EZRA 3:7 - Alkitab Singog In Mongondow Masa In Tanaa

⁷ Rayat in nobogoidon in doit sin ponondan kon bas mita in batu bo mogogimok mita kon kayu. Mosia in nokidia doman in kaanon, oinumon bo ḷana in zaitun kon kotá mita in Tirus bo Sidon sin ponoḻiu kon kayu ḷokuyú in Libanon nongkon kotá mita tatua. Kayu tatua in dinia kon Yapo pinongin dagat. Tua komintan inaidan in rayat pinodoyon kon parenta i Kores, datu in Persia.

EZRA 3:7 ပူးပေါင်းရင်းမြစ်များ

SAMUEL 2 5:11

Ki Datu Hiram nongkon Tirus nopotabá in intaunea mita moḷoben namangoi kon i Daud, bo kayu mita ḷokuyú in Libanon bo mogogimok mita kon kayu takin intau mita inta motaau mopoyoguntuḷ mita in batu sin moposindog in komaḻig.

DATU MITA IMITÁNEA 5:6

Kinotaauan bidon i Tuang, kon sigad in rayatku mita diábí in intau inta mopandoi momupuḷ kon kayu ná rayat i Tuang. Tuamai, akuoi in mopoigum aka motaau dá potabápa i Tuang in intau mita i Tuang momupuḷ kon kayu mita in ḷokuyú in Libanon sin pakéonku. Potabákubí in rayatku mita moduḷu kon i monia, bo tongonukabí in tondan inta tantúon i Tuang ogoi kon intau mita i Tuang tua, uboḻiankubí.”

DATU MITA 2 12:10

Pomuḷoi in aka doit kon bonu in kas tatua mobayongdon, momomais i datu takin Imang Moḷoben mamangoi bo mogiap kon doit tatua, bodongka bakuton.

DATU MITA 2 12:13

Táe doit tatua in diábí in topiḻikmai in pakéon kon pomiaan kon pongonginuman inta nongkon saḷaka, palo, torompet, pakakat mita in togá andeka pakakat mita ibanea nongkon buḷawan andeka saḷaka.

TAWARIKH 2 34:10

Doit tatua in noiduduimai inogoi i Imang Moḷoben ki Hilkia kon intau toḷu inta pinoki ḷukadan kon ponompiaan kon Baḷoi Tuhan tatua. Noiduduimai kon tua inogoi monia in doit tatua

EZRA 3:6

Umpaka Baḷoi Tuhan diápa pinangkoi pinosindog, táe kon singgai imitánea buḷan impitunea, rayat nomangkoidon notubá kon kuruban kon i Tuhan.

YEHEZKIEL 27:17

Yohuda bo Israel in noponoḻiu in pakakat daganganmu in gandum, biluk, ḷana in zaitun bo toyokayu mita.

YUNUS 1:3

Táe ki Yunus in tongábí minayá in kotá ibanea sin yumayú kon i Tuhan. Sia in minayá in Yope, noikoḷatbí nokouḻí kon kapaḷ inta mopobayá in Spanyol. Naonda in noguboḻi mako kon tondan in takoiannea, sinumakoidon in sia kon kapaḷ, bo dongka iḷumeag noyotakin in intau mita in kapaḷ nopobayá in Spanyol, sin yumayú kon i Tuhan.

OUMAN IN RASUL MITA 12:20

Ki Herodes in totokdon sinumorú kon intau mita in Tirus bo Sidon. Manangka intua mosia in noyotakin minayá kon tayowonnea. Muna in mosia nodondouḷug kon i Blastus, inta nobaḻí itoi kon komaḻig i Herodes, dá sinuḷungannea in mosia. Onda intua minayá in mosia kon i Herodes bo nopoigum sinbá moyodamedon, sin kaanon intau mita kon ḻipú monia in tongábí mouḻí nongkon butá inta kon bonu in kawasa i Herodes.

OUMAN IN RASUL MITA 9:36

Kon ḻipú tatua oyúon doman in bobay, tangoinea in ki Tabita. Sia in tobatú intau inta mopirisaya kon i Yesus. (Aka kon Yunani, ki Dorkas in tangoinea.) Sia in umuran mogaid kon inta mopia bo umuran moibog motuḷung kon intau mita inta nobiag nobogá.

OUMAN IN RASUL MITA 9:38

Lantaran ḻipú in Lida nodiug kon Yope, dá naonda in intau mita inta mopirisaya kon i Yesus nokodongog kon ki Petrus in oyúon kon tua, binayá monia bo pinoki oiní kon intau doyowa takin koyow nanaa, “Ḷagipa angoi in naa.”

OUMAN IN RASUL MITA 9:43

Nopaḷut mako kon tua ki Petrus in nogutunpa tongonumai nosinggai kon Yope kon baḷoi i Simon, intau inta mororubus kon kuḻit.