IBRANI 10:20 - Alkitab Singog In Mongondow Masa In Tanaa

²⁰ Binukatandon i Yesus in daḷan mobagu bayáan naton, daḷan inta mobogoi in kobiagan. Daḷan tatua in mongin gorden inta awak i Yesus tontaní.

IBRANI 10:20 ပူးပေါင်းရင်းမြစ်များ

IMAMAT 16:15

Mopaḷut mako kon tua ki Harun musti moratá kon bembé sin pokuruban potobut kon dosa in umat Israel. Dugú in bembé tatua musti diaannea kon Yuang Totok Motusi, bo popopisik kon dotá in muna taḷob in Poti Dodandian bo kon tayowon Poti, ná pinogogaid kon dugú in sapi koḷakian.

IMAMAT 16:2

kai-Nia, “Potaaudon kon i Harun ki utatmu tua, kon tongábí kon singgai inta ain sinantú sia in motaau tumuot kon Yuang inta Totok in Motusi inta ain sinondí in toḻipoi, sin kon tuata Akuoi mokipogontong kon bonu in goḷom kon ḻimonik in taḷob in Poti Dodamean. Aka ki Harun ḻimimpat kon parenta tatua, yo matoi in sia.

IMAMAT 21:23

Popisí in intau tatua nobogit in awaknea, dá sia diá motaau dimiug kon toḻipoi inta nopoyotondí in Yuang Motusi ande mezbah. Sia diábí motaau moponajis in barang mita inta ain sinondí kon i-Nakó, sin Akuoi in ki Tuhan, bo Akuoi in nonondí kon barang mita tatua.”

MATIUS 27:51

Bo indoiainmai, gorden in Baḷoi Allah nobisik nosilai doyowa nongkon ḻimonikannea nodapot in ḻimonagannea. Bo dinandúan bo buḷud mita in batu nongobotak.

MARKUS 15:38

Bo kon dodai doman tuata gorden kon bonu in Baḷoi Tuhan noberak nosilai doyowa nongkon omonikanea noidapot in ḻimonagannea totok.

LUKAS 23:45

Bo kon dodai doman intua gorden kon Baḷoi Tuhan nobisik nosilai doyowa.

YOHANES 10:7

Tuamai ki Yesus in noguman bui “Poguman-Kudon kon i monimu, Akuoibí in ḷoḻingkop mayá kon domba mita tatua.

YOHANES 10:9

Akuoibí naa in ḷoḻingkop. Ki ine in tumuot mongin i-Nakó mosaḷamat in sia, sia in tuot ḷuaibí bo mokouḻí kon kaanon.

YOHANES 14:6

Ki Yesus in notubag, “Akuoibí naa in daḷan kon monotaau kon i Allah bo mokouḻí kon kobiagan. Diábí in tobatúmai intau in mokoyaput kon i Amá, aka diá mongin i-Nakó.

EPESUS 2:15

Hukum agama in Yahudi takin parenta bo atorangnea mita aindon pinopatan i Kristus, sinbá bangusa doyowa tatua in mobaḻídon tobangusa, bangusa in intau mobagu, inta motobatú takin-Nea. Tua in pinogogaid i Kristus nopoyodame.

TIMOTIUS 1 3:16

Diábí tobatúmai in motaau momayow, kon moḷobenbí totok in onu inta noibunipa kon agama naton naa: Sia namangoi in dunia naa sinumon rupa intau, bo inakubí in Roho i Allah, bo inontong in malaekat mita. Habarnea pinowayadon kon sigad in bayongan bangusa, bo Sia in pinirisaya in bayongan intau kon dunia naa poḷat sinintak namonik in soroga.

IBRANI 6:19

Onu i harap mako naton tua in naonda bo jangkar inta noikanom mako kon tampat inta modaḷom totok bo nobaḻí kokadaian inta moropot totok bo mokoaman kon kobiagan naton. Onu inta iharap mako tua ain noidapot in yuang inta totok in motusi kon Baḷoi Tuhan kon soroga.

IBRANI 9:3

Kon dotá in bonunea, inta kon tumimai in gorden induanea, oyúon in yuang inta sinangoian “Yuang Totok Motusi.”

IBRANI 9:8

Roho i Allah nopoontongdon kino tarang pinongin atorang tatua, kon solama ḷoḷaigan dotá in muna moisindogpa mako, yo daḷan tumuot kon bonu in yuang inta totok in motusi tatua in diápa nobukat.

PETRUS 1 3:18

Sin ki Kristus tontaní in tongábí doman komintan minatoi popisí in dosa mita intau. Tobatú intau inta diá kotaḷá; minatoi popisí in intau inta kotaḷá. Ki Kristus in nogaid kon tua sinbá kita in motaau-Nea diaan mayá kon i Allah. Sia in iḻimod kon kaadaan saḷaku intau, táe biniag bui kon bonu in Roho.

YOHANES 1 4:2

Nanaa in tandanea kon i naton monotaau mongo tua in Roho i Allah andeka deeman: Intau inta mongaku kon ki Yesus Kristus in namangoidon in dunia saḷaku intau, yo intau tatua kinawasa in Roho i Allah.

YOHANES 2 1:7

Tanaa mako in nobayongdon kon dunia naa in intau inta motundú kon diá totuu. Mosia tua in intau inta diá mopirisaya kon ki Yesus Kristus namangoidon in dunia naa saḷaku intau. Intau natua i mongouboḷ, bo saturu i Kristus.