ESTER 4:14 - Alkitab Singog In Mongondow Masa In Tanaa

¹⁴ Intau in Yahudi in notantúbí kon mokouḻí kon totuḷung naondaka in daḷannea modapot in mosia mosaḷamat. Táe aka iko bo tongá kibio-biómai kon bonu in kaadaan ná tanaa, yo iko tontaní in matoibí doman bo motoḷuadí i amámu in modait bidon in oumannea. Dika bo dika, iko in piniḻí bokí popisíbí in kaadaan ná tanaa!”

ESTER 4:14 ပူးပေါင်းရင်းမြစ်များ

KINOBAḺIAN 22:14

Tampat tatua sinangoian i Abraham “Ki Tuhan noposadia onu inta paraḷu”. Bo dapot in masai naa intau moguman “Kon tudu in buḷud-Nea ki Tuhan moposadia kon onu inta paraḷuon”.

DATU MITA 2 13:5

Ki Tuhan in nobogoi in itoi tobatú kon Israel inta moḷuat kon i monia nongkon kawasa in Siria dá mosia in mobiag motompiadon bui ná dungkuḷmai.

DATU MITA 2 19:3

Naa in koyow i Hizkia inta pinotaau monia kon i Yesaya, “Singgai in naa singgai inta mokorobonoḷ kon gina, ihukum in kita bo pinopoompámai. Kita naa in naonda bo bobay inta mononggadídon táe kinodaitandon in ropot.

EZRA 9:9

Kon tungkuḷ in kami kon pinononggataanpa, diábí sinaḷáan-Mu in kami. Binaḻí-Mu in kami kinotabi in datu mita in Persia bo pinomayá mako in nobiag bo noposindog bui in Baḷoi-Mu inta dongkadon rumbunnea tua. Iḷukadan-Mu in kami in kon naa, kon Yohuda bo kon Yerusalem.

NEHEMIA 6:11

Táe akuoi in notubag, “Akuoi naa in deemanbí intau inta moibog moḷagui. Saḷaku intau biasa diábí motaau in akuoi tumuot kon Baḷoi Tuhan, sin matoi in akuoi. Diá, doíbí in akuoi!”

ESTER 2:15

Dá noidapotdon kon i Ester in wakutu mayá in tayowon i datu. – Ki Ester in ki adí i Abihail inta ki adí in doyowa mogutat i Mordekhai intau inta nomaḻí kon i Ester ki adínea tontaní; ki Ester in kinosanang in bayongan intau inta mokoontong kon inia. Naonda ain sia minayá kon tayowon i datu, ki Ester in nogiḷambung in ḷambung podudui in topotundú bo tonggina i Hegai, tongguḷu in komaḻig in bobay.

ESTER 2:17

Siabí in kinosanang bo kinopia in gina i datu nongkon sigad in mongodeaga mita ibanea. Tuamai in kinotabi totok i datu in sia. Dá pinopoḷutudandon i datu in mahkota in dodatuan in uḷu i Ester bo binaḻí bokí in sia nomaḷui kon i Bokí Wasti.

ESTER 2:7

Oyúon in ki adí in doyowa mogutatnea bobay, mongodeaga moḷunat bo mopia in pongogawaknea, tangoinea in ki Ester, aka tangoi in Ibrani yo ki Hadasa. Guyanga i Ester naa in minatoidon bo sia in binaḻí i Mordekhai ki adínea bo biniag ná onda bo ki adínea tontaní.

ESTER 4:13

Dá ki Mordekhai in nokidia in tompoingat tanaa kon i Ester, “Dikabí kainimu kamai dá iko in moiḷaguibí kon intau mita in Yahudi ibanea, tongá popisí in iko nogutun kon komaḻig!

ESTER 4:15

Dá ki Ester in nokidia in habar tanaa kon i Mordekhai,

AYUB 9:18

Diábí pinomayá-Nea in akuoi mogina umpaka tongá motoyong; nodapot in pinopoumaan-Nea akuoi in inta mopait totok inta motoyang.

MOHOHUTUBA 3:7

wakutu momerak bo wakutu modagum, wakutu kibio-biómai bo wakutu mosingog.

YESAYA 49:23

Datu mita in naondadon bo ki amámu, bo bokí mita in nobaḻí ki inámu. Mosia in tumungkudbí mohoromat kon inimu bo tumonsiup kon inimu. Dá kotaauanmudon kon Akuoi in ki Tuhan; intau inta inumandoḷ kon i-Nakó in diábí pokuyangon in gina.”

YESAYA 54:17

Táe batúan in sonjata inta sinontaḷ sin moḷawang kon inimu, in diábí motuoi. Bo bayongan in inta pinonapud kon bonu in pongadilan in poniatamubí kon diá totuu. Akuoi in mobogoibí in tombuinag kountungan kon mogogundoi-Ku mita,” natuata in singog i Tuhan.

YEREMIA 30:11

Akuoi in mamangoibí bo moiko in posaḷamaton-Kubí. Bangusa mita, inta pinoporaritan-Ku kon i monimu komintanbí yopúon-Ku, táe moiko in diábí pomiaan-Ku natua. Memang moiko in diábí moiḷagui kon hukuman táe hukuman-Ku kon i monimu in moadilbí podudui in inta ain sinantú. Akuoi, ki Tuhan ain nosingog.”

YEREMIA 46:28

Dá dikabí moondok, ei umat-Ku, Akuoi in mamangoibí sin moposaḷamat kon i monimu. Bangusa mita, inta pinoporaritan-Ku kon i monimu, komintanbí yopúon-Ku, táe moiko in diábí pomiaan-Ku natua. Totuu kon moiko in diábí moiḷagui nongkon hukuman táe hukuman-Ku kon i monimu in moadilbí podudui in inta ain sinantú. Akuoi, ki Tuhan, ain nosingog.”

IMAMAT 26:42

yo toropon-Kudon in dodandian-Ku takin i Yakub, i Ishak bo i Abraham. Toimbaguon-Kudon in dodandian-Ku sin mobogoi in butá tatua kon bangusa-Ku.

MATIUS 16:18

Bo Akuoi in moguman doman kon inimu, iko in ki Petrus, kon tudu in batu karang tanaa posindogon-Ku in jamaat-Ku; bo diábí in mokotaḷow umpakabí popatoi!

MATIUS 24:22

Bo aka kuma bo wakutunea naa bo diá impoḷokan; yo kon bayongan inta nobiag diábí in mosaḷamat. Tongá popisí in intau mita inta sinokopiḻídon dá wakutu tatua inimpoḷokandon.

ULANGAN 32:36

Ki Tuhan in moposaḷamat kon umat-Nea bo motabidon kon mogogundoi-Nea mita, aka ontongon-Nea in mosia diádon kodaya bo kinodaitandon in ropot.

HAKIM MITA 15:6

Intau mita in Pilistin minayá notayak mongo ki ine in nomia kon tua. Bo pinotaaudon in intau kon ki Simsonbí in nomia kon tua, sin ki nunutonnea kon Timna ain nobogoi kon i buḷoi Simson kon yobayat tobatú i Simson. Tuamai intau mita in Pilistin nonurub kon bobay tatua takin tombonu in baḷoi amánea dapot in nopayong.

SAMUEL 1 12:22

Ki Tuhan ain nongibot, kon Sia in diábí monaḷámai kon i monimu sin Sia ain nonantú kon umat-Nea tontaní.

SAMUEL 1 17:29

Tubag i Daud, “Onu in taḷáku? Akuoi naa in tongábí noḻibó!”