AMOS 8:5 - Alkitab Singog In Mongondow Masa In Tanaa

⁵ Moiko in noguman kon i monimu tontaní, “Totuubí moonggot in singgai mita moḷoben. Kita in moibogdon ḷagi mopotaḷui in gandum naton, táe poramean tatua in diápabí doman mopaḷu-paḷut. Toonubí degá in singgai in Sabat mopaḷut, sinbá kita in motaaudon bui modagang? Kita in moibogdon totok in mongupit kon epa, monguboḷ kon pogogukuran, bo monombogá kon simbangan.

AMOS 8:5 ပူးပေါင်းရင်းမြစ်များ

DATU MITA 2 4:23

“Nongonu sin mustibí mayá tanaa?” ki buḷoinea in noḻibó. “Singgai naa in deemanbí singgai in Sabat bo deemanbí doman singgai moḷoben Buḷan Mobagu.” “Diábí nongonu,” tubagnea.

IḶUAIAN 31:13

mopotaau kon bangusa Israel, “Ḷukadai in singgai in Sabat, singgai inta ain sinantú-Ku mobaḻí singgai pogogaian. Modapot kon adí bo ompumu singgai tatua mobaḻí singgai ponanoban kon sigad i monimu bo kon i-Nakó, sinbá kotaauandon monimu kon Akuoi naa in ki Tuhan, bo binaḻí-Kudon in moiko bangusa-Ku tontaní.

AMSAL 11:1

Ki Tuhan in doíbí kon intau inta mopomaké in simbangan inta motombogá táe mopia in gina-Nea kon intau inta mopomaké in pononimbangan inta moitutui.

AMSAL 16:11

Ibogon i Tuhan intau mokopotuḻid kon gina aka modagang, ná doman tua in mopomaké in ukuran bo simbangan.

AMSAL 20:23

Simbangan bo batu pononimbangan in intau motombogá in kinodoíbí i Tuhan.

YESAYA 1:13

Diábí in baragunanea in podiaan kon sosumbamu tatua. Doíbí in Akuoi kon bónea. Morongó in Akuoi bo diádon mokotahang in mokoontong kon i monimu monanob kon Buḷan Mobagu, singgai mita in Sabat bo singgai mita moḷoben takin poyoyodungkuḷan in agama. Bayongan tua in ain sinamakan monimu in dosamu mita bo nobaḻídon dodiaan kon i-Nakó; moḷopídon in Akuoi in mobaba kon tua.

YESAYA 58:13

Ki Tuhan in noguman, “Horomatbí in singgai in Sabat saḷaku singgai kon i Tuhan. Dika mogaid kon kopontinganmu tontaní kon singgai tatua. Ramedon in singgai tatua nobaḻí singgai mokosanang kon gina; horomatbí in singgai i Tuhan takin diá maya-mayá mako; dika doman mogaid andeka mosingog kon diá in mangaḻenea.

HOSEA 12:7

Tuamai, ei buí i Yakub, popirisayadon kon i Allahmu bo pobuidon mangoi kon i-Nia. Kobiagdon takin bayongan in tabi bo kojojujur, bo oḷatdon takin sabar modapot in ki Allahmu mogaid.

HOSEA 12:8

Ki Tuhan in noguman kon bangusa in Israel, “Moiko in motombogá naonda bo intau in Kanaan; mododagangmu mita moibog monguboḷ kon mototaḷuinea pongin simbangan inta diá moitutui.

IMAMAT 19:36

Paké in meter, simbangan ande ukuran inta mobanar. Akuoi ki Tuhan Allahmu, bo Akuoi aindon nodia kon i monimu iḻumuai nongkon Mesir.

ZAKHARIA 5:6

“Onu intua?” iḻibóku. Tubagnea, “Karansi tobatú. Tuata in lambang in dosa nongkon sinangkub in butá tanaa.”

ZAKHARIA 5:8

Malaekat tatua in noguman, “Bobay tanaa in nobaḻí lambang in aid moraat.” Bo dinorotnea bui monag in bobay tatua kon bonu in karansi bo sinaḷobannea in karansi tatua.

MALEAKHI 1:13

Iko in moguman, ‘Mobúdon in kita kon bayongan intua’, bo moiko in mopoompámaidon kon i-Nakó. Moiko in modia mangoi kon biag inta sinakowmu, biag inta noḻempeng andeka inta notakit sin posumba kon i-Nakó. Kai monimu kamai dá tarimaan-kubí in sosumbamu tatua?

PINOGIAPAN 10:10

Ná doman tua in kon singgai mita poramean, ramean mita Buḷan Mobagu bo porayaan mita monimu ibanea, torompet tatua musti irupon kon dodai in moiko moposumba in kuruban payongon bo kuruban podamean kon i-Nakó. Dá tuḷungan-Ku in moiko. Akuoi in ki Tuhan Allahmu.”

KOLOSE 2:16

Manangka intua donaaidon pomayá mako in intau mopotaḷá kon i monimu kon soaḷ kaanon ande inumon, ande soaḷ mita singgai moḷoben in agama, andeka porayaan mita in buḷan mobagu, ande soaḷ singgai in Sabat.

SAMUEL 1 20:5

Ki Daud in notubag, “Nanaa, ikoḷom in Rame Buḷan Mobagu, bo sabanarnea akuoi in mongaanbí moyotakin i Tuangku. Táe aka moibog in iko, yo mayá in akuoi bo mogadop kon dogami modapot in toumá doḷom.