DANIEL 11:36 - Alkitab Singog In Mongondow Masa In Tanaa

³⁶ Datu in butá in utuan in mogaidbí kinoibog in ginanea. Takin ḷumoḷatú sia in moguman kon sia in moḷobe-ḷoben nongkon dewa taondakabí, nodapotbí in moḷobe-ḷoben nongkon i Allah Inta Totok in Moḷantud. Sia in motaaubí in mogaid kon tua modapot in torú i Allah modait. Sin onu inta ain sinantú i Allah mustibí aidan muna.

DANIEL 11:36 ပူးပေါင်းရင်းမြစ်များ

MAZMUR 136:2

Posukurdon kon i Allah Inta Totok in moḷantud; tabi-Nea in umuran mononoi.

MAZMUR 33:10

Ki Tuhan in nopogogai kon bayongan in tomayá mita in bangusa mita, Sia in nonginggamá kon niat monia.

AMSAL 19:21

Intau mobayong in tomayá, táe tongábí onu in sinantú i Tuhan in mobaḻí.

YESAYA 10:23

Oo, sinangkub in butá in rimumudonbí i Tuhan Inta Totok in mokawasa; tuata in simpod in singog i Tuhan, bo diábí in motaau baḷuian bui.

YESAYA 10:25

Kon bonu in wakutu motoyong torú-Ku kon inimu mogogaidon, bo mosia in yopúon-Ku.

YESAYA 10:5

Ki Tuhan in noguman, “Moboditodon in Asyur! Asyur in pakéon-Ku nobaḻí sambok bo popangkuḷ sin momongkug kon intau mita inta kinotugatan in torú-Ku.

YESAYA 14:13

Iko in moniat moponik kon ḷangit bo momia kon tampat pomomarentaanmu kon ḻimonik in tundi inta totok in moonik! Kainimukamai iko in motaaubí ḻimitú mobaḻí datu kon tudu in buḷud kon dotá in utuan, tampat pinoyosipunan in dewa mita.

YESAYA 14:14

Iko in moguman, kon iko in mamonik in goḷom mita inta moḷantud bo mobaḻí ná ki Inta Totok in moḷantud.

YESAYA 26:20

Tuotdon kon bonu in baḷoimu, ei bangusaku, bo ḻingkopaidon in ngara. Pogadopdon motoyong modapot in torú i Tuhan mooyongdon.

YESAYA 30:33

Nongkon koḻipodpabímai ain sinadia in tampat potubáan kon i datu in Asyur. Tampat tatua modaḷom bo mooḷad, binonuan in kayu pondungú inta noyoguntuḷdon. Ki Tuhan in mopoyongkitdon intua pongin mopoirup in poginaan-Nea ná ongkag in balerang.

YESAYA 46:10

Nongkon pinomangkoianmai pinotaau-Kudon in onu inta mobaḻí kon singgai moiduduimai, nongkon dungkuḷpabímai ain sinoḻindap-Ku onu in mobaḻí. Guman-Ku: Onu inta ain sinantú-Ku in mobaḻíbí, onu in koibog-Ku in notantúbí kon aidan-Ku!

YESAYA 57:9

Moiko in nopomaké in ḷana bo inta mongo bo mongobondu, bo mayá mosumba kon i Dewa Molokh. Moiko in mopotabá in totabá mita mayá in butá mita inta moyayú nodapot in dunia in intau minatoi.

YEHEZKIEL 28:2

“Ei intau ilo-ilow, potaaudon kon i datu in Tirus, onu inta poguman-Ku, Akuoi ki Tuhan Inta Totok in moḷantud kon inia, ‘Iḷumoḷatú totok in iko in nonganggap kon iko in dewa inta nomarenta kon yua-yuak in dagat. Motaaubí doman iko in tumon dewa, táe toropdon, iko in tongábí intau ilo-ilow.

YEHEZKIEL 35:13

Ei bangusa in Edom, moambungangaḷ in moiko bo moḷoḷatú in singogmu kon i-Nakó. Dinongog-Ku bidon intua komintan.

DANIEL 11:16

Datu in butá utuan tatua in mogaidbí podudui in ibognea bo diá bidon in moḷawang tongopiḻikmai. Bo ḻitúannea bidon in butá inta mopia tatua bo kawasaannea komintan.

DANIEL 11:3

Onda intua momukádon in datu tobatú inta motorindog totok. Sia in momarentabí kon dodatuan inta totok in moḷoben bo mogaidbí kon onu in koibognea.

DANIEL 11:37

Ki Datu tatua in diábí mopandungmai kon i dewakabí táonda inta sinumba in mogoguyangnea, noitakin doman in dewa sosumbaanmai in bobay mita. Diábí pinandungneamai in dewa mita tatua sin inanggapnea kon siabí in moḷobe-ḷoben nongkon i monia.

DANIEL 12:7

Intau ibanea tatua in nopotundú in ḻimanea doyowa nosimpaḷ ná ḷangit. Dinongogku in sia nongibot pinodoyon kon i Allah inta mononoi bo noguman, “Bayongan inta nobaḻí tatua in modapotbí in toḷu notaong kapin. Naonda in mopaḷut mako in pomogutúan kon umat i Allah mopaḷut, dá mopaḷut domandon in inta mokoherang mita tatua.”

DANIEL 2:47

Ki Datu in noguman, “Totuu, Daniel, ki Allahmu tua in moḷobe-ḷobenbí kon bayongan in allah. Sia in nongawasa kon bayongan in datu, bo nopotaau in bayongan inta noibuni. Kinotaauanku intua sin iko in nokomampudon noginsilang kon mangaḻe in inta noibuni tanaa.”

DANIEL 4:35

Bangusa mita kon dunia diá in mangaḻenea. Ki Allah in nongawasa kon malaekat kon soroga bo intau kon dunia. Diá tobatúmai intau in mokoḻimpat kon ibog-Nea, diábí in mokobaḻí moḻibó mongo onu in pomiaan-Nea.”

DANIEL 5:19

Totuu moḷoben in sia, nodapot in intau mita nongkon bayongan in bangusa, inanakan, bahasa, mourot bo moondok kon inia. Aka moibog in sia moḻimod kon intau, ḻimodonneabí doman mako in intau tatua. Aka moibog in sia moposaḷamat kon intau, dá posaḷamatonneabí doman in intau tatua. Sia in mopoḷantud andeka mopoompá kon i ineka podudui in ibognea.

DANIEL 5:20

Táe naonda in sia iḷumoḷatú, motogat in gina bo moḻingá iḷabú in sia nongkon pomomarentaan dodatuannea dá noinggamádon in kahoromatannea.

DANIEL 7:8

Koyogotpa in akuoi nonaridimai kon tungoinea mita, bo daḻídon in tungoi tobatú ibanea nobiag kon sigadnea. Tungoi tatua nointok, táe nokosisí bo norabut kon toḷu in tungoi inta muna nobiag tatua. Tungoi nointok tatua in oyúon matanea naonda bo mata in intau bo bibig inta nongonguman takin ambungangaḷ bo noḷoḷatú.

DANIEL 8:19

“Akuoi in mopotaaubí kon inimu onu in mobaḻí kon singgai moiduduimai saḷaku bungai in torú i Allah. Sin oontongonmu tatua in mogumanbí kon onu in mobaḻí kon singgai tumi.

DANIEL 8:4

Inontongku in domba koḷakian tatua nonungoi ná dotá in toyopan, utuan bo toḷatan. Diá tobatúmai in mahaḷuk in mokotahang tumayow kon inia andeka mokoḷagui nongkon kawasanea. Sia in mogaid kon onukabí in koibognea bo nobaḻí moḷoḷatú.

ZAKHARIA 11:16

Sin Akuoi in mopotabábí in gombala tobatú sin moḷukad kon paanan in domba-Ku, táe diábí pandungonneamai in domba inta nobuḻi; diábí tayakonnea in domba inta noiḷangkam, diábí doman mongundam kon domba inta kinekeban, bo diá mopokaan in domba inta nobiagpa. Nodapotbí in siadon tontaní in nokaan kon tapú in domba inta totok in noḷomumu bo norabut kon konuku mita in mahaḷuk tatua.

YOHANES 5:30

“Akuoi in diábí motaau in mogaid kon onu bo onu podudui in ibog-Ku tontaní. Akuoi in tongábí mohakim podudui in onu inta pinarenta i Allah. Bo moadilbí in pononantú-Ku, sin Akuoi in diábí dinumudui kon ibog-Ku tontaní, táe dinumuduibí kon ibog i Amá inta nopotabá mangoi kon i-Nakó.

YOHANES 6:38

Sin Akuoi in namangoi nongkon soroga deemanbí mamangoi mogaid kon onu inta kinoibog-Ku tontaní, táe mogaidbí kon inta kinoibog-Nea inta nopotabá kon i-Nakó.

OUMAN IN RASUL MITA 4:28

Mosia in notobatú in nogaid kon yagi-yagi, inta munadon sinantú-Mu kon mobaḻí. Bo sinantú-Mu intua pinodudui in kawasa bo ibog-Mu tontaní.

ULANGAN 10:17

Ki Tuhan Allahmu noiḻimonik kon bayongan in ilah bo noiḻiu kon bayongan in kawasa. Sia in Allah inta moḷoben bo mokawasa inta musti duduian. Sia in doíbí tongá momiḻí bo doí doman Sia uboḻian.

TESALONIKA 2 2:3

Naondakadon in habar dinongog monimu, yo donaaibí baḷú kopongaruan monia in moiko, sin tongábí uboḷ i monia inta moibog mopongaru kon intau ibanea. Sinbá kotaauandon monimu, kon wakutu in diápa moiangoi in singgai tatua, munapabí nanaa in mobaḻí: Mobayong in intau mobaḷui in pirisaya bo monaḷámai kon i Kristus; bo intau moraat inta ain sinantú tumuot kon naraka in mamangoidon mopoontong in oaid monia.

TESALONIKA 2 2:4

Takin kaḷakuang sia in moḷawang bo dumodia kon bayongan inta sinumba in intau, ande bayongan ilah inta inanggap in intau ki Allah. Modapot in sia ḻimitú kon bonu in Baḷoi i Allah bo mongaku kon sia tua kain in ki Allah.

TESALONIKA 2 2:8

bain tua bo koontongandon in intau moraat tatua. Sahingga in aka ki Tuhan Yesus mamangoi yo ḻimodon-Nea in intau moraat tatua takin tompot inta pogirup-Nea, bo yoyangon-Nea wakutu in Sia mamangoi takin kamuliaan-Nea.

YOSUA 22:22

“Inta Totok in Mokawasa tuata in ki Tuhan! Inta Totok in Mokawasa tuata in ki Tuhan! Kinotaauan-Neabí kon nongonubí sin kami in nomiabí kon natua, bo ibogon nami sinbá kotaauan doman monimu mongo nongonu sin pinomiabí nami in natua! Aka kuma bo pinomia nami intua sin moḷawang kon i Tuhan andeka kami in diádon mopirisaya kon i-Nia, dá pobiódon mako in kami matoi tanaa doman mako!

WAHYU 10:7

Táe aka malaekat impitunea in mogirupdon kon torompetnea, yo aidandon i Allah in tomayá inta binuni-Nea, ná inta ain pinotaau muna kon intau mita inta nogaid kon oaidan-Nea bo kon nabi mita.”

WAHYU 12:14

Táe bobay tatua inogoiandon in koḻikip doyowa. Koḻikip in boniá moḷoben, sinbá ḷumayug in sia mayá in tampatnea kon padang gurun, tampat inta poḷukadan kon inia kon bonu in toḷu notaong kapin, sin pomiḷagui kon uḷag.

WAHYU 13:1

Onda intua akuoi in nokoontong kon tobatú mahaḷuk inta iḷumuai nongkon bonu in dagat, mopuḷú in tungoinea bo pitu in uḷunea. Pomuḷoi in tungoi oyúon in mahkota, bo pomuḷoi in uḷu pinaisan tangoi mita inta pohojat kon i Allah.

WAHYU 17:17

Sin gina monia sinimbayagandon i Allah sinbá mogaid kon inta kinoibog-Nea. Sinobatúdon i Allah in mosia sinbá moyopakatdon moposarakan in kawasa monia kon mahaḷuk tatua, sinbá mahaḷuk tatua in momarenta modapot in mobaḻí onu inta pinoguman i Allah.

WAHYU 17:3

Bo akuoi in kinawasaan in Roho i Allah bo dinia in malaekat tatua kon padang gurun. Kon tua akuoi in nokoontong kon tobatú bobay inta iḻimitú kon tudu in tobatú mahaḷuk inta nopars in batangannea. Mahaḷuk tatua nopuḻing in pais inta pohojat kon i Allah. Pitu in uḷu in mahaḷuk tatua bo mopuḷú in tungoinea.