HOSEA 5:15 - Alkitab Singog In Mongondow Masa In Tanaa

¹⁵ Umat-Ku in taḷaan-Kubí modapot in roriga kon i monia tugatdon popisí in dosanea mita, bo mamangoi sin motayak kon i-Nakó. Degá kon bonu in roriganea, mosia in moḷongasi moyodungkuḷ-Ku.”

HOSEA 5:15 ပူးပေါင်းရင်းမြစ်များ

KINOBAḺIAN 42:21

Bo noyosingogdon in mosia, “Totu-totuu kon tanaadon mako kita ihukum popisí in taḷá naton kon i ai-ai naton koḻipod; sia in nokituḷung táe diá pinandungmai naton, umpaka indoian mako naton kon totokdon in mororiga in sia. Tuamai tanaa mako kita in motarimadon kon roriga tanaa.”

TAWARIKH 2 7:14

bo umat-Ku inta nomaké in tangoi-Ku tua sinumonsiup, bo mosambayang poḷat namangoi kon i-Nakó bo nonaḷámai kon aid monia inta moraat, dá nongkon soroga indongogan-Ku in sambayang monia. Ampungankubí in dosa mita monia bo baḻíon-Kudon in butá monia mobiag motompia bui.

AYUB 33:27

Dá kon tayowon in intau moantó sia in moguman, ‘Inta moraat inanggapku mopia, moḷobenbí in dosaku, tongá ki Allah in diábí nohukum kon inakó.’

MAZMUR 107:13

Kon bonu in susa mosia nokuani kon i Tuhan, bo pinoḷuat-Nea in mosia kon roriga.

MAZMUR 107:19

Kon bonu in susa, mosia in nokuani kon i Tuhan, bo pinoḷuat-Nea in mosia nongkon roriga.

MAZMUR 107:28

Kon bonu in susa mosia nokuani kon i Tuhan, bo pinoḷuat-Nea in mosia nongkon roriga.

MAZMUR 107:6

Kon bonu in susa mosia in nokuani kon i Tuhan, bo pinoḷuat-Nea in mosia kon roriga.

MAZMUR 132:14

Guman-Nea, “Kon tanaaya in pogogutunan-Ku modapot in mononoi, Akuoi in moibog momarenta kon tampat tanaa.

MAZMUR 50:15

Pokuanidon kon i-Nakó kon dodai in koantugan in bodito, Poḷuaton-Kubí in moiko, bo moiko in modayowbí kon i-Nakó.”

MAZMUR 78:34

Pomuḷoi in ki Allah moḻimod kon tongonumai in kon sigad monia, ibanea in momanasaḷ bo mobui mangoi kon i-Nia.

MAZMUR 83:16

Duduraidon in mosia in deḷang-Mu, taḻikokogaidon i mosia in tompot moropot-Mu.

AMSAL 8:17

Akuoi in motabi kon i monia inta moibog kon inakó; inta motayak kon inakó, in moyodungkuḷkubí.

YESAYA 18:4

Ki Tuhan in noguman kon inakó, “Nongkon pinogutunan-Ku kon omonik, Akuoi in moḷongow monag takin moonow bo mosanang, ná koonow in oḷú inta nobaḻí kon tungkuḷ in doḷom inta mopatú kon sempo in pobatunan kon boyó, bo ná koriang in sindar in mata in singgai kon tungkuḷ in nobayagdon.

YESAYA 26:16

Iko ain nohukum kon i nami; kon bonu in roriga kami in nobui mangoi kon ini-Mu, bo nosambayang kon ini-Mu, Tuhan.

YESAYA 26:21

Ki Tuhan in moponagbí nongkon tampat-Nea kon soroga sin mohukum kon intau kon dunia sin dosa monia. Pinoḻimodan inta inaidan monia inumado-adop in poniatabí. Butá in diábí momumbun kon intau mita inta minatoi iḻimod.

YESAYA 26:9

Dimukudku in mokotanob kon ini-Mu kon dodai in doḷom, ginaku in mogoḷat mako kon ini-Mu kon dodai in doḷo-doḷom. Aka Iko in monisig kon dunia naa, intau mita kon dunia naa in monotaaudon kon onu inta moitutui.

YEREMIA 2:27

Moiko in pokopooyáanbímai, sin kayu topongkó oiníon monimu ki amá bo batu tobatú oiníonmu iná. Moiko in deemanbí mamangoi kon i-Nakó, táe nonaḷábímai kon i-Nakó. Táe aka moiangoidon in roriga, yo Akuoibí in oiníon monimu sinbá mamangoi moposaḷamat kon i monimu.

YEREMIA 3:13

Akudon kon iko in kotaḷá bo ain nomarontak kon i Tuhan, Allahmu. Akudon kon bayongan siungon in pangkoi in kayu inta mobambar iko in nobogoidon in tabimu kon ilah mita in bangusa ibanea, bo diá dinumudui kon parenta-Ku mita. Akuoi, ki Tuhan ain nosingog.”

YEREMIA 3:14

Ki Tuhan in noguman, “Ei umat inta diá mosatia, pobuidon mangoi kon i-Nakó! Moiko in Akuoi in kitogi. Akuoi in mogamábí kon inimu, tumongo batu in kon batúan in kotá, tododoyowa in kon batúan in inanakan, bo modia kon i monimu mobui kon Buḷud in Sion.

OMBAḶ 3:40

Biódon mako kita in monaridi kon kobobiag naton, bo mobui kon i Tuhan Allah kon soroga. Igai bukatan naton in gina bo mosambayang,

YEHEZKIEL 10:4

Sindar mokotuḷow inta nobaḻí tomponuot koangoian i Tuhan in nonindar nongkon kerub mita tatua bo nomamping kon ngara tumuot kon Baḷoi Tuhan, dá palasnea nobaḻídon nobayag totok.

YEHEZKIEL 11:23

Onda intua sindar mokotuḷow tatua nonaḷámaidon kon Yerusalem bo nomamping kon buḷud kon dotá in pomukaan kon kotá tatua.

YEHEZKIEL 20:43

Kon tua kotoropandon monimu in bayongan in oaid inta mokorongó inta ain nokonajis kon awakmu. Dá morongódon in moiko in mokotorop kon bayongan inta nobaḻí tatua.

YEHEZKIEL 36:31

Kotoropanbí monimu in dodiamu inta moraat bo aidmu inta diá patus tua, bo morongódon bui in moiko kon awakmu tontaní popisí in dosamu mita bo aidmu inta diá mopia tua.

YEHEZKIEL 6:9

kon tua mosia in mobiag kon bonu in poḷumbúan. Bo kotoropandon monia in Akuoi bo komangaḻeandon monia kon Akuoi in mohukum bo moningkuḻe kon i monia sin gina monia in diá motoindudui kon i-Nakó. Mosia in nonaḷámaidon kon i-Nakó bo ain nomiḻí kon berhala nobaḻí toḻiu-Ku. Bo mosia in doídon kon awak monia tontaní popisí in bayongan in aid moraat bo moromú inta ain inaidan monia.

YEHEZKIEL 8:6

Ki Allah in noguman kon inakó, “Ei intau inta ilo-ilow, inontongmu onu in yogot nobaḻí? Taridiai in aid mita inta mokorongó inta inaidan in intau in Israel, inta nokopopisí kon Akuoi noiyayú kon Baḷoi-Ku! Igai, bain poontong-Ku kon inimu in inta moiḻiu in mokorongó.”

HOSEA 3:5

Táe moiangoibí in wakutunea bangusa in Israel mobui kon i Tuhan Allah monia, bo kon i datu monia nongkon buí i Daud. Bo moondok in mosia poḷat mohoromat kon i Tuhan, poḷat motarima kon barakat-Nea mita.

HOSEA 5:6

Mosia in minayá notayak kon i Tuhan kodia-dia in domba bo sapi sin pokuruban, táe tua komintan in diábí in mangaḻenea. Sin ki Tuhan in nonaḷámaidon kon i monia, bo diábí mouḻí monia in Sia.

MIKHA 1:3

Sia in noponag nongkon pinogutunan-Nea inta motusi bo maya-mayá kon tudu in buḷud kon butá.

PINOGIAPAN 21:7

Bo bangusa tatua namangoi kon tayowon i Musa bo noguman, “Binaradosadon in kami sin ain nongunsingog kon i Tuhan bo kon inimu. Posambayangpa kon i Tuhan sinbá uḷag mita tanaa poyayúdon kon inami.” Dá sinambayangandon i Musa in bangusa tatua.

LUKAS 13:25

Aka ki togi baḷoi bo simindogdon moḻingkop kon ḷoḻingkop in baḷoinea, yo moiko in dongka bidon simindog mako kon ḷuai bo umuran monangkokó bo moguman, ‘Tuang, bukataipa in ḷoḻingkop sin tuotan nami!’ Táe ki togi baḷoi tatua in motubag kon i monimu nanaa, ‘Diábí kinotaauan-Ku mongo nongkon onda in moiko!’

HAKIM MITA 4:3

Ki Yabin kokereta in parang inta pinomia nongkon uatoi, 900 in kobayongnea. Doyowa nopuḷú notaong in koonggotnea sia in nononggata kon intau in Israel takin dodia moraat. Bo mosia in nokuani nokituḷung kon i Tuhan.