IḶUAIAN 16:6 - Alkitab Singog In Mongondow Masa In Tanaa

⁶ Dá ki Musa bo ki Harun nogumandon kon bayongan intau mita Israel, “Ḷoḷabungnea naa kotaauandon monimu kon ki Tuhanbí tua inta nodia kon i monimu iḻumuai nongkon Mesir.

IḶUAIAN 16:6 ပူးပေါင်းရင်းမြစ်များ

MAZMUR 77:20

Iko in mayá nongin bokoḷ, iḷumoḷan kon dagat, táe ḻiod-Mu diá koontongan.

MAZMUR 81:11

Akuoibí in ki Tuhan Allahmu, inta nodia kon i monimu iḻumuai nongkon Mesir. Kon dodai in moiko ginogoi moiko inogoian-Ku in kaanon.

IḶUAIAN 12:51

Kon singgai tatua ki Tuhan nodia kon bayongan umat Israel iḻumuai nongkon Mesir.

IḶUAIAN 16:3

Guman monia, “Maníka bo kami minatoidon iḻimod i Tuhan kon Mesir. Kon tua in kami moikaa-kaanbí doman kon ponoyá bo roti dapot in mobotug. Táe moiko ain nodia kon inami namangoi in naa sinbá kami komintan matoi in gogoy.”

IḶUAIAN 16:8

Ki Tuhan mobogoi kon i monimu in ponoyá kon dodai in ḷoḷabungnea, bo roti kon dodai in doḷo-doḷom modapot in moiko mobotug, sin ain dinongog i Tuhan kon moiko in sinumorú kon i-Nia. Totuubí kon aka moiko tumorú kon inami, yo moiko in naondabí bo sinumorú kon i Tuhan.”

IḶUAIAN 32:1

Kon tungkuḷ in noonggotdon in pinogoḷatan mako in bangusa Israel kon i Musa mosiḻig nongkon buḷud tatua, sin dodai intua sia umuranpabí kon tudu in buḷud tatua, dá mosia in namangoi kon i Harun bo noguman, “Diádon kinotaauan naton mongo onu in nobaḻí kon i Musa, intau inta ain nodia kon i naton iḻumuai nongkon Mesir; dá pomiaaidon in kami kon ilah inta modia kon inami.”

IḶUAIAN 32:11

Ki Musa nopoigum tabi kon i Tuhan Allahnea, kainia, “Tuhan, nongonu sin musti-Mubí aidan kon i monia in natua? Ikodon tontaní inta noposaḷamat kon i monia nongkon Mesir takin kawasa bo ropot-Mu inta moḷoben?

IḶUAIAN 32:7

Dá ki Tuhan noguman kon i Musa, “Ḷagidon posiḻig, sin bangusa inta diniamu iḻumuai nongkon butá in Mesir nomiadon kon inta moraat.

IḶUAIAN 6:6

Moiko in baḻíon-Ku umat-Ku, bo Akuoi in mobaḻí ki Allahmu. Dá kotaauandon monimu kon Akuoi naa in ki Tuhan, Allahmu, inta nopoḷuat kon i monimu nongkon pinononggataan kon Mesir.

IḶUAIAN 6:7

Moiko in diaan-Ku mayá in butá inta pinodandi-Ku takin nongibot kon i Abraham, kon i Ishak bo kon i Yakub; butá tatua in ogoi-Ku kon inimu mobaḻí kapunyaanmu tontaní. Akuoi naa in ki Tuhan.”

PINOGIAPAN 16:28

Bo ki Musa noguman, “Tanaa in kotaauandon monimu kon ki Tuhan ain nopotabá kon inakó sin mogaid kon tanaa komintan bo tua in deemanbí ibogku tontaní.

PINOGIAPAN 16:30

Táe aka ki Tuhan momia kon tobatú inta diápa dodai in onda in dinongog monimu naa in kino oonggot, bo aka butá mobotak sin moḻiom kon i monia takin bayongan kapunyaan monia, dá mosia in tumuotdon kobia-biagpa kon bonu in dunia intau minatoi, kotaauandon monimu kon intau mita tatua noḷawang kon i Tuhan.”