DATU MITA 2 13:6 - Alkitab Singog In Mongondow Masa In Tanaa

⁶ Umpaka natua táe intau in Israel in diábí doman nogogai in mogaid kon dosa mita inta pinangkoi i Datu Yerobeam. Mosia in umuranbí mogaid kon dosa mita tatua, bo mopomayádon mako kon patong i Dewi Asyera umuran kon Samaria.

DATU MITA 2 13:6 ပူးပေါင်းရင်းမြစ်များ

DATU MITA IMITÁNEA 14:16

Ki Tuhan in monaḷábímai kon Israel sin ki Yerobeam in binaradosa bo nokopopisídon kon intau in Israel binaradosa domandon.”

DATU MITA IMITÁNEA 15:3

Ki Abiam nogaid kon dosa mita ná ki amánea. Diá noḻimbatú in ginanea in mosatia kon i Tuhan, Allahnea, noyoposi i Daud, ki ḷakinea.

DATU MITA IMITÁNEA 16:26

Ná doman ki Yerobeam, ki Omri in binaradosa doman bo nokopopisídon kon intau in Israel nomia doman kon dosa bo nosumba kon dewa. Tuamai in mosia nokopomuká kon torú i Tuhan, Allah inta musti sumbáan in intau in Israel.

DATU MITA IMITÁNEA 16:33

Nomia doman in sia kon patong i Dewi Asyera. Noiḻiu in dosa nongkon bayongan datu inta noiuna kon inia. Tuamai in sia nopomukádon kon torú i Tuhan, Allah inta musti sumbáan in intau in Israel.

DATU MITA 2 10:29

Tuamai in ki Tuhan noguman kon i Yehu, “Bayongan inta pinarentaku kon inimu inta aidanmu kon buí i Ahab aindon inaidanmu. Tuamai in modandi in Akuoi kon adí bo ompumu modapot in buímu inggopatnea in mobaḻíbí datu kon Israel.” Táe diá noḻimbatú in gina i Yehu in dinumudui kon hukum i Tuhan, Allah in Israel. Dinumuduibí in sia kon aid i Yerobeam inta nokopopisí kon intau in Israel binaradosa pinongin nosumba kon sapi buḷawan inta pinosindognea kon Betel bo kon Dan.

DATU MITA 2 13:11

Sia in binaradosa doman kon i Tuhan sin dinumudui kon raat i Datu Yerobeam inta ain nokopopisí kon intau in Israel nomia kon dosa.

DATU MITA 2 13:2

Ná doman ki Datu Yerobeam inta nomarenta noiuna kon inia, ki Yoahas in binaradosa doman kon i Tuhan bo nokopopisí kon intau in Israel binaradosa doman. Diábí kon dodai in onda in sia in nonaḷámai kon oaidnea mita inta moraat.

DATU MITA 2 17:16

Mosia in iḻimimpat kon bayongan in hukum i Tuhan, Allah monia, bo nomia kon sapi doyowa nongkon logam sin sumbáan. Mosia in nomia kon patong i Dewi Asyera, mosumba kon tundi mita bo moibada kon i Dewa Baal.

DATU MITA 2 18:4

Irimumudneadon in tampat mita pososumbaan kon dewa, bo inumpagnea domandon in tugunea mita poḷat nomoguyaat kon patong i Dewi Asyera. Bo irimumudnea doman in uḷag bitú inta pinomia i Musa inta sinangoian Nehustan. Sin, noidapot in kon dodai intua intau in Israel tantúpa doman motubá kon dupa sin mohoromat kon uḷag bitú tatua.

DATU MITA 2 21:3

Tampat mita pososumbaan kon dewa inta ain inumpag i Hizkia ki amánea in buineabí pinosindog. Noposindog in sia in mezbah mita sin poibadaan kon i Baal, bo nogaid kon patong i Dewi Asyera, ná inta pinomia i Ahab datu in Israel. Ki Manasye in nosumba doman kon tundi mita.

DATU MITA 2 23:4

Nopaḷut mako kon tua ki datu in nomarenta kon i Imang Moḷoben ki Hilkia, imang mita mogogopod bo moḷoḷukad inta nopobayá in oaidan kon ngara in Baḷoi Tuhan, sinbá mopoḷuai nongkon baḷoi tatua in bayongan pakakat inta pinaké posumbaan kon i Baal Dewi Asyera, bo tundi mita. Bayongan in pakakat mita tatua sinubá i Datu Yosia kon ḷuai in kotá kon diug in Ḷopá in Kidron, bo ḷobudnea in dinia kon Betel.

YESAYA 26:10

Umpaka intau moraat pinopoaidan in inta mopia, diábí doman in sia mobalajar kon onu inta mobanar. Kon negara inta oyúon in hukum sia in mopoaidbí doman kon inta motombogá, bo doíbí motarima kon kawasa i Tuhan.

ULANGAN 7:5

Tuamai, umpagdon in mezbah mita in bangusa mita tatua, rimumudon in oigi mita batu inta inanggap monia mokaramat, pupuḷdon in lambang mita i Asyera, bo tubádon in patong mita berhala inta sinumba monia.