DATU MITA 2 9:7 - Alkitab Singog In Mongondow Masa In Tanaa

⁷ Iko in moyopú kon motoḷuadí i Ahab ki Tuangmu. Takin natua hukumon-Ku in ki Izebel inta ain noḻimod kon nabi-Ku mita bo mogogundoi-Ku mita ibanea.

DATU MITA 2 9:7 ပူးပေါင်းရင်းမြစ်များ

DATU MITA IMITÁNEA 18:4

Kon dodai in ki Izebel noḻimod kon nabi mita i Tuhan, ki Obaja naa in notuḷung kon mogatut in nabi takin nobuni kon i monia kon bonu in angob – 50 in intau in kon angob tobatú – bo mobogo-bogoi in kaanon kon i monia.)

DATU MITA IMITÁNEA 21:15

Naonda in ki Izebel nokouḻí kon habar tatua nogumandon in sia kon i Ahab, “Ki Nabot in minatoidon. Yo bayádon gamá in gobá in anggur inta diá potaḷuinea tua kon inimu.”

DATU MITA IMITÁNEA 21:21

dá naa in pinoguman i Tuhan kon i Tuang, ‘Akuoi in mopoangoibí in bodito kon inimu. Iko in pogambat-Kudon bo bayongan in intau ḷoḷaki kon motoḷuadímu, noguyang andeka mobagupa, in yopúon-Kubí.

DATU MITA IMITÁNEA 21:25

Diábí kon dodai in onda in intau inta takin ḻimbatú in gina mogaid kon inta moraat kon tayowon i Tuhan ná inta pinomia i Ahab. Bayongan in aid moraat tatua in inaidannea sin umuran tundúdanmai i Izebel ki buḷoinea.

DATU MITA 2 10:10

Naadon in buktinea kon bayongan inta siningog i Tuhan soaḷ adí bo ompu i Ahab in mobaḻíbí. Ki Tuhan in nogaidon kon bayongan inta pinoguman-Nea pinongin i Elia mogogundoi-Nea.”

DATU MITA 2 10:11

Onda intua ki Yehu in noḻimod kon bayongan in ginaḷum i Ahab ibanea inta nogutun kon Yizreel, bo bayongan in pogawai, yobayat mita inta modagin bo imangnea mita; diábí in tobatúmai in binió mako nobiag.

TAWARIKH 2 22:7

Ki Allah in nonantúdon kon ki Ahazia in matoibí kon dodai in sia mokipodungkuḷ kon i Yoram. Kon pinoyodungkuḷan tatua ki Ahazia bo ki Yoram in sinayowan in intau tobatú inta ki Yehu in tangoinea ki adí i Nimsi, inta ain piniḻí i Tuhan moyompat kon motoḷuadí i Datu Ahab.

YEREMIA 26:5

Moiko in musti doman mokidongog kon onu inta pinoguman in mogogundoi-Ku mita, in nabi mita inta umuran potabá-Ku mamangoi kon inimu. Táe moiko in doí mokidongog kon i monia.

MATIUS 23:35

Tuamai, moiko in motanggung kon oaid monimu inta moḷoḻimod kon intau mita inta diá kotaḷá, pinangkoipamai kon i Habel intau inta mopia tua, modapot kon i Zakharia ki adí i Berekhya, inta iḻimod monimu kon sigad in tampat mokudus bo meja pototuduan kon sosumba.

SURAT I PAULUS KON JAMAAT RUM 12:19

Utatku mita inta kinotabiku, donaai in moiko motagú kon sakí in gina bo monomayá monuḻí, pomayádon mako bain ki Allah in motuḻí. Sin kon bonu in Buk Motusi ain pinais nanaa: “Akuoibí in motuḻí. Hukumon-Kubí in sia, guman i Tuhan.”

SURAT I PAULUS KON JAMAAT RUM 13:4

Sin pomarenta tua in mogogaidbí kon oaidan i Allah inta mogaid kon kopiaanmu. Táe aka iko in mogaid kon inta moraat, dá iko in mustibí moondok kon pomarenta, sin deemanbí tongá ibo-ibog sia in inogoian in kawasa mohukum kon intau. Sia tua in mogogaidbí kon oaidan i Allah inta nopoḷabú in hukuman i Allah kon intau mita inta mogaid kon moraat.

ULANGAN 32:35

Ki Tuhan in motuḻíbí bo mohukum kon i monia, diádon moonggot bo mosia moḷabú moyopú; wakutu in kogoguyaatan monia diádon moonggot.

ULANGAN 32:43

Ei bangusa mita, dayowdon in umat i Tuhan, sin ki Tuhan in mohukumbí kon bayongan inta noḻimod kon i monia. Sia in motuḻíbí kon musung-Nea táe mongampung kon dosa in umat-Nea.”

IBRANI 10:30

Sin kinotaauan bidon naton ki ine in Sia inta noguman, “Akuoi in motuḻíbí! Akuoi in mohukumbí!” Bo inta noguman doman nanaa, “Hakimonbí i Tuhan in umat-Nea.”

WAHYU 18:20

Ei soroga, koḷungangadon kon kinorimumudan in kotá tatua! Ei umat i Allah, rasul mita, bo bayongan in nabi koḷungangadon in gina! Sin ki Allah ain nohukum kon inia saḷaku tontuḻí in aidnea kon i monimu!

WAHYU 19:2

Sin pohohakim-Nea in moadil bo mobijaksana! Sia ain nopoḷabú in hukuman kon sundaḷ moḷoben, inta nomoguyaat kon dunia naa takin aidnea inta mokotor. Ki Allah ain nohukum kon sundaḷ tatua, sin sia in noḻimod kon intau mita inta nogaid kon oaidan i Allah.”

WAHYU 2:20

Táe naa in kinodoí-Ku kon i monimu; Pinomayámudon mako in ki Izebel, bobay inta dinumuí totabá i Allah tua. Nobayongdon in intau-Ku in inakaḷannea bo sinundúnea mogaid kon inta mokotor bo mokaan kon kaanon inta ain pinosumba kon berhala.