EPESUS 4:14 - Alkitab Singog In Mongondow Masa In Tanaa

¹⁴ Dá kita in diábí naonda bo mongoadí mita inta pinoyaying magí-mako in noyagi-yagimai in totundú in intau mita inta mongomunapik. Mosia tua in mongonguman kon diá totuu sin mopotaḷá kon onu inta noitutui.

EPESUS 4:14 ပူးပေါင်းရင်းမြစ်များ

MAZMUR 59:3

Poḷuatdon in akuoi kon intau inta mopoaid in moraat, pomiḷaguidon in akuoi nongkon moḷoḻimod mita.

YESAYA 28:9

Mosia in moguman nanaa kon inakó, kainia, “Kai niamai sia in motundúbí kon i ine? Ki inepabí doman in moparaḷu kon tosingogonnea? Kai niakamai kita naa in mongoadíbí mointok inta bagu inungkak kon teté?

MIKHA 7:2

Intau motuḻid diádon in kon butá, intau inta motoindudui kon i Allah diádon mouḻí. Batúan in intau komintandon mogoḷat kon kasampatan moḻimod. Kon batúannea motaan kon poyogaḷap kon tumpaḷa intau.

MATIUS 11:7

Naonda in murí mita i Yohanes nobui, ininsilangandon i Yesus kon intau moantó tatua mongo ki ine in ki Yohanes, kai-Nia: “Onubí in mangaḻenea moiko mayá in padang gurun? Degá moindoi kon bonok inirup in tompot pouik-pountag?

MATIUS 24:11

Moantó in intau inta deeman totuu nabi in mamangoi, bo motundú kon inta noitaḷá kon moantó intau.

MATIUS 24:24

Sin oyúon in mongaku ki Mesias bo mongaku nabi táe mosia tua intaubí mongongakaḷ, tongá mosia in mogaid doman kon tanda mita inta moḷoben bo soaḷ mita inta mokoherang sahingga in aka mobaḻí, yo mosia in mokoakaḷ doman kon intau mita inta ain piniḻí.

OUMAN IN RASUL MITA 23:21

Tongá donaaibí duduian i Tuang onu in poigumon monia tua. Sin oyúonbí in noiḻiumai kon opat nopuḷú in intau nongkon imonia tua in nogadop kon daḷan sin monomayá moḷabot kon i Paulus kon yuak in daḷan. Intau mita tatua ain nongibot poḷat nongutuk kon mosia in diápabí mopongaa-ngaan bo moponginu-nginum aka diápa koḻimodan monia in ki Paulus. Tanaa in mosia aindon nobasadia, dongka bidon mogoḷat kon singog i Tuang.”

KORINTUS 1 12:2

Toropdon, kon wakutu in moiko diápa nonotaau kon i Tuhan, moiko in umuranpabí dinumudui kon berhala inta bobó.

KORINTUS 1 14:20

Utatku mita! Dika ná pororai in mongoadí. Aka kon soaḷ mita inta mongoromú, dá musti ná pororai in mongoadí in moiko. Táe aka kon soaḷ pororai, yo poraibí ná intau inta nogurangdon.

KORINTUS 1 3:19

Sin kabijaksanaan in intau kon dunia naa diábí in baraguna kon i Allah. Kon bonu in Buk Motusi in pinais nanaa, “Ki Allah in mojebak kon intau mita inta mongobijaksana podudui in pandoinea tontaní.”

KORINTUS 2 2:17

Sin kami in diábí ná intau ibanea inta tongá moibog motayak kon kauntungan nongkon habar i Allah tatua. Motuḻidbí totok in tujuan nami, sin ki Allahbí in nokiaid intua komintan kon i nami. Bo inontongbí i Allah tontaní kon kami in nopoyaput in habar tatua nogaidbí saḷaku mogogaid mita i Kristus.

KORINTUS 2 4:2

Kami in doíbí tongá umuni-uni sin mokooyábí in natua. Bo kami in doíbí mogaid takin gina inta diá motuḻid bo poḷat doman mopotaḷá in singog i Allah. Kami in nogaid kon oaidan i Allah takinbí gina motuḻid ná inta kinoibog-Nea. Tuamai in harapon mako tua, kopiaan in monilai kon i nami.

GALATIA 3:1

Utat mita intau in Galatia! Moiko nion in totuudon mobodok! Ki ine degá in nopongaru kon i monimu? Eta kinoḻiongandon monimu inta pinogumanku kon tayowonmai monimu. Akuoi in noguman kon ki Kristus aindon pinopopakú kon kayu pinoyotaḻempang!

EPESUS 6:11

Bo paké domandon in touḷut in parang inta inogoi i Allah kon i monimu, sinbá moiko in mokotahang in monayow kon bayongan akaḷ in Ibilis inta diá mopia.

TIMOTIUS 1 3:6

Intau inta mobaḻí itoi kon jamaat, in deemanbí intau inta bagu nopirisaya kon i Kristus, sin dikabo mobaḻí in sia mokaḷakuang, sahingga in kutukon ná Ibilis koḻipod.

TIMOTIUS 2 1:15

Bá kotaauanmu kon bayongan intau inta kon Asia Kecil ain nonaḷámai kon inakó. Umpaka ki Pigelus bo ki Hermogenes.

TIMOTIUS 2 3:13

Intau mita moraat bo mongouboḷ in kodugang-kodugangdon in koromú monia. Mosia in umuran monguboḷ kon intau ibanea, táe diábí kinotaauan monia kon mosia tua in kino akaḷanbí doman in intau ibanea.

TIMOTIUS 2 4:3

Sin moiangoibí in wakutu intau in doídon motarima kon totundú inta moitutui. Mosia in dongkadon umuran dumudui kon ibog monia tontaní. Tuamai in mosia mosipundon kon guru mita podudui in ibog monia sinbá motundú doman kon onu inta mokosanang kon bongoḷan monia.

IBRANI 13:9

Dika moibog in moiko poyayingon in totundú mita inta mokoherang kon i monimu. Gina naton naa in musti irigonan in totabi i Allah, tuabí in mopia, deemanbí atorang mita soaḷ kokaanon. Intau mita inta tungkuḷ intua dinumudui kon atorang mita tatua in diá nokouḻí kon mangaḻenea.

YAKOBUS 1:6

Tongá intau inta moigum in musti mopirisaya bo mokopotantú kon gina. Sin intau inta diá motantú in gina naonda bo bokoḷ kon dagat inta poyambá magí-mako in tompot.

YAKOBUS 3:4

Bo indoiai doman in kapaḷ. Umpaka moḷoben in kapaḷ tatua bo diaan in tompot moropot, táe sia kendalionbí in kamudi inta mointok totok, podudui ibog in intau inta nodia.

PETRUS 2 2:18

Mosia in umuran mopodandi in uboḷ mita bo inta diá baraguna. Ibog monia inta mokotor totok tatua pinaké monia mopoyaying kon i monia inta bagupa nopirisaya kon i Tuhan.

YOHANES 1 2:19

Saturu mita i Kristus tua in intaubí mita inta nonaḷámaidon kon i naton naa, lantaran mosia tua in deemanbí totuu intau naton. Aka mosia intau mita naton, tantú mosia in umuranbí noyotakin naton. Natuabí sinbá motarangdon kon i naton kon mosia tua in diábí totu-totuu moibog mopirisaya kon i Tuhan moyotakin naton.

YOHANES 1 2:26

Pinaisku tanaa kon i monimu in soaḷbí intau mita inta umuran moramuji monguboḷ kon i monimu.

YOHANES 1 4:1

Utat mita inta kotabiku! Donaaibí mogampang kinopiri-pirisayanea kon intau mita inta mongaku kinawasa in Roho i Allah, táe ujipa muna in mosia tua sinbá kotaauandon monimu mongo roho kon i monia tua nongkon i Allah andeka deeman. Sin nobayongdon intau in maya-mayá mako bo mongaku nabi bokaka deemanbí totuu nabi.

YUDAS 1:12

Kon wakutu in moiko nogaid kon rame nongaan noyotakin, oaid in intau mita tatuata inta mokobú kon sigad monimu. Mosia tumura in mongaan takin diábí kooyá, bo tongá morai kon kopontingan monia tontaní. Mosia tua in ná doman onda bo goḷom inta dinia in tompot táe diá mokouyan. Mosia in ná doman onda bo pangkoi in ayop inta diá momomungai umpaka sempo in ayop; pangkoi mita inta ain irabut takin uakatnea bo minatoidon.

WAHYU 19:20

Mahaḷuk tatua in kinodomokan takin intau mita inta morongaku nabi táe deemanbí totuu nabi inta ain norogaid kon soaḷ mita inta mokoherang kon tayowon mahaḷuk tatua. (Takin aid mita monia inta mokoherang tatua, mosia nonguboḷ kon i monia inta ain notarima kon tanda in mahaḷuk tatua bo inta ain nosumba kon patongnea.) Bo mahaḷuk tatua takin intau mita inta deeman totuu nabi tumpaḷa pinogambat kon bonu in tuḷu moḷoben inta kodoko-dokot takin balerang.