IBRANI 10:26 - Alkitab Singog In Mongondow Masa In Tanaa

²⁶ Sin aka habar inta mobanar nongkon i Allah ain pinotaau kon i naton, táe umuranpa doman tumuod in kita in mogaid kon dosa, dá diá bidon in kuruban inta pomopat kon dosa naton.

IBRANI 10:26 ပူးပေါင်းရင်းမြစ်များ

IMAMAT 4:13

Aka inta dinosa tua bo bayongan umat in Israel, tongá diábí sinumuod noḷawang kon tobatú nongkon parenta i Tuhan,

IMAMAT 4:2

mopotaau kon bangusa Israel kon ki inekabí inta diá sinumuod nogaid kon dosa takin noiḷaut noiḻimpatdon kon tobatú nongkon parenta mita i Tuhan, yo musti dumudui kon atorang tanaa.

LUKAS 12:47

Bobantung mita inta ain nonotaau kon onu in kinoibog i tuangnea táe diá mobasadia bo diá doman mogaid kon inta kinoibog i tuangnea tua, yo sia in totokbí in ḷuntaan.

YOHANES 13:17

Aka kinotaauandon monimu komintan in naa, yo mosanang bidon in moiko aka pomiaanmu.

YOHANES 9:41

Ki Yesus in notubag, “Aka kuma bo moiko bilog, yo diábí in moiko binaradosa. Táe popisíbí in moiko noguman, ‘kami mokoontongbí,’ dá tua in mangaḻenea moiko in binaradosapa.”

ULANGAN 17:12

Ki inekabí in mobarani moḷawang kon hakim ande imang inta yogot mopobayá in oaidannea yo musti hukumon matoi; oaid monimu tatua monginggamá kon aid moraat tatua kon Israel.

TESALONIKA 2 2:10

Bayongan akaḷ inta moraat pakéonnea mopoyaying kon intau mita inta mongoputú. Mongoputú in mosia sin doí motarima bo doí doman kon habar mopia inta nongkon i Allah inta mokosaḷamat kon i monia.

TIMOTIUS 1 1:13

umpakabí tungkuḷ intua akuoi naa in umuran moponapud in diá totuu bo momogutú poḷat doman moningkuḻe kon i-Nia. Táe sinotabibí i Allah in akuoi, sin dodai intua akuoi in diápa mopirisaya, sahingga in diábí kinotaauanku onu in pinomiaku tatua, noitutui ande noitaḷá.

TIMOTIUS 1 2:4

Ki Allah inta moibog bá bayongan in intau in posaḷamaton bo monotaau kon onu inta moitutui.

YAKOBUS 4:17

Tuamai, intau inta kinotaauannea in mopia, táe diá aidannea, yo binaradosa in intau tatua.

YOHANES 1 5:16

Aka moiko bo mokoontong kon tobatú intau inta tumpaḷa Keresten nogaid kon dosa inta diá mokopopisí kon intau tatua kobuḻiandon in kobiagan inta mopia bo mononoi, yo moiko in musti mosambayang kon i Allah; bo ki Allah in mobogoibí in kobiagan tatua kon inia. Naa in tongábí kon i monia inta nogaid kon dosa inta diá mokopopisí kon i monia kobuḻian in kobiagan tatua. Táe oyúon in dosa inta mokopopisí kon intau kobuḻian in kobiagan tatua. Aka kon soaḷ tanaa yo akuoi in diábí moguman kon i monimu kon moiko in musti mosambayang kon i Allah.

SAMUEL 1 2:25

Aka intau mogaid kon taḷá kon tumpaḷa intau, yo motaaupabí tuḷungan i Allah; táe aka intau momia kon dosa kon i Tuhan, yo ki ine in motaau motuḷung kon inia?” Táe doíbí in mosia mokidongogmai kon tonggina i Eli, amá monia, sin sinantúdon i Tuhan kon ḻimodon in monia.