HOSEA 11:11 - Alkitab Singog In Mongondow Masa In Tanaa

¹¹ Nongkon Mesir mosia in mamangoi ná koḻikat in ḷagapan, bo nongkon Asyur naonda bo paanan in paḷoma. Bo mosia in diaan-Ku mobui kon baḷoi monia. Akuoi ki Tuhan ain nosingog.”

HOSEA 11:11 ပူးပေါင်းရင်းမြစ်များ

YESAYA 11:11

Kon singgai tatua ki Tuhan in buipa doman momaké kon kawasa-Nea bo modia mobui kon umat-Nea inta kinotaḷáan kon Asyur bo kon Mesir, kon butá mita in Patros, Sudan bo Elam, kon Babel, Hamat bo ḻibuton mita inta mongoyayú.

YESAYA 60:8

Onu degá in inta noiḷayug naonda bo goḷom naonda bo paḷoma inta iḷumayug nobui?

YEREMIA 31:12

Mosia in mamangoi in Tombuḷud in Sion takin pogot motamburiang, poḷat modondong takin pia in gina popisí in bayongan inta inogoi-Ku kon i monia, gandum, ḷana, anggur, sapi bo domba. Mosia in mobaḻídon naonda bo taman inta mobayong in tubignea, bo diábí kodaitan in onu bo onu.

YEHEZKIEL 34:27

Pangkoi mita in kayu in momungaidon, pinomuḷa mita kon gobá in mobogoidon in bungainea, bo bayongan in intau in mogutunbí moodom kon butánea tontaní. Aka rante pinotogot kon umat-Ku bo botowandon bo mosia in poḷuaton-Kudon nongkon intau mita inta nononggata kon i monia, dá kotaauandon monia kon Akuoibí in ki Tuhan.

YEHEZKIEL 34:28

Mosia in diá bidon pogagowan in bangusa mita inta diá nonotaau kon i-Nakó, andeka domokon in mahaḷuk mita moraat. Mosia in mobiag bidon motompia bo mooyúon, bo diá bidon in tobatúmai in intau in mopogogondok kon i monia.

YEHEZKIEL 37:21

Bo poguman kon i monia kon Akuoi, ki Tuhan Inta Totok in moḷantud in mogamábí kon bayongan in bangusa-Ku nongkon butá mita inta binayáan monia. Mosia in sipunon-Kubí bo diaan mobui kon butá monia tontaní.

HOSEA 3:5

Táe moiangoibí in wakutunea bangusa in Israel mobui kon i Tuhan Allah monia, bo kon i datu monia nongkon buí i Daud. Bo moondok in mosia poḷat mohoromat kon i Tuhan, poḷat motarima kon barakat-Nea mita.

HOSEA 7:11

Israel in uik-untag naonda bo ḷagapan paḷoma inta bodok. Dungkuḷ intaunea mita in mokituḷung kon Mesir, onda intua mosia in noḷagui minayá in Asyur!

OBAJA 1:17

“Táe kon Buḷud in Sion, oyúonbí in mosaḷamat, bo buḷud tatua in mobaḻíbí tampat inta tondíon kon i-Nakó. Dá buí i Yakub in buidon mokadai kon butá budel monia.

ZAKHARIA 10:10

Nongkon Mesir bo Asyur, mosia in popobui-Ku. Kon butánea tontaní mosia in popoutun-Kubí. Diaan-Ku in mosia mayá in Gilead bo kon Libanon doman, dá sinangkub in butá mopuḻingdon i monia.

ZAKHARIA 8:7

Akuoi in moposaḷamat in umat-Ku nongkon butá mita inta ain pinogakutan kon i monia,

ZAKHARIA 8:8

bo modia bui kon i monia nongkon pomukaan bo nongkon toyopan, dá mosia in mogutun kon Yerusalem bui. Mosia in mobaḻí umat-Ku bo Akuoi in ki Allah monia. Akuoi in momarenta kon i monia takin satia bo moadil.”