EPESUS 5:3 - Alkitab Singog In Mongondow Masa In Tanaa

³ Moiko nion umat i Allah, tuamai in aid mita inta mokotor bo inta diá patus aidan, andeka ibog inta moiḻiu dika aidan kon sigad monimu sinbá diá in dodoyonan intau mita mopotaḷá kon i monimu.

EPESUS 5:3 ပူးပေါင်းရင်းမြစ်များ

MAZMUR 10:3

Intau moraat mongambungangaḷ kon onu in koibognea inta moraat, intau motamaa mongutuk bo mondoí kon i Tuhan.

MAZMUR 119:36

Ogoiaidon in akuoi in ibog dumudui kon atorang-Mu, moiḻiu kon ibog mobaḻí mooyúon.

IḶUAIAN 18:21

Táe kon ḻikud intua iko mustibí momiḻí kon tongonumai intau ḷoḷaki inta mobijaksana, bo momiḻí kon i monia mobaḻí itoi kon intau toribu, itoi kon intau mogatut, itoi kon intau ḻima nopuḷú, bo itoi kon intau mopuḷú. Mosia tua in mustibí intau inta motoguondok bo motoindudui kon i Allah, motaau pirisayaan bo doí mogabat kon doit inta poguboḻi kon pelekara.

IḶUAIAN 20:17

Dika moibog in sinitogi in intau ibanea: baḷoinea, ki buḷoinea bobay, atanea mita, bobiagonnea, keledainea, ande onuka inta nobaḻí sinitoginea.”

IḶUAIAN 23:13

Pononggina mako in bayongan inta ain pinoguman-Ku kon inimu. Dika mosumba kon ilah mita ibanea, modapot in tongá monangoi kon tangoinea diábí motaau.”

AMSAL 28:16

Mongogawasa inta mondorot kon intau ibanea, diábí koraian inta mopia; mongogawasa inta doí kon inta motombogá in momarentabí kon taongannea.

YEREMIA 22:17

Táe iko, Yoyakim, in toposibí. Iko in tongábí motayak kon kauntungan tontaní. Iko in moḻimod kon intau inta diá kotaḷá, bo mondorot kon rayatmu takin aid moḻingá.

YEREMIA 6:13

Mosia komintan pinomayá mointok andeka moḷoben, motayakbí kon kauntungan podoyon kon aid diá motuḻid. Nodapot in nabi bo imang monguboḷ kon intau.

YEREMIA 8:10

Tuamai Akuoi in mobogoidon in gobá monia kon i togi butá ibanea, bo ki buḷoi monia kon intau ibanea. Mosia komintan, moḷoben andeka mointok, motayak kon kauntungan pongin aid inta diá motuḻid. Nodapot in nabi bo imang in monguboḷ doman kon intau.

YEHEZKIEL 33:31

Mosia in namangoi moyo-moyokapung bo saḷaku umat-Ku ḻimitú in mosia mokidongog kon tosingogonmu mita, táe onu in pokiaidmu diábí duduian monia. Bibig monia in moguman kon tosingogon mita motabi, táe gina monia in tongábí morai kon kauntungan.

IMAMAT 15:18

Naonda in mopaḷut mako mosiug moyotakin, pinomayá ḷoḷaki ande bobay yo mustibí moinggú, táe mosia in umuranbí doman monajis modapot kon mata in singgai tumoyop.

MIKHA 2:2

Aka mosia moibog in gobá, yo agowon monia. Aka moibog in mosia in baḷoi tobatú, yo tuoton monia. Pinomayá kapunyaan andeka motoḷuadí, diábí in moaman.

PINOGIAPAN 25:1

Kon dodai intua bangusa Israel nogutun kon Ḷopá in Sitim, Intau mita ḷoḷaki monia nomangkoidon nonuaḻing takin bobay mita in Moab inta nogutun kon tua.

MATIUS 15:19

Sin nongkon bonu in gina momuká in bayongan raian inta moraat, poḷoḻimod, pononuaḻing, pogogaid kon inta moromú pononakow, ibot inta diá totuu bo rebeg.

LUKAS 12:15

Noiduduimai kon tua ki Yesus in noguman kon intau moantó kon tua, “Mokopopia in moiko bo umuran kiḷuka-ḷukadmai sinbá diá modunia, sin umpakabí moantó totok in kapunyaan, táe kobiagan mononoi tua in diábí sinantú in kapunyaan tatua.”

LUKAS 16:14

Onu in siningog i Yesus tatua dinongog in intau mita in Parisi táe tongá kinosingan monia, sin mosia tua in dinoit.

OUMAN IN RASUL MITA 15:20

Táe kita in momaisdon kon surat bo mononggina kon i monia, sinbá donaai in mokaan kon kaanon inta ain pinosumba kon dewa, andeka mokaan kon tapú in mahaḷuk inta sinagangan, andeka mokaan kon dugúnea. Bo bá umuran mokopoyayú in mosia kon oaid mita inta mokotor.

OUMAN IN RASUL MITA 20:33

Diápabí kon dodai onda akuoi nohaga in doit andeka pakeang nongkon intau ibanea.

SURAT I PAULUS KON JAMAAT RUM 1:29

Gina monia in nopuḻingdon yagi-yagi inta moraat, inta diá nobanar, moturá, aid mokotor, yoyaatan gina; ibog moḻimod, ibog moropatoi, ibog monguboḷ bo motagú kon gina bo moibo-ibog doman mongonguman kon soaḷ intau ibanea,

SURAT I PAULUS KON JAMAAT RUM 16:2

Tarimadon in sia saḷaku tobatú umat i Tuhan. Mustibí natua in intau mita inta mopirisaya mositarimaan. Tuḷungai in sia aka oyúon in paraḷunea kon i monimu, sin sia tontaní ain notuḷung kon intau mobayong bo kon inakó doman.

SURAT I PAULUS KON JAMAAT RUM 6:13

Bo dika domandon posarakan in awakmu kon kawasa in dosa sin pakéonnea mogaid kon inta mongoraat. Táe posarakaidon in awakmu kon i Allah saḷaku intau inta ain pinamping nongkon kawasa in popatoi bo pinobayá in kawasa inta mokobiag. Posarakaidon in awakmu komintan kon i Allah sinbá pakéon mogaid kon onu in kinoibog-Nea.

KORINTUS 1 10:8

Kita in diábí motaau in mogaid kon diá mopia ná inta inaidan in tongonumai intau kon sigad monia, sahingga doyowa nopuḷú bo toḷu noribu in intau in minatoi kon sigad monia in singgai tatua.

KORINTUS 1 5:1

Akuoi in sabanarnea nokodongog bidon kon lapuran kon naanta oyúon bidon kon sigad monimu in moibog mogaid kon inta mokotor: Oyúon in kon sigad monimu in nonuaḻing takin i inánea uatok. Intaupa inta diá nonotaau kon i Tuhan diábí doman mogaid kon natua!

KORINTUS 1 6:13

Oyúon doman in nosingog kon kaanon tua in pinobonubí kon sian, sin sianbí in sinantú tampatnea. Táe sian bo kaanon tumpaḷabí diá in baraguna kon i Allah. Tuamai pakébí in awakmu mogaid kon onu inta kinoibog i Tuhan, deemanbí mogaid kon inta kinodoí-Nea sahingga in umuran-Neabí ḷukadan in awakmu.

KORINTUS 1 6:18

Manangka intua poyayúdon oaid mita inta diá mopia. Sin bayongan in oaid diá mopia inta inaidan intau tatua in komintanbí nobaḻí kon ḷuai in awak intau. Táe intau inta umuran mogaid kon inta diá mopia kon intau ibanea, tua in ná bí doman onda bo nopoaid in diá mopia kon awaknea tontaní.

KORINTUS 2 12:21

Moḻia-ḻiaw doman in ginaku sin dikabo naonda in akuoi mamangoi bui, popoompáan i Allah in akuoi kon tayowon monimu, bo mongombaḷ in akuoi sin nobayongdon in kon sigad monimu in nogaid kon dosa wakutu intua bo diápa doman nobaḷui, bo tantúpa doman nogaid kon oaid mita inta moraat totok bo inta diá patus aidan i intau inta mopirisaya.

EPESUS 5:12

Sin onu inta inaidan monia inta inumuni-uni tua, umpaka tongá ouman yo mokooyádon.)

EPESUS 5:5

Torop in singogku tanaa: intau inta mokotor in oaidnea, andeka inta mogaid kon inta diá patus aidan, andeka ibog inta moiḻiu (aid natua notongkaibí in aid mosumba kon berhala ibanea), dá intau mita natua in diábí baḻíon umat inta pinarentaan i Kristus bo i Allah.

PILIPI 1:27

Dá tuamai naa in poigumonku, kobiagbí in moiko podudui in onu inta pinoigum kon bonu in Habar Mopia i Kristus, sinbá aka moiangoi in akuoi yo diá bo diá kodongogankudon, kon moiko in umuranbí notobatú kon gina bo raian in moramuji mogaid kon onu inta pinirisaya podudui in Habar Mopia nongkon i Allah.

KOLOSE 3:5

Tuamai Inggamáaidon in ibog mita in dunia inta umuran monuyayow kon i monimu, ná oaid inta mokotor, oaid mita inta diá patus aidan, ibog in awak, ibog mita inta moraat, bo ibog mita inta moiḻiu (sin ibog inta moiḻiu tua in notongkaibí in mosumba kon berhala).

TESALONIKA 1 4:3

Nanaa in kinoibog i Allah: Ibogon-Nea moiko in mobiag tongábí kon bonu in kawasa-Nea; mobiag modarit kon bayongan in yagi-yagi bo yumayú kon oaid mita mokotor bo inta diá mopia.

TESALONIKA 1 4:7

Inoiní i Allah in kita, deemanbí mogaid kon inta moraat, táe mogaidbí kon onu inta mokosanang kon gina-Nea.

TIMOTIUS 1 2:10

Táe ḷambáanbí in oaid mita inta mopia, inta patus kon bobay mita inta moibada kon i Allah.

TIMOTIUS 1 3:3

donaaibí in intau inta umuran moḷoḷangu, ande intau inta moibo-ibog moropatoi, táe intaubí inta moaḷus in dodia bo pososingognea bo inta moibog doman in dodamean, bo diá dinoit.

TIMOTIUS 1 6:10

Sin pomangkoian in bayongan inta moraat naa in ibogbí kon doit. Aindon tongonumai degá in intau inta umuran moramuji motayak kon doit, sahingga in diádon dinumudui kon totundú in agama Keresten, dá tongádon roriga in moiantug kon i monia bo inta mokoajar doman kon gina in kodungkuḷan monia tua.

TIMOTIUS 2 3:2

Intau mita in dongkadon umuran momikir kon kopontingan monia tontaní. Kon gina monia in dongka bidon tantú doit, mosia in moambungangaḷ bo moibog monguboḷ, moibo-ibog moningkuḻe kon intau, momarontak kon guyanga, diá motaau motuḻí kon kopopia in intau kon i monia bo onu inta sinundú in agama kodoíbí monia.

TITUS 1:11

Intau mita natua in mustibí tokohukumon in bibig monia, sin onu in sinundú monia tua, tongábí mopotombauk kon raian in intau mita inta nobiag tobaḷoian. Tua mita in pinomia monia sin motayak kon kauntungan inta diá patus.

TITUS 1:7

Sin itoi kon jamaat tua in mogaidbí kon oaidan i Allah, manangka intua mustibí intau inta mopia, diá mododia bo diá morogi, deemanbí intau inta umuran moḷoḷangu, deeman doman intau inta moibog-ibog motayak kon mokorogenggeng bo diá doman dinoit.

TITUS 2:3

Tongginaai doman in guyanga mita bobay, sinbá oaid monia in moidudui kon aid in intau mita inta nonotaau kon i Allah. Tundú doman sinbá mosia in diá moibog moponapud in soaḷ mita inta diá totuu kon intau ibanea. Dika doman ogoi monginum kon oinumon inta mokoḷoḷangu. Mosia in musti motaau motundú kon inta mopia,

IBRANI 12:16

Ḷukadaibí doman sinbá diá in intau mobiag mokotor andeka doí moguntun kon soaḷ mita inta nongkon i Allah, ná inta inaidan i Esau. Sia in nobarani totok nopotaḷui in haknea saḷaku adí guya-guyang tongá popisí in kaanon topindan.

YOSUA 7:21

Kon sigad in barang mita inta inagow naton, akuoi nokoontong kon jubah tobatú inta totuu mogaga, pinomia in Babilonia, bo saḷaka doman mita doyowa nokilo, bo buḷawan tobatú noiḻiu kon tobotak in kilo. Moibog totok in akuoi in barang mita tatua, dá ginamáku bo iḷobongku kon butá kon ḷoḷaiganku; saḷaka in kon ḻimonag totok.”

PETRUS 1 5:2

ḷukadaibí monimu kopiaraan in domba i Allah inta ain pinosarakan kon i monimu. Ḷukadai takin sanang in gina ná inta kinoibog i Allah, dikabí tongá pakisa in gina. Bo dika doman mogaid kon oaidan tatua tongá sakadar motayak kon kauntungan tontaní, táe aidaibí intua sin lantaranbí moiko totu-totuubí moibog mopobayá in oaidan i Allah.

PETRUS 2 2:10

torutama intau mita inta tantú dinumudui kon ibog in awak monia inta mokotor bo inta moningkuḻe kon kawasa i Allah. Ná domai tua in kobobarani monia bo koḷoḷatú in intau mita inta mongaku guru mita tatua, sahingga in diábí moondo-ondok in mosia moningkuḻe kon mahaḷuk mita in soroga inta momulia!

PETRUS 2 2:14

Mosia tua in diábí mogoga-gogai in mogaid kon dosa, bo totok moibog in mosia motayak kon bobay inta monakaḷ. Bo intau mita inta diápa noroton in pirisaya monia modait tongganutan monia. Gina monia tua in noibiasa bidon moturá. Mosia tua in binutung bidon!

PETRUS 2 2:3

Popisí in mosia motamaa, dá intau mita inta deeman totuu guru tua in mongonguman kon inimu in ouman mita inta tongá ai-aidan monia tontaní sinbá kouḻían monia kon kauntungan in moiko. Táe bá kotaauan monimu, pongadilan inta mopoḷabú in hukuman kon i monia tua in noonggot bidon in sinadia, bo koyoyangan inta ain sinantú kon i monia in mogoḷat bidon mako.

WAHYU 2:14

Tongá oyúon doman in diá kinosanang-Ku kon i monimu: Sin oyúon in tongonumai intau kon sigad monimu in dinumudui kon onu inta sinundú i Bileam. Ki Bileamdon naa inta notundú kon i Balak kon naonda in mopoḷabú kon intau Israel kon bonu in dosa; mosia in nodondouḷug kon intau Israel nokaan kon kaanon inta ain pinosumba kon berhala bo nogaid doman kon soaḷ mita inta mokotor.

WAHYU 2:21

Sia inogoian-Kudon in kasampatan mogogai in mogaid kon dosanea mita, táe doíbí in sia mogogai mogaid kon soaḷ mita inta mokotor tua.

WAHYU 21:8

Táe intau mita inta ondokon, mosia inta diá mosatia, intau moromú, moḷoḻimod, intau mokotor, intau mongonggaing, mososumba kon berhala bo komintan intau mouboḷ, toko pogambat kon bonu in dagat tuḷú bo balerang inta kodoko-dokot, tuata in popatoi inta induanea.”

WAHYU 22:15

Táe intau mita inta nogaid kon soaḷ mita inta moromú, inta moibog monggaing, bo intau mita inta mogaid kon soaḷ mita inta mokotor, inta moḻimod, mosumba kon berhala, bo intau mita inta mouboḷ, pinomayá tosingogon ande oaid, komintan intau natua, kon ḷuai in kotá in tampatnea.

WAHYU 9:21

Mosia in diápa doman mogogai in moḻimod, monggaing, mogaid kon inta diá patus aidan bo monakow.

SAMUEL 1 8:3

Táe mosia in diá dinumudui kon dodia i amá monia, táe tongábí motayak kon kauntungan monia tontaní. Mosia in moibog uboḻian kon pelekara bo diá moadil in mohakim kon rayat.