HOSEA 2:19 - Alkitab Singog In Mongondow Masa In Tanaa

¹⁹ Israel, iko in baḻíon-Kubí ki buḷoi-Ku, buḷoi inta nosah modapot in mononoi. Iko in kotabi-Kubí bo umuran-Ku koibog; Akuoi in mokopojujurbí bo mosatia.

HOSEA 2:19 ပူးပေါင်းရင်းမြစ်များ

MAZMUR 85:10

Totuu, Sia in moibogbí moposaḷamat kon intau inta modagin kon i-Nia, ki Allah inta moḷantud in mogutunbí kon butá naton.

YESAYA 1:27

Ki Tuhan in moadil, dá Sia in moposaḷamatbí kon Yerusalem takin intaunea mita inta inangoian in manasaḷ.

YESAYA 54:14

Iko in pinosindog pinodoyon kon koadilan, pinoyayú nongkon inta mokoondok bo pinondorotan.

YESAYA 54:5

Inta nomaḻí kon inimu in naonda bo ki buḷoimu ḷoḷaki, ki Allah mokudus in Israel in mopoposaḷamatmu. Ki Tuhan Inta Totok in mokawasa, tuata in tangoi-Nea, Sia in Allah inta nongawasa kon sinangkub in dunia.

YESAYA 54:6

Israel, iko in naonda bo buḷoi bobay inta nobagupa inta nokuyang in gina popisí in sinaḷáan i buḷoinea. Táe ki Allah in nogoiní bui kon inimu bo noguman,

YEREMIA 4:2

Aka moiko in mongibot podoyon kon tangoi-Ku bo moiko in mobiag mojujur moadil bo mobanar, dá bayongan in bangusa in mopoigumbí kon i-Nakó sinbá barakatan-Ku in mosia, bo mosia in modayow kon i-Nakó.”

YEHEZKIEL 39:29

Akuoi in mopogonúbí in Roho-Ku kon bangusa in Israel, bo diá bidon monaḷámai bui kon i monia. Akuoi, ki Tuhan, Inta Totok in moḷantud ain nosingog.”

HOSEA 14:4

Asyur in diábí mokoposaḷamat kon inami, bo kabaḷo in parang diábí mokotuḷung kon inami. Kami in diá bidon moguman kon patong mita inta pinomia nami tontaní kon mosia in ki Allah nami. O Tuhan, Iko in notabi kon intau mita inta diá in ibanea mako inta motaau pongata monia.”

YOËL 3:20

Bo kinotutugan in dugú monia in batukon-Kubí in tontuḻínea, inta noḻimod kon inia in matoibí sibaton-Ku. Táe Yohuda bo Yerusalem in umuranbí oyúon in mogogutunnea, bo Buḷud in Sion in umuranbí pogutunan-Ku.”

ZAKHARIA 13:2

Kon singgai tatua popatan-Kudon in tangoi in berhala mita nongkon butá tanaa, dá diádon tobatúmai in mokotoropa kon tua. Bayongan intau inta mongaku kon nabi in sia poguntunon-Ku takin i monia inta kinokawasaan in dimukud inta motombogá.

YOHANES 3:29

Nonikaan bobay tatua in kapunyaanbí in nonikaan ḷoḷaki. Yobayat in nonikaan ḷoḷaki tatua tongábí simindog moyotakinnea bo mokidongog, bo mopia in ginanea aka mokodongog kon singog in nonikaan ḷoḷaki. Natuabí doman in akuoi. Mopiadon totok in ginaku in tanaa.

SURAT I PAULUS KON JAMAAT RUM 7:4

Natua domandon in moiko utatku mita. Kon hukum agama in Yahudi, moiko ain minatoi, sin moiko ain sinobatú takin awak i Kristus bo nobaḻídon kapunyaan-Nea inta ain biniag bui nongkon kinopatoian. Sia biniag nongkon popatoi sinbá kita in mobaragunadon kon i Allah kon dodai in mobiagpa.

KORINTUS 2 11:2

Akuoi in mokotanob kon i monimu, naonda bo kototanob i Allah kon i monimu. Moiko nion in naonda bo mongodeaga inta ain pinodandiku kon nikaan in tobatú ḷoḷaki, ḷoḷaki tatua in ki Kristus.

WAHYU 21:2

Dá akuoi in nokoontong kon kotá motusi tatua, tuata in Yerusalem inta mobagu, noponag nongkon soroga i Allah. Kotá tatua in pinosadia naonda bo nonikaan bobay inta pinakeangan sin mokipodungkuḷdon kon nonikaan ḷoḷaki.