EPESUS 6:6 - Alkitab Singog In Mongondow Masa In Tanaa

⁶ Tua inaidan monimu, deemanbí tongá kon wakutu in koonto-ontongnea mako, sinbá dayowonnea in moiko. Táe aidaibí monimu intua saḷaku mogogundoi i Kristus inta dinumudui kon koibog i Allah takin gina motuḻid.

EPESUS 6:6 ပူးပေါင်းရင်းမြစ်များ

YEREMIA 24:7

Akuoi in mobogoibí kon i monia in ibog sinbá momangaḻe kon Akuoibí in Tuhan. Dá mosia in mobaḻídon umat-Ku, bo Akuoi in mobaḻí Allah monia, popisí in mosia mobuidon mangoi kon i-Nakó takin ḻimbatú in gina.

YEREMIA 3:10

Naonda in nogaid kon tua mita, Yohuda inta diá mosatia tua nobui kon i-Nakó táe tongá ki ubo-uboḷmai, sin ginanea in diábí notuḻid. Akuoi, ki Tuhan, ain nosingog.”

MATIUS 12:50

Sin ki inekabí inta mogaid kon inta kinoibog i Amá-Ku kon soroga, yo sia tua in ki utat-Ku mita ḷoḷaki, bo ki utat-Ku bobay, bo sia in ki iná-Ku doman.”

MATIUS 7:21

“Diábí komintan intau inta mogoiní kon i-Nakó, ‘Tuhan, Tuhan,’ in mobaḻí umat-Ku, táe tongábí mosia inta dinumudui kon koibog i Amá-Ku inta kon soroga.

MARKUS 3:35

Intau inta dinumudui kon ibog i Allah, siabí tua in ki utat-Ku ḷoḷaki bo ki utat-Ku mita bobay bo ki iná-Ku.”

SURAT I PAULUS KON JAMAAT RUM 6:17

Táe sukurdon kon i Allah! Sin tungkuḷ intua moiko in nobaḻí ki ata in dosa, táe masai naa moiko in motoinduduidon totok kon totundú inta noitutui inta ain inogoi kon i monimu.

KORINTUS 1 7:22

Sin ata inta mopirisaya kon i Tuhan, nobaḻí bidon intau i Tuhan inta nobebas. Bo intau nobebas inta nopirisayadon kon i Tuhan, nobaḻí bidon mogogaid kon oaidan i Tuhan Yesus Kristus.

GALATIA 1:10

Yo naonda degá in naa: Motayak degá in akuoi kon inta mokosanang kon gina in intau andeka inta mokosanang kon gina i Allah? Andeka ontongon monimu degá akuoi in mokopopia kon intau, sinbá kosanang in intau? Aka natua in oaidku, yo akuoi naa in deemanbí bobantung i Kristus.

EPESUS 5:17

Dika mokopobodok, táe tayakdon kopira mongo onu in kinoibog i Tuhan.

PILIPI 2:12

Utat mita inta kotabiku, moiko umuranbí kodu-kodudui kon inakó wakutu in akuoi koyota-yotakinpa monimu, tuamai poigumonku kon i monimu, umpaka in kita nogiyayúandon táe umuranbí ramuji aidai onu inta kinoibog i Allah. Sin moiko aindon pinosaḷamat i Allah, tuamai umuran ramuji sinbá iko in mobiag mosompurna. Mokopoendar in mogaid kon tua komintan podudui kon inta kinoibog i Allah.

KOLOSE 1:9

Manangka intua umurandon sambayangan nami in moiko naonda in kinodongogandon nami in habar soaḷ moiko. Kami in mopoigum kon i Allah sinbá moiko in mobijaksana bo mopandoi popisí in kawasa in Roho i Tuhan, sahingga in kotaauandon totok monimu onu in kinoibog i Allah.

KOLOSE 4:12

Salam doman nongkon i Epapras. Sia naa intau doman nongkon sigad monimu. Mosia naa in mogogaid doman kon oaidan i Kristus inta umuran mosatia in mosambayang sin kopontingan monimu. Sia totok in mopoigum kon i Allah sinbá mobaḻídon moropot in koyakinan monimu, bo totu-totuudon moguyang in moiko sinbá totu-totuu domandon dumudui kon ibog i Allah.

TESALONIKA 1 2:4

Deemanbí natua! Kami in diábí mosingog sin moposanang kon gina in intau, táe moposanangbí in gina i Allah inta umuran noguji kon gina nami. Sin inanggap-Nea kon kami naa in motaaubí mopotaa-taau mako in Habar Mopia tatua.

TESALONIKA 1 4:3

Nanaa in kinoibog i Allah: Ibogon-Nea moiko in mobiag tongábí kon bonu in kawasa-Nea; mobiag modarit kon bayongan in yagi-yagi bo yumayú kon oaid mita mokotor bo inta diá mopia.

IBRANI 10:36

Mokoposabarbí in moiko, sinbá motaaupa mogaid kon onu inta kinoibog i Allah, sahingga in tarimaanbí monimu in onu inta pinodandi i Allah tua.

IBRANI 13:21

Poigum mako, ki Allah inta nobaḻí pangkoi in kobiagan motompia, umuran mobogoi in bayongan inta mopia inta paraḷu pakéon monimu mogaid kon onu inta koibog i Allah. Bo poigumon doman mako takin totuḷung i Yesus Kristus, popoaidon i Allah kon i naton in onu inta kinoibog-Nea. Tantúbí dayow in ki Kristus dapot in kopaḷutannea! Amin.

PETRUS 1 2:15

Sin ibogon i Allah bá oaid monimu inta mopia tua in momompon kon bibig in intau inta tongá kinosingo-singognea.

PETRUS 1 4:2

Manangka intua, kobiagdon in moiko kon singgai moiduduimai podudui in onu inta kinoibog i Allah, bo deemanbí dumudui kon ibog in intau.

YOHANES 1 2:17

Dunia naa bo bayongan tombonunea inta kinoibog in intau koyogotdon in moyoyang. Táe intau inta dinumudui kon ibog i Allah, i mobiagbí mononoi.