HOSEA 2:5 - Alkitab Singog In Mongondow Masa In Tanaa

⁵ Ki inámu in sundaḷ diá kotoguoyá. Sia in noguman, ‘Akuoi in mayábí kon inta kinotabiku mita inta nobogoi kon inakó in kaanon bo inumon, wol bo kaeng linen, ḷana in zaitun bo anggur.’

HOSEA 2:5 ပူးပေါင်းရင်းမြစ်များ

YESAYA 1:21

Kotá inta koḻipod motoindudui, tanaa mako in nádon onda bo sundaḷ tobatú! Dungkuḷmai bayongan in intaunea in moadil bo mojujur, táe tanaa in pinogutunandon in moḷoḻimod mita.

YESAYA 50:1

Ki Tuhan in noguman kon Israel, “Ei umat-Ku, kainimu kamai Akuoi in mopoguntunbí kon inimu naonda bo buḷoi ḷoḷaki mopoguntun kon i buḷoinea bobay? Aka natua, yo kon onda in surat gogaatannea? Kainimu kamai Akuoi in mopotaḷui kon inimu, naonda bo guyanga ḷoḷaki nopotaḷui kon i adínea kon intau inta mamangoi moigum kon boḻi? Deeman! Iko in dinakop bo iḷumbú, popisí in dosa bo aid moraatmu tontaní!

YEREMIA 11:13

Ilah mita in intau in Yohuda nobayong totok, ná kobayong in kotá mita monia. Intau in Yerusalem noposindog in mezbah mita ná kobayong in daḷan mita kon kotá in Yerusalem sin moposumba in kuruban kon Dewa Baal.

YEREMIA 13:22

Degá moḻibó in moiko nongonu sin tua komintan in moiantugbí kon inimu, nongonu sin ḷambungmu in binerakbí bo moiko in pinakisa siniugan. Pokotaaudon kon tua in nobaḻí popisí in dosamu noiḻiudon in barong.

YEREMIA 2:20

Ki Tuhan in noguman, “Ain noonggot iko in doí mogundoi kon i-Nakó; doí dumudui andeka mosumba kon i-Nakó. Kon bayongan tudu in buḷud inta moḷantud, bo kon siungon in bayongan in pangkoi in kayu inta mobambar iko in mosumba kon dewa mita mopoḷumbá.

YEREMIA 6:8

Ei intau in Yerusalem, igumon mako bayongan in roriga tatua mobaḻí tompoingat kon inimu! Dika modapot in Akuoi monaḷámai kon imonimu bo baḻíon-Ku in kotámu tatua padang gurun inta diá pinogutunan in intau.”

YEHEZKIEL 16:35

Ei Yerusalem, sundaḷ, indongogai onu in pinoguman i Tuhan Inta Totok in moḷantud, “Iko in noḷongkutdon kon ḷambungmu, bo saḷaku sundaḷ inogoimudon in awakmu kon inta kinoibogmu mita bo kon berhalamu mita inta mokorongó tua. Ki adímu mita iḻimodmu bo pinokurubanmu kon berhala mita tatua.

YEHEZKIEL 16:39

Ogoi-Ku in iko kon inta kinotabimu mita tatua, bo umpagon monia in tampat mita pinosundaḷan bo pinosumbaanmu kon berhala. Bayongan in pakeang bo ḷambámu in agowonbí monia, modapot in mopilang in iko.

YEHEZKIEL 16:4

Kon dodai in iko noiḷotang diá in nomongkó kon putodmu, andeka noginggú kon inimu, andeka diá pinupuran in simuton:, andeka bakuton in iko in daing.

HOSEA 1:2

Kon dodai in ki Tuhan dungkuḷ totok nosingog kon bangusa in Israel pinongin inakó, ki Tuhan in noguman, “Hosea, tonibuḷoidon in bobay tobatú inta sundaḷ, bo ki adímu mita doman in moidayan kon inia. Umat-Ku in notongkai ná ki buḷoimu tatua; mosia in diá motoḷutui kon i-Nakó, bo nonaḷámai kon i-Nakó.”

HOSEA 2:2

Ki Tuhan in noguman, “Ei adí-Ku mita, ki inámu in deeman bidon ki buḷoi-Ku, bo Akuoi in deemanbí ki buḷoinea. Tuamai, pelekaradon in sia sinbá sia in dika monuaḻing bo dikadon sumundaḷ bui.

HOSEA 2:8

Ki inámu diábí kon dodai in onda in akuonnea kon Akuoibí in nobogoi kon inia in gandum, anggur, ḷana zaitun, bo bayongan in buḷawan, saḷaka inta pinakénea nosumba kon Baal tatua.

HOSEA 3:1

Ki Tuhan in noguman kon inakó, “Bayádon bui bo kotabi in bobay tobatú inta moibog mokituaḻing. Kotabidon in sia ná doman Akuoi notabi kon intau in Israel umpaka mosia ain nonaḷámai kon i-Nakó bo nosumba kon ilah mita ibanea poḷat doman noposumba in kukis kismis kon berhala.”

HOSEA 4:5

Singgai doḷom in moiko mogaid kon moitaḷá, natua doman in nabi mita. Tuamai yopúon-Ku in Israel, ki inámu.

HOSEA 8:9

Naonda bo keledai ḻindong inta iḷumoḷongon, natuata in intau mita in Israel dinumudui kon ibog mita monia tontaní. Mosia in notayak kon totuḷung nongkon Asyur, bo notaḷui kon yoyobayatan in bangusa mita ibanea.

HOSEA 9:10

Ki Tuhan in noguman, “Kon tungkuḷ in Akuoi dungkuḷ nokouḻí kon Israel, nopia in gina-Ku naonda bo intau nokouḻí kon bungai in anggur kon padang gurun. Kon tungkuḷ in Akuoi dungkuḷ nokoontong kon mogoguyangmu, nopia totok in gina-Ku naonda bo intau inta nokoontong kon bungai in ara inta dungkuḷ. Táe, kon dodai in mosia minayá in Buḷud in Peor, mosia in nomangkoidon nosumba kon Baal, dá nonajisdon in mosia naonda bo dewa inta kinoibog monia tatua.

AMOS 8:13

Kon singgai tatua nodapot in intau mita moguodpa inta mongosehatpa mita in togopuḷongonbí popisí in inaput in rogang.

HAKIM MITA 16:23

Kon singgai tobatú pongawasa mita in Pilistin noyosipun sin momia kon rame moḷoben bo moposumba in kuruban kon i Dagon, dewa monia. Mosia in nodondong, “Dewa naton ain nopountung kon inaton nongkon i Simson, musung naton!”