HAKIM MITA 2:3 - Alkitab Singog In Mongondow Masa In Tanaa

³ Dá, indongogai in tanaa! Diábí poguntunon-Ku in intau mita tanaa aka moiko moparang takin i monia. Mosia in mobaḻíbí musungmu mita, bo moiko in moibaaḷbí, modapot in moiko moiduduidon mosumba kon dewa mita monia.”

HAKIM MITA 2:3 ပူးပေါင်းရင်းမြစ်များ

MAZMUR 106:36

Bo mosia in nosumba kon berhala mita, bo tua in nobaḻí dodoyonan kinoḷabúan monia.

IḶUAIAN 23:33

Dika pomayá mako monimu intau mita tatua mogutun kon butámu, sinbá moiko diá moidudui kon i monia mosumba kon ilah mita monia bo baradosaandon kon i-Nakó. Aka moiko mosumbadon kon ilah mita monia, yo moiko in noituotdon kon poyogaḷap inta mokopatoi.”

IḶUAIAN 34:12

Dika momia kon dodandian takin intau mita kon butá inta kobayáan monimu, sin tua in mobaḻídon poyogaḷap inta mokopopisí kon kopatoianmu.

PINOGIAPAN 33:55

Táe aka intau kon ḻipú tatua bo diá poguntunon monimu, yo intau mita inta umuran nogutun kon tua in mopororigamaidon kon i monimu naonda bo bungaion kon mata monimu andeka naonda bo dugi kon sioḷmu. Bo kon singgai moiduduimai mosiadon tua in monubu kon i monimu.

ULANGAN 7:16

Batúan in bangusa inta pinosarakan i Tuhan Allahmu kon bonu in kawasa mu musti yopúon monimu; dika mopoontong in tabi kon i monia. Dika mosumba kon ilah mita monia, sin aid mita natua mokopoangoi kon bodito kon inimu.

YOSUA 23:13

yo torop, kon notantú bidon kon ki Tuhan Allahmu in diábí mopoguntun in bangusa mita tatua sin kopiaan monimu. Sedang bo mosia tua in totokbí in mokobahaya kon i monimu, sin mosia tua in mobaḻídon naonda bo poyogaḷap kon i monimu. Pororigaandon totok monia in moiko; sin mosia in mobaḻídon naonda bo sambok kon ḻikudmu ande naonda bo dugi kon bonu in matamu. Moiko in umurandon mororiga modapot in diádon intau tobatúmai in kon sigad monimu in kotaḷáan kon butá inta mopia naa inta inogoi i Tuhan Allahmu kon inimu.

HAKIM MITA 2:21

Tanaa in doí bidon in Akuoi mopoguntun in bangusakabí táonda inta oyúonpa kon butá in tanaa naonda in ki Yosua minatoi.

HAKIM MITA 2:4

Naonda in malaekat tatua nopaḷut nopotaau in habar tatua, bayongan in bangusa Israel totokdon in nongombaḷ.

HAKIM MITA 3:6

Umat in Israel noyobuḷoidon magí-mako in bangusa mita tatua, bo sinumakindon nosumba kon dewa mita monia.

HAKIM MITA 8:27

Nongkon buḷawan mita tatua, ki Gideon nomia kon patong berhala, bo pinosindognea kon ḻipúnea inta kon Opra. Bayongan in intau in Israel minayá intua sin nosumba kon patong berhala tatua, nodapot in mosia diádon noindoimai kon i Allah. Bo soaḷ tatua in nobaḻí naonda bo poyogaḷap tobatú kon i Gideon bo motoḷuadínea.