IḶUAIAN 23:8 - Alkitab Singog In Mongondow Masa In Tanaa

⁸ Dika motarima kon doit inta poguboḻi monia sinbá mountung in sia kon pelekara, sin doit tatua in mokopopisí kon mata intau mosindipdon moindoi kon onu in totuu bo mokorugidon kon intau mita inta diá kotaḷá.

IḶUAIAN 23:8 ပူးပေါင်းရင်းမြစ်များ

MAZMUR 15:5

bo mopoḷuan in doit bo diá moigum kon rente; inta doí motarima kon doit pomompon kon bibig sin moporugi kon intau inta diá kotaḷá. Intau inta mogaid kon natua, umuranbí mobiag moodom.

MAZMUR 26:10

Mosia in tantúbí momia kon inta moraat, bo umuranbí mogoḷat mako kon doit posogó.

AMSAL 15:27

Ki ine in motayak kon kauntungan pongin mosindip, in morimumudbí kon motoḷuadínea tontaní. Ki ine in doí motarima kon doit pinosogó, mobiag mosanang.

AMSAL 17:23

Hakim inta diá moadil, in umuni-uni motarima kon doit posogó bo diábí in sia mopobayá in onu inta moadil.

AMSAL 17:8

Oyúon in morai kon doit sogó in mokopoangoibí kon inta mokoherang; pongin doit sogó yagi-yagi in koaidanbí.

AMSAL 19:4

Intau nooyúon, yobayatnea in umuran modugang; intau bogá taḷaanmai in yobayatnea.

MOHOHUTUBA 7:7

Aka intau mopandoi bo monguboḷ, yo nobodokdon in aidnea; aka intau bo motarima kon sogó in pelekara, yo nogoguyaatdon in raiannea.

YESAYA 1:13

Diábí in baragunanea in podiaan kon sosumbamu tatua. Doíbí in Akuoi kon bónea. Morongó in Akuoi bo diádon mokotahang in mokoontong kon i monimu monanob kon Buḷan Mobagu, singgai mita in Sabat bo singgai mita moḷoben takin poyoyodungkuḷan in agama. Bayongan tua in ain sinamakan monimu in dosamu mita bo nobaḻídon dodiaan kon i-Nakó; moḷopídon in Akuoi in mobaba kon tua.

YESAYA 1:23

Itoimu mita momomarontak bo nobaḻí ki ata in mononakow; mosia in moibog motarima kon tombuinag bo doit posogó. Mosia in doíbí moduḷu kon uno-unon kon pongadilan; doí mokidongog kon popongaduan in boba-bobay mita.

YESAYA 33:15

Moiko in mokotahangbí aka moiko in mosingog bo mogaid kon inta totuu. Dika motayak kon untung pongin momakisa mogamá kon intau bogá, bo dika motarima kon doit tondan in pelekara. Dika dumudui kon intau inta monomayá kon poḻimodan andeka aid moraat ibanea.

YESAYA 5:22

Moboditodon in moiko inta motoyang monginum kon anggur! Moiko in mobarani bo motoyang aka mopoyobauk in oinumon mokoḷoḷangu!

YESAYA 5:23

Táe tongá bá mokouḻí kon doit posogó, dá moiko in mopoḷuat kon intau kotaḷá, bo moḷamboi kon intau diá kotaḷá mokouḻí kon inta moadil.

YEHEZKIEL 22:12

Oyúon doman in nobaḻí ouboḻian moḻimod, mototayak kon kauntungan moḷoben kon intau ibanea bo mogogagow kon intau tongobangusanea. Mosia komintan nokoḻiongdon kon i-Nakó. Akuoi ki Tuhan Inta Totok in moḷantud ain nosingog.

HOSEA 4:18

Naonda in moḷoḷangu popisí in nonginum kon anggur nobayong, mosia in sumundaḷ takin pia in gina. Mosia in moibo-ibogbí singkuḻeon dika in horomaton.

AMOS 5:12

Kinotaauan-Ku kon totuudon moḷoben in aidmu moraat bo totuu mobayong in dosamu. Moiko in mondorot kon intau mopia; moiko in motarima kon sogó inta mopomayá mako kon intau bogá inta pinopoaidan in intau diá moadil kon pongadilan.

MIKHA 7:3

Komintandon mopandoi in mogaid kon inta moraat. Pojabat bo hakim moigum kon doit pompon in bibig, bo tongguḷu in intau mobayong in momakisadon kon koibognea, natuata in yopopog monia moyotakin.

ULANGAN 10:17

Ki Tuhan Allahmu noiḻimonik kon bayongan in ilah bo noiḻiu kon bayongan in kawasa. Sia in Allah inta moḷoben bo mokawasa inta musti duduian. Sia in doíbí tongá momiḻí bo doí doman Sia uboḻian.

ULANGAN 16:19

Kon bonu in mogamá kon kaputusan, mosia in diábí motaau kinotantu-tantúnea ande mobogat kon toḷosi. Mosia in diábí doman motaau motarima kon doit tondan in pelekara, sin tondan in pelekara tua in mokobilog kon intau, nodapot in intau mobijaksana bo mojujur, dá mogamádon kon kaputusan inta diá moadil.

SAMUEL 1 12:3

Tanaa in akuoi sinimindogdon kon tayowon monimu! Aka akuoi in nogaidon kon taḷá, yo potaaudon kon tayowon i Tuhan bo kon tayowon i datu inta piniḻí-Nea. Degá nokoimontandon in akuoi nogamá kon sapi andeka keledai in intau ibanea? Degá nokoimontandon in akuoi nonguboḷ andeka noposikisa andeka notarima kon doit poguboḻi kon taḷá? Pogumandon, sinbá onukabí inta ain ginamáku yo pobuionkudon bui.”

SAMUEL 1 8:3

Táe mosia in diá dinumudui kon dodia i amá monia, táe tongábí motayak kon kauntungan monia tontaní. Mosia in moibog uboḻian kon pelekara bo diá moadil in mohakim kon rayat.