DATU MITA 2 7:6 - Alkitab Singog In Mongondow Masa In Tanaa

⁶ Sin, ain binaḻí i Tuhan intau mita in Siria nokodongog kon singog naonda bo ponubuan in paanan in tontara inta mobarong totok inta sinumakoi kon kabaḷo bo kereta. Intau mita in Siria tua in norai kon ki datu in Israel ain nonondan kon i datu in Het bo Mesir takin tontaranea sin monubu kon i monia.

DATU MITA 2 7:6 ပူးပေါင်းရင်းမြစ်များ

SAMUEL 2 10:6

Onda intua intau in Amon nosadardon kon aid monia tua in nokopomukádon kon saturu i Daud kon i monia. Tuamai in nonondan in mosia kon 20.000 in tontara in Siria inta nogutun kon Bet-Rehob bo Zoba, bo 12.000 in tontara nongkon Tob, takin datu in butá in Maakha bo intaunea 1.000.

SAMUEL 2 5:24

Aka kodongoganmudon in singog in sapatu naonda bo intau inta nopipid kon ḷuntung in pangkoi mita tatua, dá pomajudon, sin Akuoi in mayábí kon munamu sin monaḷow kon tontara in Pilistin.”

DATU MITA IMITÁNEA 10:29

bo kereta mita in parang in dinia mangoi nongkon Mesir. Boḻi in kabaḷo tobatú in 150 in doit saḷaka, bo boḻi in kereta in parang tobatú in onom nogatut in doit in saḷaka. Onda intua pinongin pongusaha mita tatua doman kabaḷo mita bo kereta mita in parang tatua pinotaḷui bui kon datu mita in Het bo datu mita in Siria.

DATU MITA IMITÁNEA 20:20

Mosia kon batúannea in noḻimod kon musung inta sinayowan monia. Intau mita in Siria noḷagui, inaḷowan in intau in Israel. Táe nokoḷagui in ki Benhadad. Noḷagui in sia sinumakoi kon kabaḷo bo sinakinan in tongonumai in tontara inta tumotakoi kon kabaḷo.

DATU MITA 2 19:7

Baḻíonbí i Tuhan in ki datu Asyur tua mokidongog kon habar in tompot dá mobuidon in sia kon butánea tontaní, bo ḻimodon in sia kon tua.”

DATU MITA 2 7:5

Naonda in motoyontomdon minayá in mosia kon pinononḷoḷaigan in intau in Siria, táe diábí in intau tobatúmai in inontong monia kon tua.

AYUB 15:21

Singog mita inta motoyang inta mokobongoḷ kon bongoḷannea; kon tungkuḷ in noingongow mogogagow namangoi nonubu kon inia.

MAZMUR 14:5

Intau moraat in totokbí in angoian in ondok, sin ki Allah in moḷukadbí kon intau inta motoindudui kon i-Nia.

YESAYA 31:1

Moboditodon in intau inta mayá in Mesir sin mokituḷung! Mosia in mopongatabí in ropot in tontara in Mesir inta tumakoi kon kabaḷo bo kabaḷonea inta mongoropot bo keretanea inta mobayong. Táe mosia in diábí mopirisaya kon i Tuhan, Allah mokudus in Israel bo diá mokituḷung kon i-Nia.

YESAYA 36:9

Umpaka tongá monayow kon porwira in Asyur inta totok in moompá yo moiko nion in deemanbí ḷawangnea. Tongá moiko in moharap doman mako kon Mesir in mokidia in bantungan kereta in parang bo tontara mita inta tumakoi kon kabaḷo!

YEREMIA 46:21

Nodapot in tontara mita inta sinoko tondanannea in diádon mokopongonu nádon ki adí in sapi inta noiḻiudon in ḷongó. Mosia in diádon mokotongod. Komintan momurow bo moḷagui sinbá mosaḷamat. Singgai pohukuman kon i monia in noyaputdon; wakutuneadon mosia koantugan in bodito.

YEHEZKIEL 1:24

Aka ḷumayug in mosia, yo kodongoganku in singog in ḷayugannea; singognea in naonda bo singog in tubig moitampurang, ná goḷopak in bayáan in tontara inta mobarong, naonda bo singog i Allah Inta Totok in mokawasa. Aka mogogai in mosia ḷumayug, kopíon monia in koḻikipnea mita,

YEHEZKIEL 10:5

Singog in pongaḻikokaban in kerub mita tatua in kinodongogan nodapot kon palas kon ḷuai, naonda bo singog i Allah inta Totok in mokawasa.

WAHYU 9:9

Dodob monia inoḻingoian in naonda bo ḷambung uatoi. Singog in koḻikip monia in naonda bo singog in kereta mita inta inugut in kabaḷo mayá moparang.

HAKIM MITA 7:21

Mosia komintan in umuranpabí sinimindog mako kon sinindogan monia tontaní inta kon ḻibumai in pinononḷoḷaigan tatua. Dá bayongan in tontara in musung tatua noroḷaguidon sindaḷan kinumarak.

SAMUEL 1 14:15

Onu inta nobaḻí tatua nokodoḻiok kon intau in Pilistin kon pinononḷoḷaigan bo kon popokaanan mita in bobiagon. Bayongan rayat in Pilistin takin tampat mita poḷoḷukadan bo paanan mita in mogogagow noondokdon; nodapot in butá nodandú, bo totokdon in nodowawá.

SAMUEL 1 26:6

Onda intua ki Daud noḻibó kon i Ahimelek intau in Het tatua, bo kon i Abisai utat i Yoab (ki iná monia in ki Zeruya), “Ki ine in mokobaḻí tumuot takinku kon bonu in ḷoḷaigan i Saul?” Ki Abisai notubag, “Akuoi!”