IḶUAIAN 24:6 - Alkitab Singog In Mongondow Masa In Tanaa

⁶ Tosilai nongkon dugú in sapi tatua ginamá i Musa bo binonu kon tano-tano mita. Bo tosilai doman pinopobutaknea kon tudu in mezbah.

IḶUAIAN 24:6 ပူးပေါင်းရင်းမြစ်များ

DATU MITA 2 17:15

Israel bo Yohuda in doíbí dumudui kon parenta mita i Tuhan bo diá mosatia kon dodandian inta ain pinomia-Nea takin mogoguyang monia. Diábí in pandungonmai monia in toboḷow mita táe tongábí mosumba kon berhala mita inta diá in mangaḻenea. Dá mosiadon tontaní in nobaḻí diá in mangaḻenea. Dinumudui in mosia kon oaid in bangusa mita kon diugmai monia, umpaka ain inimaḷowan i Tuhan.

MAZMUR 99:6

Ki Musa bo ki Harun noitakin doman in imang-Nea mita, ki Samuel in intau tobatú inta nosambayang kon i-Nia. Mosia in nokuani kon i Tuhan, bo sinubagan-Nea.

IḶUAIAN 12:22

Pogamádon kon hisop tobogot, poḷodok kon bonu in tano-tanó inta binonuan in dugú in domba tatua, bodongka popoḻepo kon oigi in ḷoḻingkop doyowa bo kon ḻimonik in ḷoḻingkop in baḷoimu. Modapot in doḷo-doḷom dika tobatúmai kon sigad monimu i monaḷámai kon baḷoi.

IḶUAIAN 12:7

Dugúnea topiḻik in musti poḻepo kon oigi in ḷoḻingkop doyowa bo kon ngara kon dotá in ḻimonik kon baḷoi tampat pinongaanan monia.

IḶUAIAN 24:8

Bo ki Musa in nogamá kon dugú inta binonunea kon tano-tanó tatua bo pinonabangnea kon bangusa mita tatua, takin noguman, “Dugú tanaa in nopototuu kon dodandian inta sinogot i Tuhan takin i monimu inta pinodoyon kon parenta-Nea mita.”

IḶUAIAN 29:16

Bo ratádon in biag tatua, gamá in dugúnea bo popobutak kon sí opat in mezbah.

IḶUAIAN 29:20

Bo ratádon in domba koḷakian tatua, gamá in dugúnea topiḻik bo poḻepodon kon bongoḷan koḷanan i Harun bo i adínea mita, ḻepoai doman in ki iná in ḻima bo ki iná in sioḷ monia dotá in koḷanan. Ki agat in dugú tatua musti pobutakmu kon sí opat in mezbah tatua.

YEREMIA 31:32

Táe dodandian tatua in deemanbí ná dodandian inta pinomia-Ku takin mogoguyang monia kon dodai in mosia kinapit-Ku iḻumuai nongkon Mesir. Umpaka in Akuoi naonda bo ki buḷoi monia ḷoḷaki, táe mosia in nonoḻikud kon dodandian-ku takin i monia.

IMAMAT 1:11

Intau tatua musti moratá kon biag tatua kon dotá in utuan mezbah, bo imang mita musti mopobutak in dugúnea kon sí opat in mezbah tatua.

IMAMAT 1:5

Onda intua sapi tatua musti ratáan kon tayowon ngara in Ḷoḷaigan. Dugúnea musti posumba in imang mita inta buí i Harun kon i Tuhan, bodongka popobutak kon sí mita in mezbah inta opat tatua kon tayowon ngara in Ḷoḷaigan.

IMAMAT 3:2

Intau inta moposumba intua musti mopoukat in ḻimanea kon tudu in biag tatua bodongka ratáannea kon tayowon ngara in Ḷoḷaigan i Tuhan. Imang mita buí i Harun musti mopobutak in dugú in sapi tatua kon sí opat in mezbah.

IMAMAT 3:8

Kon tua in sia bo musti mopoukat in ḻimanea kon uḷu in domba tatua bodongka ratáannea kon tayowon in Ḷoḷaigan. Bo imang musti mopobutak in dugú in domba tatua kon sí opat in mezbah.

IMAMAT 4:6

Bo sia in musti mopoḷodok in gongguyamúnea kon bonu in dugú tatua bodongka mopopisik kopitu kon tayowon in toḻipoi inta nopoyotondí in Yuang Motusi.

KORINTUS 1 11:25

Ná doman tua, naonda in nopaḷutdon mako nongaan, Sia in nogamá kon palo kobonu-bonu in anggur bo noguman, “Anggur tanaa in dodandianbí mobagu i Allah, bo dugú-Ku in mobaḻí tanda. Tuamai in pomuḷoi monginum kon nanaa, nonginumbí sin monorop kon i-Nakó.”

KOLOSE 1:20

Bo Sia doman tua inta pinaké i Allah namangoi nopoyodame kon bayongan in yagi-yagi takin-Nea, inta kon butá ande kon soroga. Tua in pinomia i Allah pinodoyon kon kinopatoian i Adí-Nea kon kayu pinoyotaḻempang.

IBRANI 12:24

Moiko in namangoi sinumayow kon i Yesus, tonsigad in dodandian inta mobagu tua; moiko in sinumayow kon dugú pinomisik inta nojamin kon soaḷ mita inta mopia-pia nongkon onu inta jinamin in dugú i Habel.

IBRANI 8:9

Deemanbí ná dodandian inta inaidan-Ku takin mogoguyang monia wakutu in mosia dinia-Ku iḷumuai nongkon butá in Mesir. Mosia in diá tantú dinumudui kon dodandian inta inaidan-Ku takin i monia; tuamai diádon pandungon-Ku in mosia.

IBRANI 9:18

Tuamai dodandian inta muna in musti dugúon sinbá mo sah.

IBRANI 9:19

Munapabí in ki Musa nopotaau in bayongan hukum i Allah kon intau mita in Israel. Onda intua sia nogamá kon dugú in ki adí in sapi bo dugú in bembé koḷakian bo binaukannea in tubig. Noiduduimai kon tua pinisikanneadon in Buk inta pinomaisan kon hukum mita inta nongkon i Allah bo bayongan intau in Israel. Sia in nomisik kon tua takin hisop bo bubuḷ in domba inta nopuya totok in batangannea.

IBRANI 9:21

Natua doman in pinomia i Musa kon ḷoḷaigan i Tuhan bo kon bayongan in pakakat inta pakéonmai kon pooibadaan, nodaitnea pinisikan in dugú tatua.

PETRUS 1 1:19

táe dugúbí inta totok in momahaḷ, tuata in dugú i Kristus inta pinodugú naonda bo dugú in ki adí in domba inta diá nobogit ande diá pinaḻi-paḻían. Sia pinokuruban kon i Allah.