IḶUAIAN 13:21 - Alkitab Singog In Mongondow Masa In Tanaa

²¹ Aka singgai, ki Tuhan mayá umuna kon i monia takin mokipogontong naonda bo oigi goḷom bo aka doḷom sia mayá kon muna monia kon bonu in oigi tuḷú sin motundú kon daḷan bayáan monia. Natua in nobaḻí dá mosia notaau in minayá singgai bo doḷom.

IḶUAIAN 13:21 ပူးပေါင်းရင်းမြစ်များ

NEHEMIA 9:12

Pinongin goḷom dinia-Mu in mosia kon dodai in singgai. Bo kon dodai in doḷom daḷannea in sinimbayagan-Mu in oigi in tuḷú.

NEHEMIA 9:19

Táe kon padang gurun tatua diábí sinaḷáan-Mu in mosia, sin Iko in nopuḻing in totabi. Oigi goḷom bo tuḷú in diábí irabut-Mu bui, mototundú kon daḷan kon i monia singgai bo doḷom.

MAZMUR 105:39

Ki Allah in nopobandang in goḷom sin mogoḻiung kon umat-Nea, bo tuḷú sin ponimbayag kon i monia kon tungkuḷ in doḷom.

MAZMUR 68:7

Ki Allah in nobogoi in pogutunan kon intau inta diádon koginaḷum; Sia in nopoḷuaidon kon intau kon ponjara dá nopiadon in gina monia. Táe intau mita inta moḷawang kon i Tuhan mustibí mogutun kon butá inta noḷogat.

MAZMUR 77:20

Iko in mayá nongin bokoḷ, iḷumoḷan kon dagat, táe ḻiod-Mu diá koontongan.

MAZMUR 78:14

Sia in nodia kon i monia inoḻiungan in goḷom kon dodai in singgai bo sinimbayagan in tuḷú kinoouput in doḷom.

MAZMUR 99:7

Nongkon oigi goḷom nosingog in Sia kon i monia, mosia in notoḷutui kon bayongan in hukum bo parenta-Nea.

IḶUAIAN 10:10

Datu noguman, “Yo diábí ogoiku in moiko modia kon bobay mita bo ki adí mita monimu! Onu inta pinoigummu nion notongkaibí moharap kon bá akuoi in mopoigum kon i Tuhan momarakat kon i monimu. Nosilangdon kon inakó kon oyúonbí in makusud monimu moraat.

IḶUAIAN 16:10

Koyogotpa in ki Harun nosingog kon i monia komintan, mosia nobobui kon padang gurun bo daḻídon inontong in sindar i Tuhan kon bonu in goḷom.

IḶUAIAN 32:1

Kon tungkuḷ in noonggotdon in pinogoḷatan mako in bangusa Israel kon i Musa mosiḻig nongkon buḷud tatua, sin dodai intua sia umuranpabí kon tudu in buḷud tatua, dá mosia in namangoi kon i Harun bo noguman, “Diádon kinotaauan naton mongo onu in nobaḻí kon i Musa, intau inta ain nodia kon i naton iḻumuai nongkon Mesir; dá pomiaaidon in kami kon ilah inta modia kon inami.”

DONDONG MOḶANTUD 3:6

Onu degá intua inta namangoi nongkon padang gurun, naonda bo poyok nosipun? Kobondunea in naonda bo taḷong mobondu bo kamania, bo pupur mita mobondu nongkon mopopotaḷui.

PINOGIAPAN 10:34

Aka mosia mobuat nongkon pinononḷoḷaigan, goḷom i Tuhan umuran mogoḻiung kon i monia kon wakutu in singgai.

PINOGIAPAN 14:14

bo oumanon monia intua kon intau mita kon butá tanaa, inta ain nokodongog kon Iko, ki Tuhan noyotakin nami. Dinongog domandon monia kon Iko ain nokipogontong kon inami kon dodai Iko minayá kon muna nami kon bonu in oigi goḷom kon dodai in singgai, bo oigi tuḷú kon dodai in doḷom.

ULANGAN 1:33

inta minayá inumuna kon imonimu sin motayak kon pononḷoḷaiganmu. Sia in notundú kon daḷan kon inimu kon tungkuḷ in doḷom takin oigi tuḷú, bo kon tungkuḷ in singgai nomaké in oigi goḷom.”

ULANGAN 31:8

Ki Tuhan tontaní in mokapit bo motuḷung kon inimu. Diábí pokuyangon-Nea in ginamu bo diábí doman taḷaan-Nea in iko, tuamai dikadon moondok ande mogagawang.”