EPESUS 6:10 - Alkitab Singog In Mongondow Masa In Tanaa

¹⁰ Naa in singogku pangabisan, paké in ropot inta nouḻí monimu nongkon kawasa i Tuhan, sin moiko in notobatúdon takin-Nea.

EPESUS 6:10 ပူးပေါင်းရင်းမြစ်များ

TAWARIKH 1 28:10

Toropdon kopira kon ki Tuhan in nomiḻídon kon inimu sin moposindog in baḷoi inta ain sinantú kon i-Nia. Dá tanaa in aidaidon intua takin ibog moḷoben.”

TAWARIKH 1 28:20

Onda intua ki Datu Daud noguman bui kon i Salomo adínea ḷoḷaki. “Iko in musti mokopoyakin bo mokopobarani. Pangkoidon in oaidan tatua bo dika moondok kon onuka. Ki Tuhan Allah inta sinumbaku in motuḷungbí kon inimu. Diábí in Sia monaḷámai kon inimu. Umuran-Neabí takinan in iko modapot in moḷapatdon komintan in oaidan tatua.

TAWARIKH 2 15:7

Táe moiko in mustibí mokoporoton kon gina bo mokopobarani. Onu in totayakmu in kodapotanmubí.”

MAZMUR 138:3

Kon tungkuḷ in akuoi nokuani kon ini-Mu, Iko in notubag, inirigonan-Mu in ginaku dá nobaranidon in akuoi.

YESAYA 40:28

Umpaka dá iko in diá nonotaau bo diá nokodongog? Ki Tuhanbí in Allah inta mononoi, inta nomaḻí kon sinangkub in dunia. Sia in diábí kon dodai in onda in moḷopí andeka moḷungkoyó; raian-Nea in diábí motaau doḷopon.

YESAYA 40:31

Táe intau inta mopongata kon i Tuhan, in mokouḻí kon ropot mobagu. Mosia in naonda bo ḷagapan boniá inta ḷumayug moonik mopongata in koḻikipnea. Mosia in moribatuk bo diábí moḷopí, mosia in mayá bo diábí moḷungkoyó.

HAGAI 2:4

Tongá, donaaidon moinggamá in kamang, ei moiko komintan! Ingguputaidon in oaidan tatua, sin Akuoi in umuranbí motuḷung kon i monimu.

ZAKHARIA 8:13

Ei intau in Yohuda bo Israel! Kon tungkuḷ intua, aka intau ango-angoi mosikutukandon, yo mosia in moguman, ‘Igumon mako bodito inta noiuma kon Yohuda bo israel in moiuma doman kon inimu!’ Táe Akuoi in moposaḷamatbí kon i monimu, dá intau mita ango-angoi tatua in mosigumanan, ‘Igumon mako barakat inta moiponag kon Yohuda bo Israel, moiponag doman kon inimu!’ Tuamai in koropotdon in ginamu bo dika moondok!”

ZAKHARIA 8:9

Ki Tuhan in noguman kon umat-Nea, “Koropot in ginamu! Tanaa moiko in nokodongogdon kon tosingogon mita inta ain doman siningog in nabi kon dodai in dodatoḷan inukat, sin moposindog bui in Baḷoi-Ku.

KORINTUS 1 16:13

Umuran mokopoingat! Sindog kotorindog kon bonu in pirisayamu saḷaku intau Keresten. Mokopobarani bo mokoporopot!

KORINTUS 2 13:11

Naa in tongginaku pangabisan kon i monimu utatku mita, mokoposanangdon kon gina bo poramujidon sinbá umuran mobiag mosompurna. Umuran kon gina-gina mako in tongginaku mita naa. Umuran motobatú kon gina bo kon raian bo umuran mototabian. Sin ki Allah inta nobaḻí dodoyonan totabi bo kobiagan inta mopia, umuran kotaki-takin monimu.

EPESUS 1:19

bo moḷoben totok in kawasa-Nea kon i naton inta mopirisaya, notongkai in ropot in kawasa-Nea inta moḷoben

EPESUS 3:16

Mosambayang in akuoi sinbá ki Allah inta totok in momulia tua in moibog moginrigon kon batinmu takin Roho-Nea.

ULANGAN 31:23

Onda intua ki Tuhan noguman kon i Yosua, adí i Nun, kai-Nia, “Korigon in gina bo kobarani in iko, Yosua! Iko in modia kon bangusa Israel tumuot kon butá inta pinodandi-Ku kon i monia, bo akuoi in motuḷung kon i monia.”

PILIPI 3:1

Pangabisannea, pogumanku kon i monimu utatku mita, kosanangdon in gina monimu, sin moiko ain notobatú i Tuhan. Diábí mobú in akuoi in momais bui kon onu inta ain pinaisku koḻipod kon i monimu; sin kopiaanbí monimu intua.

PILIPI 4:13

Kawasa inta inogoi i Kristus kon inakó umuran mobogoi in ropot kon inakó in tumayow kon kaadaan noyagi-yagimai.

PILIPI 4:8

Naa in simpod in singogku utat mita, porai kon onu inta oyúon in baragunanea, bo onu inta motaau dayowon, ná soaḷ mita inta moitutui, inta horomatonmai, inta moadil, modarit, inta moromimit bo inta mopia.

KOLOSE 1:11

Igumondon mako, sinbá kawasa i Allah inta momulia in tantú moginrigon kon i monimu, sahingga in umuran mosanang bo mopia in gina monimu wakutu in moyogintayow in bayongan roriga

TIMOTIUS 2 2:1

Uḻe Timotius adíku! Totabi inta inogoi kon i naton sin notobatúdon i Kristus in kita, baḻí intua dodoyonan inta mokoroton kon inimu.

TIMOTIUS 2 4:17

Táe akuoi in umuranbí iḷukadan i Tuhan; bo inogoian-Neadon in ropot in akuoi sahingga in nokosanggupdon nopoyaput in Habar Mopia tatua, sinbá kodongogan domandon in bayongan intau inta deeman Yahudi, sahingga in akuoi noipilatdon nongkon onu inta mokobodito kon inakó.

YOSUA 1:9

Pokotorop, Akuoi ain nomarenta kon inimu sinbá totu-totuudon in iko moyakin bo mobarani! Dika in iko moondok ande mogagawang, sin Akuoi ki Tuhan Allahmu in umuranbí kotaki-takinmu kon ondakabí in bayáanmu.”

PETRUS 1 3:8

Naa in kasimpulannea: utat mita poramuji mobiag motobatú kon tosingogon bo porasaan. Moiko in musti umuran mositabian ná doyowa mogutat. Moiko in musti doman mosituḷungan bo mokopoompá kon dodia.

PETRUS 1 4:11

Intau inta mopoyaput in habar, sia mustibí mopoyaput in habar nongkon i Allah, intau inta mobantung kon intau ibanea, mustibí pakéonnea in ropot inta nongkon i Allah, sinbá kon bayongan in yagi-yagi ki Allah in dayowon pongin i Yesus Kristus. Sia tua in kitogi kamuliaan bo kawasa inta mononoi. Amin.

PETRUS 1 5:10

Táe naonda in moiko nokorasa kon roriga motoyong, yo ki Allah tontaní in moposompurna kon i monimu. Potorindogon-Nea bo iropotan in moiko. Sin Sia in Allahbí inta totok mopia in gina, inta ain nogoiní kon i monimu sinbá moitakin doman mokorasa kon kopia-Nea inta mononoi pongin i Kristus.

YOHANES 1 2:14

Uḻe Adíku mita, akuoi in nomais kon naa kon i monimu, sin moiko in nonotaaudon kon i Amá. Pinaisku in naa kon i monimu amá mita, sin moiko in nonotaaudon kon i-Nia inta oyúondon nongkon pinomangkoianmai. Pinaisku in naa kon i monimu intau mita inta nongobagupa, sin moiko in moropot. Singog i Allah noitonop kon bonu in ginamu, bo sinaḷowdon monimu ki Inta Moraat.

SAMUEL 1 23:16

Ki Yonatan in minayá nokipodungkuḷ kon inia kon tua sin mogin rigon kon pirisayanea kon sia in ḷukadanbí i Allah.