IḶUAIAN 19:5 - Alkitab Singog In Mongondow Masa In Tanaa

⁵ Tanaa aka moiko motoindudui kon i-Nakó bo tumoḷutui kon dodandian-Ku, moiko in baḻíon-Ku umat-Ku tontaní. Bayongan in butá tanaa Akuoi in kitogi, táe moiko in baḻíon-Kudon umat-ku inta kotabi-Ku,

IḶUAIAN 19:5 ပူးပေါင်းရင်းမြစ်များ

KINOBAḺIAN 17:9

Ki Allah in noguman bui kon i Abraham, “Iko in mustibí doman motoindudui kon dodandian tanaa, pinomayá iko ande buímu moiduduimai.

DATU MITA IMITÁNEA 8:53

Iko, o Tuhan Allah, ain nomiḻí kon i monia nongkon sigad in bayongan bangusa sin baḻíon umat-Mu tontaní, ná inta ain pinoguman-Mu kon i monia pinongin mogogundoi-Mu ki Musa, kon tungkuḷ in Iko nodia kon mogoguyang nami iḻumuai nongkon Mesir.”

TAWARIKH 1 17:22

Bangusa Israel in binaḻí-Mudon umat-Mu tontaní moidapot in mononoi. Bo Iko o Tuhan, in nobaḻí Allah monia.

AYUB 41:11

Ki ine in mokobaḻí monayow kon inia bo diá tompaḻían? Kon dunia naa diábí in mokoaid kon natua.

AYUB 41:3

Degá mopoigum in sia kon inimu sinbá buḻianmu? andeka moyosingogmu, mopoigum in totabi?

MAZMUR 135:4

Ki Yakub in piniḻí-Nea kon i-Nia, umat in Israel binaḻí kapunyaan-Nea.

MAZMUR 24:1

Mazmur i Daud. Ki Tuhanbí in kitogi kon butá bo tombonunea, dunia bo bayongan inta nogutun kon tua.

MAZMUR 25:10

Intau inta motoindudui kon dodandian bo hukum-Nea, yo kotabi-Neabí in mosia takin satia.

IḶUAIAN 15:26

Guman i Tuhan, “Totu-totuudon dudui kon i-Nakó, bo aidaidon in onu inta ontongon-Ku mopia; duduiaidon in bayongan parenta-Ku. Aka aidan monimu intua, yo moiko in diábí hukumon-Ku poumáan in takit ná inta pinouma-Ku kon intau mita in Mesir. Akuoibí in ki Tuhan inta nonompia kon i monimu.”

IḶUAIAN 23:22

Aka moiko motoindudui kon inia bo mogaid kon bayongan inta pinarenta-Ku, yo Akuoidon tontaní in monayow kon bayongan musungmu.

IḶUAIAN 24:7

Onda intua ginamánea in buk dodandian inta pinomaisan kon parenta mita i Tuhan, bo binacaneadon kon tayowon in bangusa tatua takin singog inta moropot. Mosia noguman, “Kami moibog dumudui kon i Tuhan bo mogaid kon bayongan parenta-Nea.”

IḶUAIAN 34:9

Gumannea, “Tuhan, aka totu-totuu kon ibog-Mu in akuoi, akuoi mopoigum, moibogdon ki Tuhan moyotakin nami. Bangusa tatua totuu kon motogat in gina, táe ampungaipa in raat bo dosa nami bo tarimadon kami mobaḻí umat-Mu tontaní.”

IḶUAIAN 6:7

Moiko in diaan-Ku mayá in butá inta pinodandi-Ku takin nongibot kon i Abraham, kon i Ishak bo kon i Yakub; butá tatua in ogoi-Ku kon inimu mobaḻí kapunyaanmu tontaní. Akuoi naa in ki Tuhan.”

IḶUAIAN 8:22

Táe taḻiban-Kubí butá in Gosyen, tampat pinogutunan in umat-Ku. Kon tua in diábí popoangoian-Ku in ḷangow, sinbá kotaauan monimu kon Akuoi, ki Tuhan, in nomia kon tua.

IḶUAIAN 9:29

Guman i Musa kon i datu, “Naonda in ḷuaiku kon kotá tanaa, akuoi in buidon motonggó kon ḻima sin mosambayang kon i Tuhan. Gotup in mogogaidon bo uyan eis in mooḷá domandon, sinbá kotaauandon i Tuangku kon dunia naa in ki Tuhanbí in kitogi.

DONDONG MOḶANTUD 8:12

bo nokouḻí kon doyowa nogatut ponondan kon pinogaidannea. Biódon mako in doit tatua kon inimu, Salomo, bo kon intau mita inta noḷukad kon gobámu. Táe gobá in anggurku, kapunyaanku tontaní, oyúon kon tayowonku.

YESAYA 1:19

Aka moiko moibog motoindudui kon i-Nakó, moiko in motarimabí kon bayongan inta mopia inta ogoi in butámu.

YESAYA 41:8

Táe iko, Israel, mogogundoi-Ku, umat inta piniḻí-Ku, iko in buí i Abraham, yobayat-Ku.

YESAYA 43:1

Israel, nanaa in guman i Tuhan, “Akuoibí in inta nomaḻí bo inta nomia kon inimu, dika moondok, iko in notantú bidon kon posaḷamaton-Ku! Akuoi in nogoinídon kon inimu pinongin tangoimu, iko in Akuoi in kitogi.

YESAYA 56:4

Ki Tuhan in noguman kon i monia, “Aka moiko mohoromat kon singgai in Sabat, aka moiko motoindudui kon dodandian-Ku bo mogaid kon onu inta mokosanang kon gina-Ku,

YEREMIA 10:16

Ki Allah i Yakub in diábí notongkai in berhala mita tatua; Sia in momomaḻí kon bayongan in yagi-yagi. Tangoi-Nea in ki Tuhan Inta Totok in mokawasa; Sia in nomiḻídon kon Israel nobaḻí umat-Nea.

YEREMIA 13:11

Naonda bo bintoḷ nopoḷok noitogot nopia kon ogotan in intau inta nomaké, natuata in makusud-Ku sinbá umat in Israel bo Yohuda moyotogot modagin kon i-Nakó. Pongin natua mosia in mobaḻí umat-Ku inta nomaḻí kon tangoi-Ku in dinayow bo horomaton. Táe, mosia in doíbí dinumudui kon i-Nakó.”

YEREMIA 7:23

Akuoi in tongábí nomarenta kon i monia dumudui kon i-Nakó sinbá Akuoi in mobaḻí Allah monia, bo mosia in mobaḻí umat-Ku. Akuoi in nopotabá kon i monia mobiag podudui in parenta-Ku mita sinbá mosia in mobiag motompia.

IMAMAT 20:24

Butá inta nooyúon bo mopia tatua aindon pinodandi-Ku kon i monimu, dá ogoi-Kubí intua mobaḻí kapunyaanmu. Akuoi in ki Tuhan Allahmu inta nopotondí kon i monimu nongkon bangusa mita ibanea.

AMOS 3:2

“Nongkon bayongan in bangusa kon dunia, tongábí moiko totobatú nion inta bangusa inta kinotaauan-Ku bo inta inindoian-Kumai. Tuamai in moḷoben in dosamu, bo notantúbí kon hukumon-Ku in moiko.”

AMOS 6:1

Moboditodon in moiko inta nobiag nopia kon Sion, bo moiko inta noodom kon Samaria – moiko ei itoi mita in ḻipú in bangusa in Israel inta notondí naa, moiko inta biasamai inangoian in rayat sin pokituḷungan!

MALEAKHI 3:17

Ki Tuhan Inta Totok in mokawasa in noguman, “Mosia in mobaḻí umat-Ku. Kon singgai Akuoi mopobayá in oaidan-Ku, mosia in mobaḻí umat inta totok in kinotabi-Ku. Kotabi-Kubí in mosia, naonda bo guyanga ḷoḷaki motabi kon i adínea inta nogaid dinumudui kon ibognea.

KORINTUS 1 10:26

Sin kon bonu in Buk Motusi ain pinais, “Dunia bo tombonunea naa in komintanbí kapunyaan i Tuhan.”

KORINTUS 1 10:28

Tongá aka oyúon in moguman kon i monimu nanaa, “Kaanon tanion ain bidon pinosumba kon dimukud moraat,” yo dikabí kaanon monimu intua sin aindon muna pinotaaunea, bo kaanon tatua in kinodoíbí in ginamu.

ULANGAN 10:14

Ki Tuhan Allahmu in ki togi ḷangit inta totok in moḷantud; bo butá in tanaa in Siabí doman in kitogi takin bayongan inta kon bonunea.

ULANGAN 11:27

Moiko in barakatanbí aka motoindudui kon parenta mita i Tuhan Allahmu, inta singgai naa pinotaauku kon inimu.

ULANGAN 14:2

Moiko nion in kapunyaan i Tuhan Allahmu; nongkon bayongan in bangusa kon dunia naa, moikobí nion inta piniḻí i Allah nobaḻí umat-Nea.”

ULANGAN 14:21

Mahaḷuk inta minatoi mako naníon diábí motaau in kaanon monimu, táe motaaubí in kaanon in intau mita ango-angoi inta nogutun kon yua-yuak monimu, ande potaḷui kon bangusa ibanea. Moiko nion in umat inta ain piniḻí kon i Tuhan Allahmu. Tapú in adí in domba ande adí in bembé diábí motaau in poyodungúon takin tubig in teté i indenea.”

ULANGAN 26:18

Singgai in naa ki Tuhan motarima kon i monimu mobaḻí umat-Nea tontaní, ná inta pinodandi-Nea kon inimu, bo Sia in nomarenta kon inimu mogaid kon bayongan in parenta-Nea.

ULANGAN 26:19

Ki Tuhan momaḻíbí kon i monimu moḷoben-ḷoben nongkon bayongan in bangusa ibanea inta ain binaḻí-Nea, bo moiko in dayowonbí bo horomaton. Moiko in mobaḻí umat i Tuhan Allahmu ná inta pinodandi-Nea.”

ULANGAN 28:1

“Aka moiko motoindudui kon i Tuhan Allahmu bo mosatia in dumudui kon bayongan in parenta inta pinotaauku kon inimu singgai naa, dá baḻíon-Neadon in moiko bangusa inta totok in kotango-tangoian in intau kon dunia.

ULANGAN 28:9

Aka moiko umuran dumudui kon i Tuhan Allahmu bo mogaid kon bayongan in parenta-Nea, moiko in baḻíon-Neadon umat-Nea tontaní, ná inta pinodandi-Nea.

ULANGAN 4:20

Táe moiko in bangusa inta pinosaḷamat-Nea nongkon Mesir, tampat inta kinororigaan totok monimu. Moiko in dinia-Nea iḻumuai nongkon butá tatua, sinbá mobaḻí bangusa-Nea tontaní ná kaadaanmu tanaa mako.

ULANGAN 5:2

Kon Buḷud in Sinai ki Tuhan Allah naton in nomia kon dodandian tobatú,

ULANGAN 7:6

Aidaidon in tua komintan sin moiko nion in kapunyaan i Tuhan Allahmu. Nongkon bayongan bangusa kon dunia naa, moikobí nion inta piniḻí i Tuhan Allahmu mobaḻí umat inta sinondí kinotabi-Nea.

ULANGAN 9:29

Táe toropdon, o Tuhan, kon mosia naa in bangusa inta piniḻí-Mu nobaḻí umat-Mu, bo dinia-Mu nongkon Mesir takin ropot bo kawasa-Mu inta moḷoben.”

TITUS 2:14

Sia tuata inta ain noposarakan in awak-Nea sin mopoḷuat kon i naton nongkon bayongan inta moraat, bo kita in baḻíon-Nea tobatú umat inta noiḷuatdon nongkon kawasa in dosa bo tongádon mobaḻí umat-Nea inta morajing mogaid kon inta mopia.

IBRANI 11:8

Popisí in mopirisaya, dá ki Abraham in dinumudui kon i Allah wakutu inoiní i Allah bo pinotabá minayá in butá inta pinodandi i Allah ogoi kon inia. Ki Abraham in minayábí doman umpaka diápa kinotaauannea mongo kon onda in bayáan.

IBRANI 8:9

Deemanbí ná dodandian inta inaidan-Ku takin mogoguyang monia wakutu in mosia dinia-Ku iḷumuai nongkon butá in Mesir. Mosia in diá tantú dinumudui kon dodandian inta inaidan-Ku takin i monia; tuamai diádon pandungon-Ku in mosia.

YOSUA 24:24

Bo intau mita tatua noguman kon i Yosua, “Kami in tongábí mogundoi kon i Tuhan, Allah naton. Kami in dumuduibí kon parenta-Nea mita.”

PETRUS 1 2:9

Táe moiko nion in bangusa inta kinopiḻían, imang mita inta mobantung kon datu, bangusa inta mokudus, umat inta kapunyaan i Allah. Ain piniḻí bo inoiní i Allah in moiko iḷumuai nongkon sindip bo mayá tumuot kon bayag-Nea inta momulia, takin makusud bá moiko in mopotaa-taau mako in habar in bayongan inta pinomia i Allah inta diá in poḻiuan tua.

SAMUEL 1 15:22

Táe ki Samuel in noguman, “Onda degá in koibog i Tuhan, kotoindudui andeka kuruban sosumba? Kotoinduduibí kon i Tuhan in mopia-pia nongkon moposumba in kuruban. Dumuduibí kon parenta-Nea in mopia-pia nongkon ḷongó in domba.