mohukum.

PINOGIAPAN 14:20

Bo ki Tuhan notubag, “Mopia, ampungan-Ku in mosia ná inta pinoigummu.

ULANGAN 10:10

“Opat nopuḷú nosinggai bo opat nopuḷú nogobii akuoi nogutun kon tudu in buḷud ná inta inaidanku muna. Komintanpa doman inindongogan i Tuhan in oigumku, bo inóoan-Nea kon diádon moyopú kon i monimu.

ULANGAN 32:26

Akuoi in moibogdon moyopú kon i monia komintan, sinbá mosia in diádon kotoropan bui.

ULANGAN 32:36

Ki Tuhan in moposaḷamat kon umat-Nea bo motabidon kon mogogundoi-Nea mita, aka ontongon-Nea in mosia diádon kodaya bo kinodaitandon in ropot.

HAKIM MITA 2:18

Aka ki Tuhan mobogoi in itoi kon bangusa in Israel, dá ki Tuhan in umuranbí motuḷung kon itoi tatua. Bo kon dodai in itoi tatua mobiagpa, ki Tuhan in umuranbí mopoḷuat kon i monia nongkon musung mita monia. Sia in motabibí kon i monia aka kodongogan-Nea in mosia mogamui sin pogutúon ande yoyigaan.

SAMUEL 1 15:11

“Nomanasaḷdon in akuoi sin noduídon kon i Saul nobaḻí datu, sin sia in nonoḻikudon kon i-Nakó, bo doídon dinumudui kon parenta-Ku.” Noajar totok in gina i Samuel, bo kinoouputbí in doḷom sia nopoigum in totabi kon i Tuhan.