DATU MITA 2 21:3 - Alkitab Singog In Mongondow Masa In Tanaa

³ Tampat mita pososumbaan kon dewa inta ain inumpag i Hizkia ki amánea in buineabí pinosindog. Noposindog in sia in mezbah mita sin poibadaan kon i Baal, bo nogaid kon patong i Dewi Asyera, ná inta pinomia i Ahab datu in Israel. Ki Manasye in nosumba doman kon tundi mita.

DATU MITA 2 21:3 ပူးပေါင်းရင်းမြစ်များ

DATU MITA IMITÁNEA 18:21

Bo ki Elia in dinimiug kon rayat tatua bo noguman, “Dapotpa in toonu in moiko umuran motoḻindua in gina? Aka ki Tuhan tua in Allah, yo sumbadon in ki Tuhan! Aka Baal tatua in Allah, yo sumbadon in Baal!” Rayat inta noyosipun kon tua in tongádon kibio-biómai.

DATU MITA IMITÁNEA 18:26

Dá nomiḻídon in mosia kon sapi tobatú bo sinadiadon. Nopaḷut mako kon tua mosia in nosambayangdon kon i Baal nongkon doḷo-doḷom nodapot in noutu in singgai sindaḷan momaḷu-maḷú, “Tubagaidon in kami, Baal!” Inaidan monia intua poḷat doman motayok bo moḻibu kon mezbah monia. Táe totokbí in diá in tubagnea.

DATU MITA 2 13:6

Umpaka natua táe intau in Israel in diábí doman nogogai in mogaid kon dosa mita inta pinangkoi i Datu Yerobeam. Mosia in umuranbí mogaid kon dosa mita tatua, bo mopomayádon mako kon patong i Dewi Asyera umuran kon Samaria.

DATU MITA 2 17:16

Mosia in iḻimimpat kon bayongan in hukum i Tuhan, Allah monia, bo nomia kon sapi doyowa nongkon logam sin sumbáan. Mosia in nomia kon patong i Dewi Asyera, mosumba kon tundi mita bo moibada kon i Dewa Baal.

DATU MITA 2 18:22

Noiduduimai kon tua porwira in Asyur tatua in noguman, “Andeka degá moiko in mosingog kon moiko in moharap mako kon i Tuhan, Allahmu? Kon dodai in ki Hizkia nomarenta kon bá intau in Yohuda bo Yerusalem in tongá bidon moibada kon tayowon in mezbah kon Yerusalem, yo inta iyompatnea tua in mezbah bo tampat mita posumbaan kon i Tuhan tontaní.

DATU MITA 2 18:4

Irimumudneadon in tampat mita pososumbaan kon dewa, bo inumpagnea domandon in tugunea mita poḷat nomoguyaat kon patong i Dewi Asyera. Bo irimumudnea doman in uḷag bitú inta pinomia i Musa inta sinangoian Nehustan. Sin, noidapot in kon dodai intua intau in Israel tantúpa doman motubá kon dupa sin mohoromat kon uḷag bitú tatua.

DATU MITA 2 8:18

Sia in notonibuḷoi takin i adí i Ahab, bo ná inta pinomia in motoḷuadí i Ahab, sia in binaradosa doman kon i Tuhan ná datu mita in Israel.

DATU MITA 2 8:27

Popisí in pinotonibuḷoiannea tatua dá oyúondon in togot in motoḷuadí i Ahazia bo in motoḷuadí i Datu Ahab. Ki Ahazia in binaradosa kon i Tuhan notongkai ná inta inaidan in motoḷuadí i Ahab.

TAWARIKH 2 32:12

Siabí tua inta ain norimumud kon tampat mita pooibadaan bo mezbah mita kon i Tuhan, bodongka nopotabá kon intau in Yohuda bo Yerusalem noibada poḷat notubá kon dupa tongá kon mezbah tobatú.

TAWARIKH 2 34:3

Naonda in waḷudon notaong in nobaḻí datu, kon umur inta totokpa in noguod, ki Yosia in nomangkoidon noibada kon i Allah inta sinumba i Datu Daud mogoguyangnea. Opat notaong noiduduimai nomangkoidon in sia norimumud kon tampat mita pososumbaan kon berhala, patong mita i dewi Asyera, bo berhala mita ibanea.

AYUB 31:26

Diábí dodai in onda in sinumbaku in mata in singgai inta nonindar andeka buḷan inta nonimbayag nodarit.

YESAYA 65:11

Táe deemanbí natua in ukur in intau mita inta nonaḷámai kon i-Nakó, inta diá noindoimai kon Sion, tombuḷud-Ku inta motusi, inta noposumba in kaanon inoḷud kon Gad bo Meni, dewa mita inta mobogoi in kauntungan bo ukur.

YEREMIA 7:30

Intau in Yohuda ain nogaid kon inta moraat. Berhala mita monia inta kinorongó-Ku tua ain inukat monia kon bonu in Baḷoi-Ku, nodapot in nokonajisdon kon tua.

MIKHA 6:16

Tua komintan in mobaḻí popisí in moiko dinumudui kon aid moraat i Datu Omri bo i adínea, tuata in ki Datu Ahab. Moiko in dinumudui kon oaid monia. Tuamai in rimumudon-Ku in moiko, bo moiko in poempengon bo singkuḻeon in bayongan in bangusa.”

ULANGAN 16:21

Aka moiko momia kon mezbah kon i Tuhan Allahmu, dika mogukat kon patong berhala kayu lambang i Asyera kon diugnea,

ULANGAN 17:2

Aka kodongogan monimu kon kotámu tobatú oyúon in kon dosa kon i Tuhan Allahmu sin iḻimimpatdon kon dodandian

ULANGAN 17:3

bo parenta-Nea takin nosumba bo nogundoi kon ilah mita ibanea ande kon mata in singgai, buḷan ande tundi mita,

ULANGAN 20:18

Ḻimodon in mosia, sinbá mosia in diá mokopopisí kon i monimu mogaid kon dosa kon i Tuhan Allahmu sin tundúon monia in moiko mogaid kon inta moromú kon ilah mita monia.

ULANGAN 4:19

Dikadon baradosaan popisí in mosumba bo mogundoi kon onu inta inontong monimu kon ḷangit: mata in singgai, buḷan bo tundi mita. Pinomayá mako i Tuhan Allahmu in bangusa mita ibanea nosumba kon tua mita.