DANIEL 9:13 - Alkitab Singog In Mongondow Masa In Tanaa

¹³ Bayongan in bodito inta pinais kon Hukum i Musa ain pinoumá-Mu kon inami. Táe umpaka natua, o Tuhan Allah nami, kami in tantúpabí doman mondoí mopoḷunganga in gina-Mu. Kami in umuranbí doí monaḷámai kon dosa mita nami bo doí doman moindoimai kon totundú-Mu mita.

DANIEL 9:13 ပူးပေါင်းရင်းမြစ်များ

DATU MITA 2 22:16

in tosingogon i Tuhan tanaa: “Akuoi in mohukumbí kon Yerusalem bo bayongan in intau inta nogutun kon tua ná inta pinais kon bonu in buk inta bagu binaca i datu.

AYUB 36:13

Intau inta diá kotuhan motagú kon torú; umpaka ihukum i Tuhan, doíbí in mosia moigum kon totuḷung.

MAZMUR 119:18

Bukádon in mataku sinbá mokoontong in akuoi kon totundú inta mokotongaw kon bonu in hukum-Mu.

MAZMUR 119:27

Tuḷungaidon in akuoi monotaau kon hukum-Mu mita, totundú-Mu inta mokotongaw in umuranku tano-tanobon.

MAZMUR 119:73

Ikobí in nomaḻí bo nomia kon inakó, ogoiaidon in akuoi in pomomangaḻe sin mobalajar kon parenta-Mu mita.

MAZMUR 85:4

Mosia in diá bidon sinorúan-Mu; torú-Mu inta motoyang in ginamá-Mudon bui.

YESAYA 31:1

Moboditodon in intau inta mayá in Mesir sin mokituḷung! Mosia in mopongatabí in ropot in tontara in Mesir inta tumakoi kon kabaḷo bo kabaḷonea inta mongoropot bo keretanea inta mobayong. Táe mosia in diábí mopirisaya kon i Tuhan, Allah mokudus in Israel bo diá mokituḷung kon i-Nia.

YESAYA 42:9

Tanaa in inta sinoḻindap-Ku in noniatadon; Akuoi in moibog mopotaau in onu inta mobagu; kon dodai intua diápa mobaḻí, aindon muna pinoguman-Ku kon inimu.”

YESAYA 43:22

Ki Tuhan in noguman, “Táe iko Israel, diá nosumba kon i-Nakó, bo diádon nogundoi kon i-Nakó.

YESAYA 64:6

Kami komintan in intaubí mita inta nonajis, nodapot in aid nami inta mopiapa in diá nodarit bo nokotor. Kami in moputúdon popisí in aid nami moraat naonda bo daun noingkag pinoḷayug in tompot.

YESAYA 64:7

Diá in nosambayang kon ini-Mu, andeka nopoigum in totuḷung-Mu, sin Iko in nogadop kon inami, bo nopomayá mako kon inami in iyopú in dosa nami.

YESAYA 9:13

Tuamai in tongá tosinggai in ki Tuhan in nohukum kon i itoi mita in Israel bo rayatnea. Pinongkó bo iḷumbú-Nea in uḷu bo iputnea.

YEREMIA 2:30

Diábí in mangaḻenea in pohukuman-Ku kon i monimu sin moiko in doíbí motarima kon toboḷow. Ná singa inta koyogot in tumorú, natuata in moiko moḻimod kon nabimu mita.

YEREMIA 30:14

Bayongan in intau inta kinoibogmu nokoḻiongdon kon inimu; mosia in doí bidon morai kon inimu. Naonda bo musung Akuoi ain nonubu bo nohukum kon i monimu kinoḻingá, popisí in nobayongdon in dosamu bo moḷoben in taḷámu.

YEREMIA 31:18

Dinongog-Ku umat in Israel noguman takin robonoḷ in gina, ‘O Tuhan, kami naa in naonda bo biag inta diápa iyonok táe sinundú-Mu in kami sinbá motoindudui, bo tanaa kami in nosadiadon mobui mangoi kon ini-Mu. Dá, diádon in kami mobui, o Tuhan, Allah nami.

YEREMIA 44:27

Ḷongasion-Kubí sinbá mobodito in moiko bo diá mosanang, modapot in moiko matoi komintan, pinomayá matoi in parang andeka popisí in yampoi in takit.

YEREMIA 5:3

Inta sinuntut i Tuhan in kososatiabí. Ki Tuhan in noḷubok kon i monimu, táe diá in pandung monimu. Sia in nomutuk kon i monimu, táe moiko in doí sambokon. Moiko in pamandot, bo doí mogogai in mogaid kon dosamu mita.

OMBAḶ 5:21

Oo Tuhan, diádon in kami mobui mangoi kon ini-Mu; kami in mobuibí mangoi kon ini-Mu! Popobuidon in kaadaan nami ná dungkuḷmai.

YEHEZKIEL 16:43

Akuoi in nohukum kon inimu popisí in kinoḻionganmudon naonda in pinomomiag-Ku kon inimu kon tungkuḷ in iko noguodpa. Pinomukámu in torú-Ku pinodoyon kon aidmu inta moraat tua. Nongonu sin bayongan in aidmu inta mokorongó tua dinuganganmupa doman in totuaḻingan? Akuoi ki Tuhan Inta Totok in moḷantud ain nosingog.”

DANIEL 9:11

Bayongan in Israel ain iḻimimpat kon hukum-Mu mita bo doí mokidongog kon singog-Mu. Kami in binaradosa kon ini-Mu, bo tuamai pinouma-Mu kon inami in kutuk inta ain pinais kon bonu in Buk i Musa, mogogundoi-Mu.

HOSEA 7:10

Koḷoḷoḷatú in bangusa in Israel koontongandon totok bo nobaḻí tomponuot kon taḷá monia. Umpaka tua komintan ain nobaḻí, mosia in diábí doman notayak kon i-Nakó andeka mobui mangoi kon i-Nakó, ki Tuhan Allah monia.

HOSEA 7:14

Mosia in diábí totu-totuu mosambayang kon i-Nakó. Aka mosia mosambayang, mosia in umobatbí kon tosiugan monia, bo mogamui naonda bo onu inta inaidan in intau mita inta diá mopirisaya kon i-Nakó. Aka mosia mosambayang moigum kon gandum bo anggur, mosia in monongkekeb kon awak ná inta inaidan in intau mita inta nosumba kon dewa. Mosia in totu-totuubí kon moḷawang kon i-Nakó.!

HOSEA 7:7

Kon bonu in torúnea, mosia in noḻimod kon itoi mita monia. Bayongan in datu monia ain iḻimod noyo-noyodudui. Táe umpaka kaadaan nádomai tua in koraatnea, yo diábí doman tobatúmai in nosambayang kon i-Nakó sin mokituḷung.”

LUKAS 24:45

Onda intua ki Yesus nomukat kon raian monia sinbá komangaḻean monia in bayongan inta ain pinais kon Buk Motusi.

YOHANES 10:35

Kinotaauanbí naton kon onu inta ain pinais kon bonu in Buk Motusi umuranbí pakéon, diábí in goga-gogainea. Dá aka ki Allah monangoi ‘ilah’ kon intau mita inta nopirisayadon kon singog-Nea.

YOHANES 6:45

Kon bonu in Buk in nabi mita pinais nanaa: ‘Komintan intau tundúonbí i Allah.’ Dá bayongan intau inta ain nokodongog kon totundú bo nobalajar nongkon i Amá, mamangoibí kon i-Nakó.

YOHANES 8:32

dá kotaauandon monimu in ki Allah inta mobanar tua, bo popisí intua dá moiko in poḷuatondon.”

EPESUS 4:21

Kinodongogan bidon monimu in soaḷ Sia! Bo saḷaku dumodudui-Nea mita, sinundú domandon kon i monimu in sipat mita i Allah inta oyúon kon i-Nia!

ULANGAN 29:4

Táe dapot in tanaa mako diápa inogoi-Nea in moiko momangaḻe kon bayongan inta kinorasaan monimu tatua.

YAKOBUS 1:5

Aka oyúon in kon sigad monimu in diápa totok mobijaksana; yo musti mopoigum kon i Allah, dá ogoianbí i Allah in kabijaksanaan in sia. Sin takinbí pia in gina bo tabi in ki Allah in mobogoi kon batúan in intau.