EZRA 1:7 - Alkitab Singog In Mongondow Masa In Tanaa

⁷ Ki Kores nopoḷuai in mangko mita bo galas mita inta paraḷu pakéon kon Baḷoi Tuhan kon Yerusalem. Pakakat mita tatua in inakutdon i Datu Nebukadnezar bo inukat kon bonu in kuil i dewanea mita tontaní.

EZRA 1:7 ပူးပေါင်းရင်းမြစ်များ

DATU MITA 2 24:13

Bayongan in pakakat buḷawan inta pinomia i Datu Salomo sin pakéon kon Baḷoi Tuhan, pinoguraat i Nebukadnezar. Bo bayongan in pakakat inta koboḻi inta kon bonu in Baḷoi Tuhan tatua bo kon komaḻig in dinianea minayá in Babel. Bayongan intua nobaḻí noidudui kon onu inta ain siningog i Tuhan muna.

TAWARIKH 2 36:10

Kon pinoyoḻimbanan in taong, ki Datu Nebukadnezar nogakut kon i Yoyakhin pinobayá in Babel nobaḻí intau inta dinakop, bo pakakat mita inta koboḻi kon Baḷoi Tuhan in dinianea doman. Onda intua ki Nebukadnezar noduí kon i Zedekia, pokuamáan ki Yoyakhin, nobaḻí datu in Yohuda bo Yerusalem.

TAWARIKH 2 36:18

Pakakat mita in Baḷoi Tuhan, bo pakakatnea mita inta koboḻi, takin doman kapunyaan in datu bo in pogawainea mita, komintan inagow i datu in Babel bo dinia kon Babel.

TAWARIKH 2 36:7

Tongosilai in pakakat mita koboḻi kon Baḷoi Tuhan in dinia i Nebukadnezar bo inukat kon bonu in komaḻignea kon Babel.

EZRA 5:14

Nodapotbí in pinobuineadon bui in pakakat mita buḷawan bo saḷaka inta pinaké kon bonu in Baḷoi Tuhan bo inta ginamá nongkon Yerusalem i Nebukadnezar bo inukat kon bonu in kuil kon Babel. Pakakat mita tatua in inogoi bui i Datu Kores kon intau inta ki Sesbazar, inta ain dinuínea nobaḻí gubernur in Yohuda.

EZRA 6:5

Bo pakakat doman mita in buḷawan bo saḷaka inta pinaké kon Baḷoi Tuhan bo inta ain ginamá nongkon Yerusalem i Datu Nebukadnezar bo dinia pinobayá in Babel, musti pobuion kon tampatnea inta muna.”

YEREMIA 51:44

Bel, dewa in butá in Babel, in hukumon-Kubí. Baḻíon-Ku in sia mopobui kon onu inta ain inagownea. Bangusa mita in diá bidon mosumba kon inia. Dinding mita in Babel in norumbundon.

DANIEL 1:2

Inogoi i Tuhan in sia in nonaḷow kon i Datu Yoyakin bo poḷat nogagow kon tongosilai in pakakat mita inta koboḻi kon Baḷoi Tuhan. Intau mita inta sinokodakopnea, dinianea kon kuil in dewanea kon Babel, bo pakakat mita inta koboḻi inta inagownea, sinagúnea kon bonu in gudang mita in kuil tatua.

DANIEL 5:23

Ki Tuangku in dinumodia kon i Tuhan kon soroga bo nokobaḻí nokidia mangoi kon naa in bayongan palo mita inta ain inagow nongkon Baḷoi i Tuhan. Bo ki Tuangku takin intau mita moḷoben, bo ki buḷoi mita i Tuangku takin pahang mita i Tuangku in nonginum nomaké in palo mita tatua. Ki Tuangku in nodayow kon dewa mita inta pinomia nongkon buḷawan, saḷaka, bitú, uatoi, kayu bo batu, dewa mita inta diá mokoontong andeka mokodongog andeka momangaḻe kon onuka. Ki Tuangku in diá mohoromat kon i Allah inta nonantú kon kobiagan bo kopatoian i Tuangku bo inta monantú kon daḷan kobiagan i Tuangku.