DANIEL 9:25 - Alkitab Singog In Mongondow Masa In Tanaa

²⁵ Paisdon bo kotaauandon in naa: Pitu pokali kon pitu notaong, in moitaḻibbí, pinangkoi kon dodai in pinoḷuai in parenta moposindog bui kon Yerusalem, modapot in mamangoi in itoi tobatú inta piniḻí i Allah. Kon bonu in pitu pokali kon onom nopuḷú bodoyowá notaong daḷan mita bo dinding mita in Yerusalem in posindogonbí bui, táe sempo in tatua in mopuḻingbí in roriga.

DANIEL 9:25 ပူးပေါင်းရင်းမြစ်များ

SAMUEL 2 15:25

Bo ki datu in nogumandon kon i Zadok, “Pobuidon in Poti Dodandian tatua kon kotá. Aka ki Tuhan in moibogpa kon inakó, yo notantúbí kon ogoi-Neapabí mobui mangoi bo mokoontongpa bui kon Poti Dodandian tatua takin tampatnea.

EZRA 4:24

Pinogaidan kon Baḷoi Tuhan in pinogogaidon bo diádon iningguputan nodapot kon taong nogindua kon pinomarentaan i Darius, datu in Persia.

EZRA 7:1

Tongonumai notaong noiduduimai kon tua, kon dodai in ki Artahsasta nomarenta nobaḻí datu in Persia, oyúon in ḷoḷaki tobatú tangoinea in ki Ezra, nongkon buí i Imang Moḷoben ki Harun. Pipidan in pinomuíannea nongkon ḻimonag bo pinoonik in noiduduimai naa: Ki Ezra Ki Seraya Ki Azarya Ki Hilkia

EZRA 7:8

Mosia in nonaḷámai kon Babel kon singgai imitánea kon buḷan doman imitánea bo pinodoyon kon totuḷung i Allah, nodapotdon in mosia kon Yerusalem kon singgai imitánea buḷan in ḻimanea.

NEHEMIA 3:1

Naa in boba-bobayánea kon pinonompiaan kon dinding in Yerusalem. Imang Moḷoben ki Elyasib bo totakinnea mita noposindog bui in Bonawang Domba, nopoguḻit in ḷoḻingkopnea mita bo sinondídon kon i Tuhan. Sinompia monia bo nonondí kon dinding noidapot kon Ḷangkeang Mogatut bo noidapot kon Ḷangkeang Hananeel.

NEHEMIA 4:2

Kon tayowon in totakinnea mita bo tontara in Samaria, sia in noguman, “Onu in koyogot aidan in intau Yahudi nobodito inta diá mokopongonu tua? Degá mosia in moibog moposindog bui in kotá tanaa? Kai monia kamai oaidan tatua in moḷapatbí tosinggai, tongá pongin moposumba in kuruban? Degá apat inta nádon buḷud inta ain nopokak tua in motaau baḻíon batu mita podinding?”

NEHEMIA 4:8

Mosia in noyopakat monubu kon Yerusalem sin mopotombauk.

NEHEMIA 6:15

Pinonompiaan kon dinding tatua in ḻima nopuḷú bodoyowá nosinggai, bo noḷapat kon singgai in doyowa nopuḷú bo ḻima kon buḷan Elul.

MAZMUR 71:10

sin musungku mita in mongongumandon kon inakó, intau mita inta moibog moḻimod kon inakó in noyopopogdon.

MOHOHUTUBA 3:3

wakutu moḻimod bo wakutu mongundam, wakutu mongokai bo wakutu moposindog.

YESAYA 55:4

Totuubí, sia in baḻíon-Ku itoi bo umpung pongayow, sakusi in kawasa-Ku kon bangusa mita.

YESAYA 9:6

Sia in momarenta saḷaku datu buí i Daud, kawasaannea totok in moḷoben. Butánea in umuran modame bo mobiag mooyúon; pomarentaannea in pinodoyon kon hukum bo koadilan tanaa mako modapot in mononoi. Ki Tuhan Inta Totok in Mokawasa notantúbí kon mogaid kon tua.

DANIEL 8:11

Nodapotbí in sia nonontot kon itoi in tontara in soroga, nopogogai in kuruban sosumba muḷoi in singgai inta pinosumba kon itoi in tontara tatua, bo nogumpag kon baḷoi pososumbaan kon inia.

DANIEL 8:25

Popisí in sia moakaḷ, uboḷnea mita in mobaḻíbí. Sia in ḷumoḷatúbí, bo diábí in sia muna mobogoi in tompoingat momutú in sia kon mobayong in intau. Nodapotbí in sia mokobaḻí in monayow kon i Datu Inta Totok in moḷoben. Táe sia in rimumudonbí deemanbí mopomaké in ropot in intau.

DANIEL 9:23

Kon dodai in iko nomangkoidon nopoigum kon i Allah, Sia in nobogoidon in tubag. Akuoi in namangoi sin mopotaau intua sin Sia in notabi kon inimu. Yo, indongogaidon kopiaan koyogot in akuoi moginsilang kon mangaḻe in oontongon tatua.

MIKHA 5:1

Ki Tuhan in noguman, “Ei Betlehem Eprata, iko in kotá tobatú inta nointok kon Yohuda! Táe nongkon inimu posindogon-Kubí mangoi in pongawasa kon Israel inta kinobaḻiannea in nongkon dungkuḷpabímai.”

MIKHA 5:2

Dá, ki Tuhan in mopomayádon in umat-Nea kawasaan in musung mita monia modapot in bobay inta ain sinantú mobaḻí ki iná in mongongawasa tatua mopononggadídon kon i-Nia. Mopaḷut mako kon tua intau mita tongobangusanea inta kon pinoḷumbúan in potobatúondon bui in bangusa monia.

MATIUS 13:23

Bibit inta noḷabú kon butá mopia, tua in mangaḻenea intau inta nokodongog kon Pirman bo nonotaau kon mangaḻenea. Manangka intua sia nomungai, oyúon inta mogatut noguntuḷ, oyúon in onom nopuḷú noguntuḷ, bo oyúon doman in toḷu nopuḷú noguntuḷ.”

MATIUS 24:15

“Moiko in mokoontongbí kon ‘aid moraat inta mokorimumud’, ná inta pinoguman i Nabi Daniel, simindog kon tampat motusi. (Paraḷu indoian in intau mita inta mobaca: tarukira totok in mangaḻenea!)

MARKUS 13:14

“Moiko in mokoontong kon ‘Oaid moraat inta mokorimumud’ simindog kon tampat inta poton sindogan. (Tarukiradon onu in mangaḻenea!) Kon wakutu intua intau inta kon Yudea, musti moḷagui mopobayá in buḷud.

YOHANES 1:41

Dá ki Andreas in ḷagi notayak kon i Simon ki utatnea bo noguman kon inia, “Kami ain noyodungkuḷ i Mesias!” (Mesias notongkai in Kristus: Datu Mopoposaḷamat.)

YOHANES 4:25

Bobay tatua in noguman kon i Yesus, “Kinotaauankubí kon Datu Mopoposaḷamat (inta sinangoi ki Kristus) in mamangoibí. Aka Sia mamangoi, potaau-Neabí in bayongan in yagi-yagi kon i naton.”

OUMAN IN RASUL MITA 3:15

Moiko in noḻimodon kon i-Nia inta pangkoi in kobiagan in bayongan intau, táe bui bo biniag i Allah in Sia nongkon sigad in intau minatoi. Bo kami naa in nokoontong tontaní kon tua komintan.

OUMAN IN RASUL MITA 5:31

Ki Yesusbí tua inta ain inogoian ḷoḻitúan bo kawasa moḷantud saḷaku Itoi bo Mopoposaḷamat, sinbá intau in Israel ogoian in wakutu mogogai in mogaid kon dosa, bá ampungan in mosia.

OUMAN IN RASUL MITA 8:30

Dá ki Pilipus in minayá dinimiug kon kereta tatua bo nokidongog kon pinobacaan in intau tatua kon buk i Nabi Yesaya. Nopaḷut mako, sia in noḻibó kon intau tatua kainia, “Komangaḻean degá i Tuang onu in binaca i Tuang tatua?”

EPESUS 5:16

Pakédon kopia in kasampatan inta oyúon kon i monimu, sin masa in tanaa in masa bidon inta moraat.

WAHYU 1:5

bo nongkon i Yesus Kristus, sakusi inta mosatia. Sia tua inta muna-munamai totok biniag bui nongkon kinopatoian bo Sia doman in nongawasa kon bayongan datu kon dunia naa. Ki Yesus in motabi kon i naton, tuamai Sia in noibog minatoi sin momilat kon i naton nongkon kawasa in dosa mita naton,

WAHYU 19:16

Jubah bo paa-Nea in pinaisan tangoi nanaa, “Datu in bayongan datu, bo Tuang in bayongan tuang.”