HAGAI 2:22 - Alkitab Singog In Mongondow Masa In Tanaa

²² dodatuan mita in umpagon-Ku bo kawasa monia in rimumudon-Ku. Kereta mita in parang takin mododianea in tokokaḻintuangon-Ku; bayongan in kabaḷo in matoi bo tumotakoinea in mosiḻimodandon.

HAGAI 2:22 ပူးပေါင်းရင်းမြစ်များ

TAWARIKH 2 15:6

Bangusa tobatú moritak kon bangusa ibanea, bo kotá tobatú moritak kon kotá ibanea, sin pinopoangoidon i Allah in ropatoi moḷoben kon i monia.

TAWARIKH 2 20:22

Kon tungkuḷ in mododondong tatua momangkoidon modondong, ki Tuhan in mopotombaukdon kon yua-yuak in tontara in musung inta koyogot in monubu.

TAWARIKH 2 20:23

Tontara in Amon bo Moab in monubu kon tontara in Edom bo morimumudon kon i monia komintan. Onda intua mosia momurow bo mositubuan totok.

MAZMUR 46:9

Igai, indoiaika mongo onu in pinomia i Tuhan, totuu mokoherang in oaidan-Nea kon dunia!

MAZMUR 76:6

Intau mita mobarani ain pinogagowan; mosia in noisiug bidon bo diádon mobangon bui. Tontara mita inta mongotorindog noinggamádon in ropotnea.

IḶUAIAN 14:17

Potogaton-Ku in gina Intau in Mesir bá umuran aḷowan monia in intau in Israel, bo poontong-Kudon in kawasa-Ku kon i datu in Mesir, kon tontaranea, kon keretanea mita bo mododianea.

IḶUAIAN 14:28

Tubig in dagat noyobui bo noḷingkum kon kereta mita, intau mita inta nodia, bo bayongan tontara in Mesir inta nogaḷow kon intau in Israel kon yuak in dagat, dapot in mosia nodait minatoi.

IḶUAIAN 15:19

Kon tungkuḷ in intau Israel iḷumoḷan kon dagat, mosia in minayá-mayá kon apad in dagat inta noingkag. Táe naonda in kereta mita intau in Mesir takin kabaḷonea bo intau mita inta nodia sinumuot kon dagat, pinoyobuidon i Tuhan in tubignea nodapot in mosia nongoḷomot.

IḶUAIAN 15:4

Tontara in Mesir bo bayongan keretanea pinogambat-Nea kon bonu in dagat. Itoi mita in tontara inta mongoroton noḷomot kon Dagat in Gelagah.

YESAYA 19:2

Ki Tuhan in noguman, “Akuoi in moposindogbí in ropatoi kon motoḷuadí kon Mesir: Utat moyogintayow in utat, topodiug moyogintayow in topodiug, kotá moyogintayow in kotá bo dodatuan moyogintayow in dodatuan.

YESAYA 60:12

Bangusa bo dodatuan inta doí mobantung kon inimu, in moyopúbí bo moinggamádon.

YESAYA 9:19

Kon sinangkub in butá tatua mosia mogagow bo mokaan kon onukabí in motaau kaanon, táe diábí in mosia mokorasa kon mobotug. Nodapotbí in mosia mokaan kon topotakin mita monia tontaní!

YEHEZKIEL 21:27

Kotá tanaa in rimumudon-Kudon komintan, dá kon ondaka oyúonbí in apug. Táe tua in mobaḻí aka intau inta piniḻí-Ku sin mohukum kon kotá tanaa in moiangoidon. Sia tuata in pobogoian-Ku kon kotá tanaa.’ ”

YEHEZKIEL 26:16

Mokoontong kon ukurmu, datu mita nongkon bangusa mita kon pintad in simindog nongkon pomomarentaan, moḷongkut kon pakeang in datu bo ḷambung monia inta sinomboréan, bo ḻimitú kon butá urot mako. Totokdon in moondok in mosia modapot in diádon moonow.

YEHEZKIEL 38:21

Bo ki Gog in taḻikokogan-Kubí in moyagi-yagimai in bodito. Akuoi, ki Tuhan Inta totok in moḷantud ain nosingog. Intaunea mita in mositotadan bidon in kedang monia.

YEHEZKIEL 39:20

Kon meja-Ku mosia in motaaubí in mopobotug in sian monia takin mokaan kon bayongan in kabaḷo bo tumotakoinea bo takin doman intau mita inta noduḷu noparang. Akuoi, ki Tuhan Inta Totok in moḷantud ain nosingog.”

DANIEL 8:25

Popisí in sia moakaḷ, uboḷnea mita in mobaḻíbí. Sia in ḷumoḷatúbí, bo diábí in sia muna mobogoi in tompoingat momutú in sia kon mobayong in intau. Nodapotbí in sia mokobaḻí in monayow kon i Datu Inta Totok in moḷoben. Táe sia in rimumudonbí deemanbí mopomaké in ropot in intau.

AMOS 2:15

Momomiot in diábí mokotongod, mororibatuk moḻikat diábí mokoḷagui, bo inta sinumakoi kon kabaḷo in diábí mosaḷamat.

MIKHA 5:10

Kotá mita inta oyúon in poḷoḷukadan kon butámu in rimumudon-Ku, bo bayongan in dindingmu umpagon-Ku.

MIKHA 5:8

Israel in monaḷowbí kon musungnea mita poḷat morimumud kon i monia komintan.

MIKHA 5:9

Ki Tuhan in noguman, “Kon tungkuḷ intua Akuoi in monginggamádon kon bayongan in kabaḷomu, bo moyompat kon bayongan in kereta mita in parangmu.

MIKHA 7:16

Bangusa mita in mokoontongbí kon tua bo angoian in oyá sin kotaauandon monia kon bayongan in ropot monia diábí in mangaḻenea. Mosia in kobuḻianbí in akaḷ dá diádon mokosingog andeka mokodongog.

ZEPANYA 3:8

Táe pokoingat! Oḷatdon in singgainea simindog in Akuoi saḷaku intau inta mopongadu. Sin sinantú-kudon kon modondon kon bangusa mita bo dodatuan mita sin mopoḷabú in torú-Ku kon i monia. Bayongan in butá in modaitbí kaanon in tuḷú torú-Ku.

ZAKHARIA 10:11

Aka mosia bo ḷumoḷan kon dagat in roriga, Akuoi, ki Tuhan in momobak kon bokoḷ mita, dá apad in Ongkag in Nil moingkagdon totok. Bangusa in Asyur inta mododia in poompáan, bo Mesir inta motorindog in kobuḻiandon in kawasa.

ZAKHARIA 10:5

Intau mita in Yohuda in mountungbí naonda bo pojuang mita inta moruntai kon musung naonda bo yoná kon daḷan. Mosia in totokbí in moḷongasi popisí in Akuoi, ki Tuhan in moduḷu kon i monia, bo tontara in musung inta sinumakoi kon kabaḷo in taḷowonbí monia komintan.

ZAKHARIA 12:9

Kon singgai tatua Akuoi in moyompat kon bayongan in bangusa inta monungkuḷ monubu kon Yerusalem.

ZAKHARIA 14:3

Bo ki Tuhan in mayá bo moparang monayow kon bangusa mita tatua, ná inta pinomia-Nea dungkuḷmai.

ZAKHARIA 4:6

Malaekat tatua in nopotabá kon inakó mopotaau kon i Zerubabel in koyow i Tuhan tanaa, “Deemanbí pinodoyon kon ropot in tontara bo deemanbí doman pinodoyon kon ropotmu tontaní iko in mountung, táe noidoyonbí kon roho-Ku.

ZAKHARIA 9:10

Ki Tuhan in noguman, “Kereta mita in parang nongkon Epraim in ḷumbúon-Kubí, bayongan in kabaḷo kon Yerusalem in yopúon-Kubí bo bayongan in piot in tokorimumudon-Kubí. Datumu in mopotaaubí in dodamean kon sigad in bangusa mita. Nongkon dagat mopobayá in dagat siabí in mongawasa, nongkon Ongkag in Eprat nodapot in popod in dunia.”

MATIUS 24:7

Sin bangusa bo bangusa mosiparangan bo dodatuan moparang doman takin dodatuan. Moiangoi in wakutu kon bayongan intau kodaitan in kaanon bo ḻinug kon bayongan tampat.

WAHYU 11:15

Bo malaekat impitunea in nogirup kon torompetnea, dá kinodongogandon in singog mita inta mongoḷangon totok nongkon soroga noguman, “Kawasa momarenta kon dunia naa, masai naa kinadaiandon i Tuhan naton, bo i Datu mopoposaḷamat inta pinodandi-Nea. Sia bidon in momarenta modapot in mononoi!”

HAKIM MITA 7:22

Naonda in ki Gideon bo intaunea mita koyogotpa in nogirup kon torompet, pinoporopatoi i Tuhan in tontara in musung takin nopomaké in kedang monia tontaní. Mosia noḷagui nopobayá ná Zerera nodapot kon Bet-Sita bo kon kotá in Abel Mehola kon diug in Tabat.

SAMUEL 1 14:16

Bo kon dodai intua tontara i Saul inta noḷukad kon Gibea kon butá in Benyamin, nokoontong kon intau in Pilistin noḷagui moiagí-ako totokdon in motoboḻingo.