HOSEA 2:17 - Alkitab Singog In Mongondow Masa In Tanaa

¹⁷ Diá bidon ogoi-Ku in sia in monangoi bui kon tangoi in Baal, dá koḻiongandon in intau in tangoi tatua.

HOSEA 2:17 ပူးပေါင်းရင်းမြစ်များ

MAZMUR 16:4

Biódon mako in intau inta mosumba kon dewa mita moduga-dungangdon in ajar in ginanea. Akuoi in doíbí mobogoi in kuruban kon dewa mita, nodapotbí in doí monangoi kon tangoi monia.

IḶUAIAN 15:1

Bo ki Musa takin intau mita in Israel nopodondong in dondong tanaa sin modayow kon i Tuhan, “Akuoi in moibog modondong kon i Tuhan, sin moḷobenbí in kawasa-Nea. Bayongan in kabaḷo bo intau inta sinumakoi pinogambat-Nea kon bonu in dagat.

IḶUAIAN 23:13

Pononggina mako in bayongan inta ain pinoguman-Ku kon inimu. Dika mosumba kon ilah mita ibanea, modapot in tongá monangoi kon tangoinea diábí motaau.”

YEREMIA 10:11

Moiko, ei umat, musti mopotaau kon i monia kon dewa mita inta diá nomaḻí kon ḷangit bo butá tua in yopúonbí. Mosia in moinggamábí nongkon tudu in butá naa.)

YEREMIA 2:2

nopotaau in koyow tanaa kon bayongan in intau kon Yerusalem, “Ei Israel, kinotoropan-Ku kon iko in totok in motoindudui kon tungkuḷ in iko noguodpa; totuu moḷoben in tabimu kon tungkuḷ in kita bagupa notonibuḷoi. Minayá in padang gurun in Akuoi dinuduianmu nongin butá inta diá sinompinomuḷaan.

ZAKHARIA 13:2

Kon singgai tatua popatan-Kudon in tangoi in berhala mita nongkon butá tanaa, dá diádon tobatúmai in mokotoropa kon tua. Bayongan intau inta mongaku kon nabi in sia poguntunon-Ku takin i monia inta kinokawasaan in dimukud inta motombogá.

YOSUA 23:7

Aka natua dá moiko in diádon moyobauk in bangusa mita inta nogutunpa kon sigad monimu. Moiko in diábí monangoi kon tangoi in dewa mita monia ande mongibot podoyon kon tangoi tatua. Bo moiko in diábí doman moibada ande tumungkud kon tayowon in dewa mita tatua.

YOSUA 7:26

Nopaḷut mako kon tua binumbunandon monia in tampat tatua in batu inta mobarong totok bo dapot in tanaa oyúonpa doman intua. Tuamai in tampat tatua in sinangoianpa Ḷopá in Roriga. Dá noobotdon in torú i Tuhan.