DATU MITA 2 21:4 - Alkitab Singog In Mongondow Masa In Tanaa

⁴ Ki Tuhan in ain noguman kon Yerusalem in tampat koangoian-Nea bo tampat pooibadaan kon i-Nia, táe kon tua kon Baḷoi Tuhan, ki Manasye in noposindogdon in mezbah mita kon dewa mita.

DATU MITA 2 21:4 ပူးပေါင်းရင်းမြစ်များ

DATU MITA IMITÁNEA 8:29

Poigumon mako singgai doḷom Iko moḷukad kon baḷoi tanaa inta ain piniḻí-Mu nobaḻí tampat pososumbaan kon ini-Mu. Igumon mako nongkon tampat pogogutunan-Mu kon soroga Iko mokidongog bo mongampung kon inakó takin umat-Mu aka kami mamangoi tumayow kon baḷoi tanaa bo mosambayang kon ini-Mu.

DATU MITA IMITÁNEA 9:3

Ki Tuhan in noguman kon inia, “Sambayangmu inindongogan-Kudon, dá tanaa in baḷoi inta pinosindogmu tanion poniata-Kudon kon mobaḻí tampat mokudus inta umuran mononoi pakéon posumbaan kon i-Nakó. Umuran-Kubí indoian mako bo ḷukadan in tampat tanaa.

DATU MITA 2 23:12

Mezbah mita inta pinosindog in datu mita in Yohuda kon atop kon ḻimonik mita in gopot i Datu Ahas in irimumud. Ná doman tua in mezbah mita inta pinosindog i Datu Manasye kon bosí posiḷosi in Baḷoi Tuhan, irimumud i Yosia, bo iḷumbú kon Ḷopá in Kidron.

DATU MITA 2 23:27

Ki Tuhan in noguman, “Onu inta ain inaidan-Ku kon Israel, in pomiaan-Kubí doman kon Yohuda. Intau in Yohuda in ḷumbúon-Kubí doman kon butá inta ogoi-Ku kon i monia. Doíon-Kubí in Yerusalem, kotá inta piniḻí-Ku, bo baḷoi-Ku doman tanaa, inta podudui in singog-Ku in mobaḻí tampat poibadaan kon i-Nakó.”

IḶUAIAN 20:24

Pomiaidon in Akuoi kon mezbah tobatú nongkon butá, bo pobogoidon in sosumba kon tua domba bo sapimu mobaḻí kuruban inta sinubá bo kuruban pondamean. Kon bayongan in tampat inta sinantú-Ku kon inimu mobaḻí tampat poibadaan kon i-Nakó, Akuoi in mamangoibí bo momarakat kon i monimu.

YEREMIA 32:31

Pinangkoi kon kotá tanaa pinosindog, intaunea in nopomukádon kon torú-Ku. Dá sinantú-Kudon kon yopúon intua,

YEREMIA 32:34

Nodapotbí in baḷoi inta pinosindog poibadaan kon i-Nakó ain pinonajis monia pinongin nogukat kon berhala mita monia inta mokorongó kon tampat tatua.

YEREMIA 32:35

Mosia in noposindog in mezbah mita kon i Baal kon Ḷopá in Hinom, bo noposumba in adí mita monia kon i Dewa Molokh. Bokaka, Akuoi in diábí nokoimontanmai in nokiaid in natua kon i monia, noidapotbí in diábí kon dodai in onda in noigonúmai kon gina-Ku kon mosia in mogaid kon inta totok in moraat natua bo mokopopisí kon intau in Yohuda baradosaan.”

YEREMIA 7:30

Intau in Yohuda ain nogaid kon inta moraat. Berhala mita monia inta kinorongó-Ku tua ain inukat monia kon bonu in Baḷoi-Ku, nodapot in nokonajisdon kon tua.

YEHEZKIEL 23:38

Bo deemanbí tongá tua. Mosia in noponajis doman kon Baḷoi-Ku bo singgai in Sabat inta ain sinantú-Ku.

YEHEZKIEL 23:39

Kon singgai mosia noḻimod kon i adí-Ku mita bodongka pinosumba kon berhala mita, doyowa mogutat tatua namangoi in Baḷoi-Ku bo nopokotormai kon tua!

ULANGAN 12:5

Nongkon bayongan butá in suku in mita Israel, ki Tuhan Allahmu in momiḻíbí kon tampat tobatú sinbá bangusa naton motaau mamangoi in tayowon-Nea bo mosumba kon i-Nia.