DANIEL 2:30 - Alkitab Singog In Mongondow Masa In Tanaa

³⁰ Inta noibuni tatua in pinoniatadon kon i bobantung naa deemanbí popisí in bobantung naa in mopando-pandoi kon i inekadon, táe tongábí bá kotaauandon i Tuangku in mangaḻe in togoindop i Tuangku bo momangaḻe doman kon tombonu in dodob i Tuangku.

DANIEL 2:30 ပူးပေါင်းရင်းမြစ်များ

KINOBAḺIAN 41:16

Ki Yusup in notubag, “Deemanbí akuoi bobantung tanaa, Tuangku, táe ki Allahbí in moginsilang kon mangaḻe in togoindop i Tuang.”

MAZMUR 139:2

Kinotaauan-Mu in bayongan in aidku; nongkon noyayú kinomangaḻean-Mu in raianku.

YESAYA 45:4

Iko in inoiní-Ku bo inogoian-Ku in donoi, umpakabí diá kinotaauanmu in Akuoi. Potabá-Ku in iko motuḷung kon Israel mogogundoi-Ku, sin mosia in bangusa inta piniḻí-Ku.

DANIEL 1:17

Ki Allah in nobogoi kon inaya opat in hikmat bo kototaau kon noyagi-yagimai in pais. Koḻikud intua ki Daniel inogoian doman in pandoi moginsilang kon mangaḻe in oontongon bo togoindop.

DANIEL 2:47

Ki Datu in noguman, “Totuu, Daniel, ki Allahmu tua in moḷobe-ḷobenbí kon bayongan in allah. Sia in nongawasa kon bayongan in datu, bo nopotaau in bayongan inta noibuni. Kinotaauanku intua sin iko in nokomampudon noginsilang kon mangaḻe in inta noibuni tanaa.”

DANIEL 2:49

Táe pinodoyon kon oigum i Daniel, ki datu in nobogoi in pomarentaan propinsi kon i Sadrakh, Mesakh bo ki Abednego, bo ki Daniel tontaní in nogutundon kon komaḻig i datu.

AMOS 4:13

Buḷud bo tompot, ki Tuhanbí in nomaḻí; tomayá-Nea in pinoniata-Nea kon intau. Sia in nomia kon singgai bo doḷom; kon popod mita in butá Sia in nodondaḷoi, Ki Tuhan Allah Inta Totok in mokawasa, tuata in tangoi-Nea.

MATIUS 24:22

Bo aka kuma bo wakutunea naa bo diá impoḷokan; yo kon bayongan inta nobiag diábí in mosaḷamat. Tongá popisí in intau mita inta sinokopiḻídon dá wakutu tatua inimpoḷokandon.

MARKUS 13:20

Aka kuma bo diádon impoḷokan i Allah i wakutunea tatua, dá diábí in tobatúmai in mosaḷamat. Táe popisídon in umat-Nea, dá impoḷokan i Allah in wakutu-Nea.

OUMAN IN RASUL MITA 3:12

Naonda in ki Petrus nokoontong kon intau mobayong tatua, sia in nosingog kon i monia nanaa, “Ei intau mita in Israel nongonu sin moiko in moherangbí in mokoontong kon tua komintan? Degá kai monimu kamai dá intau tanaa in nokobayá popisíbí in kawasa bo kotoindudui nami kon i Allah?

SURAT I PAULUS KON JAMAAT RUM 8:28

Kinotaauanbí naton kon ki Allahbí in nonoinut kon bayongan yagi-yagi, sahingga in mokopoangoi kon onu inta mopia kon intau mita inta motabi kon i-Nia bo inta inoiní-Nea podudui in tomayá-Nea.

KORINTUS 2 4:15

Tua komintan in lantaranbí kopontingan monimu. Sin aka mobayong in intau monotaau kon totabi i Allah, yo mobayong doman in mopoyaput in sukur kon i Allah; dá ki Allah in dayowon totok.