DANIEL 7:25 - Alkitab Singog In Mongondow Masa In Tanaa

²⁵ Sia in mosingogbí monayow kon i Allah Inta Totok in moḷantud bo mondorot kon umat i Allah. Sia in moḷongasibí momaḷui kon hukum mita bo singgai mita moḷoben in agama in umat i Allah, bo mosia in kawasaanneabí kon bonu in toḷu bo tobotak in taong.

DANIEL 7:25 ပူးပေါင်းရင်းမြစ်များ

YESAYA 37:23

Kinotaauanmu degá mongo ki ine in sinibáan bo siningkuḻemu tua? Akuoi, ki Allah in Israel, Allah inta motusi.

DANIEL 11:28

Onda intua datu in butá kon utuan in mobui kon butánea takin kodia-dia in bayongan pakakat inta inagow inta nouḻínea. Sia in moniat mako kon morimumud kon agama inta pinirisaya in umat i Allah. Sia in mogaidbí kon onu in koibognea aidan bodongka mobui kon butánea tontaní.

DANIEL 12:7

Intau ibanea tatua in nopotundú in ḻimanea doyowa nosimpaḷ ná ḷangit. Dinongogku in sia nongibot pinodoyon kon i Allah inta mononoi bo noguman, “Bayongan inta nobaḻí tatua in modapotbí in toḷu notaong kapin. Naonda in mopaḷut mako in pomogutúan kon umat i Allah mopaḷut, dá mopaḷut domandon in inta mokoherang mita tatua.”

DANIEL 2:21

Siabí inta nonantú kon sempo bo wakutu, Sia in nopoḷabú bo noduí kon pongawasa. Siabí doman inta nobogoi in kabijaksanaan, bo noponotabi in pomomangaḻe.

DANIEL 3:26

Bo ki Nebukadnezar in dinimiug kon ngara in pinonontuḷúan tatua bo nomaḷú, “Sadrakh, Mesakh bo Abednego, mogogundoi mita i Allah Inta Totok in moḷantud! Ḷuaidon nongkon tuḷú tanion!” Dá iḷumuaidon in mosia.

DANIEL 4:17

Tuata in bontow in tosingogon nami malaekat mita inta umuran kiḷuka-ḷukadmai bo inta tantú nokopoingat. Makusud nami in bá intau mita kon ondaka yo mongaku, kon ki Allah Inta Totok in moḷantud in kitogi kawasa kon dodatuan in intau bo dodatuan tatua in ogoi-Nea kon i inekabí in piniḻí-Nea, nodapotbí in kon intau inta totok in diá in mangaḻenea!’

DANIEL 4:2

Akuoi in moibog mongonguman kon inta mokoherang bo mujizat inta ain pinomia i Allah Inta Totok in moḷantud kon inakó.

DANIEL 4:25

Ki Tuangku in poguntunon nongkon yua-yuak in intau bo mobiagdon kon sigad in mahaḷuk mita kon rawang. Pitu notaong in koonggotnea ki Tuangku in mokaan kon bonok naonda bo sapi bo mosiug kon rawang inta diá in oḻi-oḻingoinea, modapot in mobuntad kotugatan in oḷú. Mopaḷut mako kon tua ki Tuangku in mongakudon kon ki Allah Inta Totok in moḷantud in kitogi kawasa kon dodatuan in intau, bo dodatuan tatua in ogoi-Nea kon i inekabí in piḻíon-Nea.

DANIEL 4:32

Iko in poguntunon nongkon sigad in intau mita, bo mobiag moyotakin in mahaḷuk mita kon rawang. Pitu notaong in koonggotnea iko in mokaan kon bonok naonda bo sapi. Mopaḷut mako kon tua iko in mongakudon kon Ki Allah Inta Totok in moḷantud in kitogi kawasa kon dodatuan in intau bo dodatuan tatua in inogoi-Nea kon i inekabí inta piniḻí-Nea.”

DANIEL 7:18

Táe umat i Allah Inta Totok in moḷantud in motarimabí kon hak momarenta bo pomarentaannea in modapotbí in mononoi.”

DANIEL 7:20

Ibogonku in kotaauanku doman in soaḷ tungoi mopuḷú kon uḷunea bo soaḷ tungoi nointok inta nomuká noiduduimai bodongka norabut kon tungoi toḷu inta nobiag muna tua. Tungoi nointok tatua in komata bo bibignea in mongonguman kon ambungangaḷ takin iḷumoḷatú. Sia in mokokoningkim totok noiḻiu kon tungoi mita ibanea tatua.

DANIEL 7:8

Koyogotpa in akuoi nonaridimai kon tungoinea mita, bo daḻídon in tungoi tobatú ibanea nobiag kon sigadnea. Tungoi tatua nointok, táe nokosisí bo norabut kon toḷu in tungoi inta muna nobiag tatua. Tungoi nointok tatua in oyúon matanea naonda bo mata in intau bo bibig inta nongonguman takin ambungangaḷ bo noḷoḷatú.

DANIEL 8:11

Nodapotbí in sia nonontot kon itoi in tontara in soroga, nopogogai in kuruban sosumba muḷoi in singgai inta pinosumba kon itoi in tontara tatua, bo nogumpag kon baḷoi pososumbaan kon inia.

DANIEL 8:14

Dinongogku in malaekat tobatú ibanea in notubag, “Modapot in toribu bo mogatut bo ḻima nopuḷú nosinggaipa. Kon dodai intua kuruban muḷoi in ḷoḷabungnea bo muḷoi in doḷo-doḷom diápabí posumba. Bain mopaḷut mako kon tua bo baḷoi pooibadaan tompiaandon bui.”

DANIEL 8:9

Nongkon tungoi tobatú nomukádon in tungoi nointok, inta nobaḻí totok in noḷoben bo kawasanea iḷumoben nopobayá ná toḷatan, ná pomukaan bo nopobayá ná butá inta nopia.

DANIEL 9:27

Datu tatua in momiabí kon dodandian moropot takin mobayong in intau pitu notaong in koonggotnea. Kon ruak in wakutu inta sinantú tatua, sia in mopogogaibí in mobogoi in kuruban bo sosumba. Onda intua inta mokokoningkim inta sinangoian Aid moraat inta mokorimumud in ukatonbí kon Baḷoi Tuhan bo umuranbí kon tua modapot in sia inta nogukat kon tua koḷabúan in koyopúan inta ain sinantú i Allah kon inia.”

HOSEA 7:16

Mosia in umuran bidon dumudui kon dewa mita inta beresibí diá in kawasa onu bo onu. Mosia in diábí motaau pongata naonda bo piot inta nopupud. Itoi mita monia in dumodia in mosingog, tuamai in ḻimodonbí in mosia in kedang, bo kosingan in intau mita in Mesir.”

TESALONIKA 2 2:3

Naondakadon in habar dinongog monimu, yo donaaibí baḷú kopongaruan monia in moiko, sin tongábí uboḷ i monia inta moibog mopongaru kon intau ibanea. Sinbá kotaauandon monimu, kon wakutu in diápa moiangoi in singgai tatua, munapabí nanaa in mobaḻí: Mobayong in intau mobaḷui in pirisaya bo monaḷámai kon i Kristus; bo intau moraat inta ain sinantú tumuot kon naraka in mamangoidon mopoontong in oaid monia.

TESALONIKA 2 2:4

Takin kaḷakuang sia in moḷawang bo dumodia kon bayongan inta sinumba in intau, ande bayongan ilah inta inanggap in intau ki Allah. Modapot in sia ḻimitú kon bonu in Baḷoi i Allah bo mongaku kon sia tua kain in ki Allah.

TESALONIKA 2 2:8

bain tua bo koontongandon in intau moraat tatua. Sahingga in aka ki Tuhan Yesus mamangoi yo ḻimodon-Nea in intau moraat tatua takin tompot inta pogirup-Nea, bo yoyangon-Nea wakutu in Sia mamangoi takin kamuliaan-Nea.

WAHYU 12:14

Táe bobay tatua inogoiandon in koḻikip doyowa. Koḻikip in boniá moḷoben, sinbá ḷumayug in sia mayá in tampatnea kon padang gurun, tampat inta poḷukadan kon inia kon bonu in toḷu notaong kapin, sin pomiḷagui kon uḷag.

WAHYU 12:6

Dá bobay tatua in noḷagui nopobayá in padang gurun, tampat inta ain sinadia i Allah kon inia. Sia in iḷukadan kon tampat tatua kon bonu in 1.260 nosinggai in koonggotnea.

WAHYU 14:12

Dá kon naa, umat i Allah inta motoindudui kon parenta-Nea bo mosatia kon i Yesus, musti Mokopotabá.

WAHYU 16:6

Sin mosia ain nopobutak in dugú in umat mita i Allah bo dugú in nabi mita; tanaa mako pinoinum-Mu domandon in mosia in dugú, patusbí tarimaan monia intua!”

WAHYU 17:6

Bo inontongku in bobay tatua noḷoḷangu in dugú in umat mita i Allah bo dugú in intau mita inta nobaḻí sakusi mita i Yesus. Naonda inontongku in bobay mita tatua, noherangdon totok in akuoi.

WAHYU 18:24

Babel ihukum sin kon bonu in kotá tatua kinokadapatandon dugú in nabi mita, dugú in umat i Allah, singogon mako kopoḷokon dugú in bayongan intau inta ain iḻimod kon dunia naa.