IḶUAIAN 17:8 - Alkitab Singog In Mongondow Masa In Tanaa

⁸ Onda intua intau Amalek namangoi bo nonubu kon intau Israel kon Rapidim.

IḶUAIAN 17:8 ပူးပေါင်းရင်းမြစ်များ

KINOBAḺIAN 14:7

Nopaḷut mako kon tua intau mita inta nogaḷow tua nobuidon bui kon En-Mispat inta masai naa sinangoiandon Kades. Mosia in nopotungkud kon bayongan intau kon butá in Amalek poḷat nonaḷow kon intau in Amori inta nogutun kon Hazezon-Tamar.

KINOBAḺIAN 36:16

Korah, Gaetam bo Amalek. Mosia komintan buí i Ada, ki buḷoi i Esau.

MAZMUR 83:7

bangusa in Edom bo Ismael, intau mita in Moab bo Hagar;

IḶUAIAN 17:1

Onda intua bayongan umat in Israel nonaḷámaidon kon padang gurun Sin bo nomampi-mamping mako nongkon tampat tobatú mopobayá in tampat ibanea podudui in parenta i Tuhan. Nokoimontandon mosia in nononḷoḷaigan kon Rapidim, táe kon tua diá in tubig inumon.

PINOGIAPAN 13:29

Intau in Amalek nogutun kon dotá in toḷatan butá tatua; Intau in Het, Yebus bo Amori nogutun kon buḷud; bo intau in Kanaan in nogutun kon butá inta kon bingkí in dagat bo kon bingkí Ongkag in Yordan.”

PINOGIAPAN 24:20

Onda intua kon bonu in pinosindapan tatua ki Bileam nokoontong kon intau mita in Amalek. Dá sia nopotaau doman in tosingogon tanaa, “Nongkon bayongan in bangusa kon dunia, Amalek inta totok in mokawasa. Táe bangusa tatua kon buitnea, moitaḷom domandon turus.”

HAKIM MITA 6:3

Apadoman pomuḷoi in intau monononggobá in Israel, mamangoidon in intau in Midian moyotakin intau in Amalek bo intau mita ibanea nongkon padang gurun bo monubu kon intau in Israel.

SAMUEL 1 14:48

Sia in moparang moḷoḷaki bo mobarani bo nonaḷow kon intau in Amalek, poḷat nopoḷuat kon intau in Israel nongkon kawasa in intau mita inta mogogagow.

SAMUEL 1 15:2

Sia in mohukumbí kon intau in Amalek, sin mogoguyang monia in noḷawang kon intau in Israel kon dodai in intau in Israel namangoi nongkon Mesir.

SAMUEL 1 27:8

Kon bonu in wakutu tatua ki Daud takin intaunea mita mokakit in monubu kon intau in Gesur, intau in Girzi, bo intau in Amalek; bangusa mita tatua in noonggotdon in nogutun kon butá tatua. Sia in nonubu kon butá tatua nodapot in Sur, bo nomoḷat kon Mesir.

SAMUEL 1 30:1

Doyowa nosinggai noiduduimai, ki Daud bo intaunea nobui kon kotá in Ziklag. Naonda in noiyaputmai kon tua, kinotambakanmai monia kon intau in Amalek ain nonubu kon dotá i toḷatan butá in Yohuda bo nonubu kon Ziklag. Mosia in diábí noḻimod kon tobatúmai in intau. Táe sinurub monia komintan in kotá tatua bo nongingguput kon bobayáan monia takin nodia kon bobay mita, adí mita bo intau mita ibanea inta nogutun kon tua. Mosia in nodomok domandon kon motoḷuadí i Daud bo motoḷuadí in intaunea mita, noitakin doman in ki buḷoi Daud taya dua, ki Ahinoam bo ki Abigail. Noajar totok in gina i Daud takin gina in intaunea mita, dá mosia in nongombaḷdon diá nodona-doná nodapot in noḻemédon in mosia.