DANIEL 9:24 - Alkitab Singog In Mongondow Masa In Tanaa

²⁴ Pitu pokali kon pitu nopuḷú notaong in sempo inta ain sinantú i Allah sin mopoḷuat kon bangusamu bo kotámu inta motusi tatua nongkon dosa bo aid moraat. Bayongan in dosa in ampunganbí bo kooadil inta mononoi in posindogonbí, dá oontongon bo toḻindap tatua in moniatadon, bo Baḷoi Tuhan inta motusi tatua in posumba bui kon i Tuhan.

DANIEL 9:24 ပူးပေါင်းရင်းမြစ်များ

TAWARIKH 2 29:24

Nopaḷut mako kon tua bembé mita tatua iratá in imang mita bo dugúnea in pinopobutak kon mezbah nobaḻí kuruban pongampung kon dosa in bayongan rayat. Tua in inaidan monia sin ki datu in nomarentadon sinbá moposumbadon in kuruban payongon bo kuruban pongampung kon dosa kon bayongan in rayat in Israel.

MAZMUR 2:6

Kai-Nia, “Kon Sion buḷud-Ku inta motusi aindon dinuí-Ku datu inta piniḻí-Ku.”

MAZMUR 45:7

Ki Allah in nobogoi in kawasa kon inimu momarenta, kawasa-Mu in modapotbí in mononoi; pinodoyon kon inta moadil iko in momarenta kon rayatmu.

YESAYA 42:4

Diá in gagawang andeka kobuḻian in kamang, modapot in inta moadil in posindogon kon dunia. Ḻipú mita inta moyayú mokotanob kon totundúnea.”

YESAYA 51:6

Ḷangagaidon in ḷangit bo indoiai in butá; ḷangit in moinggamábí naonda bo poyok bo butá in mokoyonganbí naonda bo ḷambung noketek, bayongan in intau kon bonunea in matoi naonda bo yongit. Táe kasaḷamatan inta ogoi-Ku in umuranbí mononoi, bo kountungan-Ku in diábí in imbuitnea.

YESAYA 51:8

Mosia in moyopúbí bo mobuḻi naonda bo pakeang kinaan in anoi bo kaeng bubuḷ in domba kinaan in sisik. Táe kasaḷamatan inta inogoi-Ku in mononoibí, kountungan-Ku in umuranbí oyúon modapot in adí bo ompu.”

YESAYA 56:1

Ki Tuhan in noguman kon umat-Nea, “Aidaidon onu inta moadil bo inta noyotombutung in hukum-Ku. Sin topiḻikpa bo Akuoi in mamangoi moposaḷamat kon i monimu bo koadilan-Ku in poniata.

YESAYA 61:1

Kawasa i Tuhan Inta Totok in Moḷantud oyúon kon inakó; Sia in nomiḻí bo nopotabá kon inakó sin modia kon habar mopia kon intau nobogá bo moḻipoi kon intau inta nokuyang in ginanea, sin mopotaau kon intau inta sinokodakop kon mosia in ḷagidon poḷuaton, bo kon intau mita kon bonu in ponjara kon mosia in ḷagidon poḷuaion.

OMBAḶ 4:22

Sion in notarimadon kon hukumannea popisí in dosa mita inta ain pinomianea; tanaa in kami in diá bidon pomayá mako i Tuhan bo diá bidon diaan pobayá in poḷumbúan. Táe iko, ei Edom, in hukumonbí i Tuhan. Dosamu mita in poontongbí.

YEHEZKIEL 28:12

“Ei intau ilo-ilow, amuiaidon in ki datu in Tirus. Potaaudon in onu inta poguman-Ku, Akuoi Tuhan Inta Totok in moḷantud kon inia, ‘Iko in nokoimontandon in nobaḻí lambang in kosompurnaan; dungkuḷmai iko in totuu mobijaksana bo mogaga!

YEHEZKIEL 4:6

Mopaḷut mako kon tua, uḻidon tumonsí ná koḷanan bo nanamaidon in hukuman popisí in taḷá in Yohuda opat nopuḷú nosinggai in koonggotnea, tosinggai in notongkai in totaong in hukuman monia.

IMAMAT 25:8

Iapdon in pitu bo poyokali in pitu notaong, kobayongnea opat nopuḷú bo siow notaong.

IMAMAT 8:15

Onda in tua iratá i Musa bo dugúnea ibanea in gamáannea. Gongguyamúnea tontaní in pinoḷodoknea kon dugú tatua bodongka poḻeponea kon tungoi mita inta kon siku mita in mezbah, sinbá mezbah tatua tongádon ogoi kon i Allah. Dugú ki agatnea in popobutak kon datoḷan in mezbah. Natuata in mopobaḻí motusi kon mezbah tatua bo tongádon ogoi kon i Tuhan.

ZAKHARIA 4:14

Dá sia in noguman bui, “Tua in intau doyowa inta ain piniḻí i Tuhan inta nomaḻí kon dunia naa bo inta sinundú sin mogundoi kon i-Nia.”

PINOGIAPAN 14:34

Moiko in mobababí kon bungai mita in dosamu opat nopuḷú notaong koonggotnea; totaong iyapon tosinggai nongkon pomuḷoi in singgai inta pinaké monimu minayá nonaridi kon butá tatua. Kotaauanbí monimu naonda in kororiganea aka Akuoi moḷawang kon i monimu!

MATIUS 1:21

Sia in mopononggadí in adí ḷoḷaki bo Sia tangoianmu ki Yesus, sin Sia tuata inta moposaḷamat kon umat mita baradosa.”

MATIUS 11:13

Nodapot in kinoangoian i Yohanes, bayongan in hukum i Musa bo totundú in nabi mita nopotaaudon muna kon onu mita inta musti mobaḻí.

MATIUS 4:5

Onda intua ki Yesus in dinia Ibilis minayá in Yerusalem inta sinangoi kotá motusi tua bo sinimindog kon binubungan Baḷoi i Tuhan,

MARKUS 1:24

“Ei Yesus, intau in Nazaret, onuon-Mu in kami? Mamangoi degá momutú kon inami in Iko? Kotaauankubí in Iko: Iko nion in totabá i Allah inta motusi!”

LUKAS 1:35

Dá tubag in malaekat tatua kon inia nanaa, “Roho i Allah takin kawasa-Nea inta totok in moḷantud mamangoi bo mongawasa kon inimu. Tuamain Adí inta polahirmu tua in tangoion Mokudus, ki Adí i Allah.

LUKAS 21:22

Sin singgai mita tatua in ‘Singgai bidon Pohukuman’, sinbá mobaḻídon onu inta ain pinais kon bonu in Buk Motusi.

YOHANES 1:41

Dá ki Andreas in ḷagi notayak kon i Simon ki utatnea bo noguman kon inia, “Kami ain noyodungkuḷ i Mesias!” (Mesias notongkai in Kristus: Datu Mopoposaḷamat.)

YOHANES 3:34

Sin ki ine in pinotabá i Allah, dá siabí tua in mopoyaput in pirman i Allah, sin sia in kinawasa bidon in Roho i Allah.

OUMAN IN RASUL MITA 3:14

Sia tua inta mokudus bo inta mobanar táe moiko in doí notarima kon i-Nia sin intaubí moḷoḻimod in kinoibog monimu buḻian saḷaku tombuinag kon i monimu.

OUMAN IN RASUL MITA 3:22

Ki Musa nokoimontan doman in noguman nanaa, ‘Ki Tuhan, ki Allahmu in nopotabá kon inimu kon tobatú nabi inta nongkon butá monimu tontaní, naonda bo nopotabá in Sia kon inakó.

OUMAN IN RASUL MITA 4:26

Datu mita in dunia naa in mosadia mako moparang bo itoi mita in motobatú sin moḷawang kon i Tuhan bo Datu Mopoposaḷamat.’

SURAT I PAULUS KON JAMAAT RUM 5:10

Sin tungkuḷpa in nobaḻí saturu i Allah in kita, kita pinoyodamedon takin-Nea inta pinodoyon kon kinopatoian i Adí-Nea, apa doman in tanaa naonda in hubungan naton takin i Allah notompiadon bui, tantú kita in posaḷamatonbí doman bui pongin kinobiagan i Kristus.

KORINTUS 1 1:30

Sin lantaranbí ki Allah, dá notobatúdon in moiko i Kristus. Bo lantaran doman kita nopirisayadon kon i Kristus dá kita in nonotaaudon kon bayongan in yagi-yagi. Siabí doman tua in nopoyotutui, nomiḻí bo notobut kon bayongan oaid naton inta diá mopia.

PILIPI 3:9

bo akuoi in totu-totuudon notobatú takin-Nea. Hubungan mopia takin i Allah in diábí nouḻíku sin popisí in dinumudui kon hukum in agama, táe tua in nouḻíkubí sin akuoi in nopirisayadon kon i Kristus. Dá tuamai hubungan mopia tua in namangoibí nongkon i Allah sin pinodoyon kon pirisaya kon i Kristus Yesus.

KOLOSE 1:20

Bo Sia doman tua inta pinaké i Allah namangoi nopoyodame kon bayongan in yagi-yagi takin-Nea, inta kon butá ande kon soroga. Tua in pinomia i Allah pinodoyon kon kinopatoian i Adí-Nea kon kayu pinoyotaḻempang.

KOLOSE 2:14

bo pinopatan-Neadon in surat boboḻian kon i naton, inta mongancam kon i naton takin sarat mita inta mongobogat. Takin nopopakúdon in surat boboḻian tatua kon kayu pinoyotaḻempang, ki Allah in nomopat kon bayongan inta pinonapud kon i naton.

IBRANI 10:14

Dá kuruban tobatú tatua inta inaidan i Kristus noposompurnadon kon intau mita inta ain dinaritan nongkon dosa.

IBRANI 2:17

Mangaḻenea kon naa kon bayongan in yagi-yagi Sia in musti mobaḻí naonda bo ki utat-Nea mita, sahingga notaau in Sia nobaḻí Imang Moḷoben inta motoindudui kon i Allah bo kototabi. Tua in pomiaan-Nea sinbá ampungandon dosa in intau.

IBRANI 7:26

Dá ki Yesusbí tua in Imang Moḷoben inta paraḷuon naton. Sia tua in nodaritbí kon bayongan in yagi-yagi, diábí in taḷá andeka dosa onukadon kon i-Nia. Sia in pinotondí nongkon intau mita inta dinosa, bo dinia pinoonik in tampat inta moḷantu-ḷantud nongkon ḷangit.

IBRANI 9:26

Sin aka natua dá tantú mopobui-buibí domanmai Sia in monahang kon roriga inta mulaipamai dunia naa pinomia. Táe noniata magí, tanaa kon singgai tumi naa, Sia in namangoi tongábí komintan bo noposarakan in awak-Nea tontaní sin potobut kon bayongan in dosa naton.

PETRUS 2 1:1

Utat mita inta totu-totuudon nopirisaya ná doman kami naa! Ki Yesus Kristus, inta Allah bo Datu Mopoposaḷamat naton in nobogoidon in kasampatan kon i naton mopirisaya kon i-Nia, sin Sia ain nogaid kon onu inta mobanar. Surat tanaa in nongkon i Simon Petrus, tobatú mogogundoi bo rasul i Yesus Kristus.

YOHANES 1 3:8

Táe intau inta umuran mogaid kon dosa, mosia tua in ki adí mita in Ibilis, sin Ibilis tua in nongkon pinomangkoianpabímai umuran nogaid kon dosa. Tuabí in mangaḻe inangoian i Adí Allah, Sia in morimumud kon oaidan mita in Ibilis.

WAHYU 14:6

Noiduduimai kon tua akuoi in nokoontong kon tobatú malaekat ibanea inta iḷumayug noḷantud kon ḷangit. Malaekat tatua in nodia kon Habar Mopia inta mononoi sin poyaputon kon intau kon dunia naa bo kon bayongan bangusa, suku bahasa bo negara.

WAHYU 3:7

“Paisdon kon malaekat in jamaat kon Piladelpia nanaa: Naadon in koyow nongkon i-Nia inta Mokudus, Inta Mobanar bo ki Inta nokadai kon kokunsi i Daud; Aka Sia in mobuká yo diábí tobatúmai in mokoḻingkop; bo aka ḻingkopan-Nea, yo diábí doman tobatúmai in mokobuká.