EZRA 4:4 - Alkitab Singog In Mongondow Masa In Tanaa

⁴ Onda intua intau mita inta ain noonggot in nogutun kon butá tatua nomangkoidon monginggamá kon ibog in intau in Yahudi poḷat doman mopogogondok kon i monia sinbá oaidan tatua pogogaiondon.

EZRA 4:4 ပူးပေါင်းရင်းမြစ်များ

SAMUEL 2 4:1

Buí i Saul ibanea in ki Mepiboset, ki adí i Yonatan ḷoḷaki. Sia in nosedó in bobayánea nongkon umur bagu ḻima notaong, inta kon dodaipa in ki Saul bo ki Yonatan minatoi. Sin kon dodai in habar soaḷ kinopatoian monia namangoi nongkon kotá in Yizreel, bobay moḷoḷukad kon i Mepiboset nokoyot kon inia bo noḷagui; tongá popisí in bobay tatua dongkadon iḻimika-ḻikat totok, adí tatua in noḷabú dá nosedódon. Naonda in kinodongogan i Isyboset adí i Saul ḷoḷaki kon ki Abner in iḻimodon kon Hebron, noinggamádon in ropotnea, bo bayongan in Israel inagíandon in ondok. Ki Isyboset naa in oyúon in porwiranea doyowa inta nobaḻí tongguḷu in tontara mononubu; tobatú tangoinea in ki Baana, bo inta tobatú tangoinea in ki Rekhab. Mosia tua in ki adí i Rimon, nongkon Beerot nongkon suku in Benyamin. (Beerot noitakin kon suku Benyamin. Intau mita taakan kon tua in noḷaguidon komintan kon Gitaim bo nogutun kon tua pinangkoi kon dodai intua.)

EZRA 3:3

Umpaka mosia in moondok kon intau inta nogutun kon butá tatua, tongá noposindogbí doman in mosia in mezbah tatua kon tampatnea inta muna. Bo nomangkoidon in mosia noposumba in kuruban payongon, kon tungkuḷ in doḷo-doḷom bo ḷoḷabungnea.

EZRA 4:5

Mosia in nobogoi in doit kon intau mita moḷoben kon pomarentaan in Persia sinbá monginggamá kon tomayá in intau mita in Yahudi tatua. Tua komintan umuran nobaḻí kon tungkuḷ in pinomarentaan i Datu Kores nodapot kon pinomarentaan i Datu Darius.

NEHEMIA 4:11

Kon tungkuḷ intua musung nami monomayá kon monubu kon inami dumaḻí-daḻí, bo moḻimod kon inami dá oaidan nami in moigogai.

NEHEMIA 4:2

Kon tayowon in totakinnea mita bo tontara in Samaria, sia in noguman, “Onu in koyogot aidan in intau Yahudi nobodito inta diá mokopongonu tua? Degá mosia in moibog moposindog bui in kotá tanaa? Kai monia kamai oaidan tatua in moḷapatbí tosinggai, tongá pongin moposumba in kuruban? Degá apat inta nádon buḷud inta ain nopokak tua in motaau baḻíon batu mita podinding?”

NEHEMIA 6:9

Mosia in moḷongasi mopogogondok kon inami sinbá gogaiandon nami in oaidan tatua. Akuoi in nosambayang, “Oo Allah, iropotai in akuoi!”

YEREMIA 38:4

Dá minayádon in pojabat mita tatua kon i datu bo noguman, “Intau tanaa in mustibí hukumon matoi. Sin pongin singognea natua sia in mokoinggamá kon ibog in bayongan tontara bo intau ibanea inta nogutunpa kon kotá tanaa. Sia in diábí motuḷung kon rayat, táe mopoboditobí kon i monia.”

DANIEL 10:13

Malaekat moḷoḷukad kon dodatuan in Persia noḷawang kon inakó doyowa nopuḷú bo mita nosinggai in koonggotnea. Bo ki Mikhael, tobatú itoi in malaekat mita, namangoi bo notuḷung kon inakó. Sinaḷáanku in sia kon tua, kon Persia.

DANIEL 10:20

Bo sia in notubag, “Kinotaauanmu degá mongo nongonu sin namangoi in akuoi kon inimu? Makusudnea in moguman kon inimu onu inta pinais kon bonu in Buk Kobobanar. Tanaa akuoi in musti mobui sin moparang monayow kon malaekat moḷoḷukad Persia. Nopaḷut mako kon tua malaekat moḷoḷukad kon Yunani in mamangoi. Diábí in motuḷung kon inakó koḻikudbí in ki Mikhael, malaekat moḷoḷukad in Israel, negaramu.