IḶUAIAN 21:14 - Alkitab Singog In Mongondow Masa In Tanaa

¹⁴ Táe aka intau tatua dinapat in gina butá bo sinumuodbí noḻimod kon intau ibanea, nopaḷut mako kon tua bo noḷagui minayá in mezbah-Ku sinbá mokouḻí kon poniungan, yo intau tatua musti poḷuaion nongkon mezbah tatua bo hukumon matoi.

IḶUAIAN 21:14 ပူးပေါင်းရင်းမြစ်များ

SAMUEL 2 3:27

Naonda in ki Abner nodapotdon kon Hebron, inanutan i Yoab in sia minayá sinimí nopobayá in diug in ngara moḷoben, naonda bo oyúon in oumanon inta diá motaau kodongogan in intau ibanea. Bo daḻídon sinumbuk i Yoab kon sian in ki Abner nodapot in minatoi in sia. Ki Abner minatoi iḻimod i Yoab sin nonuḻí kon kinopatoian i ai-ainea ki Asael.

DATU MITA 2 11:15

Diá inogoi i Yoyada in ki Atalya ḻimodon kon diugmai in Baḷoi Tuhan, dá noguman in sia kon porwira mita, “Diadon in sia ḷumuai pongin pipidan in moḷoḷukad bo ḻimod in ki inekabí inta moḷongasi moposaḷamat kon inia.”

MAZMUR 19:13

Diábí in mokomangaḻe kon kinoḷaḻeannea; Tuhan, poḷuatdon in akuoi nongkon taḷá inta noibuni.

IḶUAIAN 21:15

Ki ine in momongkug kon i amá ande kon i inánea musti hukumon matoi.

AMSAL 28:17

Intau moḷoḻimod in mokorasabí kon ná umuran aḷo-aḷowan mako modapot in sia matoi; diábí tobatúmai intau in mokoḷamboi kon inia.

PINOGIAPAN 35:16

Tongá aka intau tobatú bo nopomakédon in pakakat uatoi andeka batu andeka kayu sin poḻimod kon intau ibanea, dá intau tatua in totuubí kon moḷoḻimod; sia tua in kotaḷá bo musti hukumon dapot in matoi.

ULANGAN 1:43

Pinotaauku kon i monimu in onu inta pinoguman i Tuhan, tongá doíbí in moiko nokidongog. Moiko noḷawang kon parenta i Tuhan, bo takin tagadoḷá minayá in moiko kon buḷud tatua.

ULANGAN 18:22

Aka nabi tobatú mosingog podoyon kon tangoi i Tuhan, táe onu in siningognea tua diá noniata, dá tosingogonnea tatua in deemanbí nongkon i Tuhan. Nabi tatua in mosingogbí pinodoyon kon tangoinea tontaní bo dikabí in moiko moondok kon inia.”

ULANGAN 27:24

‘Kinutuk in intau inta inumado-adop noḻimod kon intau.’ ‘Amin!’

IBRANI 10:26

Sin aka habar inta mobanar nongkon i Allah ain pinotaau kon i naton, táe umuranpa doman tumuod in kita in mogaid kon dosa, dá diá bidon in kuruban inta pomopat kon dosa naton.

PETRUS 2 2:10

torutama intau mita inta tantú dinumudui kon ibog in awak monia inta mokotor bo inta moningkuḻe kon kawasa i Allah. Ná domai tua in kobobarani monia bo koḷoḷatú in intau mita inta mongaku guru mita tatua, sahingga in diábí moondo-ondok in mosia moningkuḻe kon mahaḷuk mita in soroga inta momulia!