EZRA 9:12 - Alkitab Singog In Mongondow Masa In Tanaa

¹² Nabi mita tatua in nogimaḷow kon inami sinbá diá motonibuḷoi in intau mita tatua, andeka mobantung kon i monia sinbá mobiag mooyúon bo motompia. Aka kami in motoindudui, kami in mobaḻídon moropot bo mokaandon kon bungai in pinomuḷa kon butá tatua bo mobogoi kon buí nami modapot in mononoi.

EZRA 9:12 ပူးပေါင်းရင်းမြစ်များ

TAWARIKH 1 28:8

Bo ki Daud in nogumandon, “Dá tanaa, ei rayatku, kon tayowon i Allah naton bo kon tayowon in bayongan intau in Israel, umat i Tuhan tanaa, poigumonku in moiko kon totu-totuudon dumudui kon bayongan in parenta i Tuhan Allah naton. Pongin natua dá butá inta mopia tanaa in tantúdon mobaḻí kapunyaanmu bo dapot in poabat kon buímu modapot in mononoi.”

TAWARIKH 2 19:2

nabi tobatú inta ki Yehu in tangoinea ki adí i Hanani namangoi kon tayowon i datu. Nabi tatua noguman kon inia, “Degá patus in ki Tuang datu motuḷung kon intau moraat bo momihak kon intau inta mondoí kon i Tuhan? Oaid i Tuang tatua in nokopopisídon ki Tuhan sinumorú kon i Tuang.

EZRA 9:2

Intau ḷoḷaki in Yahudi notonibuḷoidon in bobay in bangusa ibanea, dá umat inta sinondídon kon i Tuhan in diádon notapis. Nodapotbí inta muna-munamai nomia kon natua in intaubí mita inta sinon itoi bo pojabat in Israel.

IḶUAIAN 23:32

Dika mogaid kon dodandian takin intau mita tatua ande takin ilah mita monia.

AMSAL 13:22

Intau mopia in mopoabatbí in kaoyúonannea kon i adí bo ompunea; kaoyúonan in intau binaradosa in sinagú kon intau inta motuḻid in kobiagannea.

AMSAL 20:7

Adí mita mountung aka oyúon in guyanga ḷoḷaki inta mopia bo motuḻid in kobobiagnea.

YESAYA 1:19

Aka moiko moibog motoindudui kon i-Nakó, moiko in motarimabí kon bayongan inta mopia inta ogoi in butámu.

ULANGAN 23:6

Kon bonu in kobiagan monimu bo modapot in toonuka, dikabí motuḷung kon bangusa mita tatua ande baḻíon monimu mobiag motompia in mosia.

ULANGAN 23:7

Dikabí in moiko diá mopandungmai kon intau in Edom sin mosia tua in ki utatmubí. Dikabí doman in moiko diá mopandungmai kon intau in Mesir, sin moiko in nokoimontandon nogutun kon butá monia.

ULANGAN 7:3

Moiko in diábí motaau motonibuḷoi takin i monia, bo dika doman ogoi in adí mita monimu motonibuḷoi takin i monia,